ជាតិ
សង្គមជាតិ
×![]()
ភ្នំពេញ៖ អង្គការក្រៅរដ្ឋាភិបាលទាំងជាតិ និងអន្តរជាតិ ដែលកំពុងជំទាស់នឹងសេចក្តីព្រាង ច្បាប់ស្តីពីអង្គការមិនមែនរដ្ឋាភិបាល (LANGO) មានក្តីបារម្ភជាខ្លាំង ចំពោះពេលវេលា ពិគ្រោះយោបល់ ដោយពួកគេលើកឡើងថា រដ្ឋសភាមិនបានផ្តល់ពេលវេលាគ្រប់គ្រាន់ ក្នុងពិគ្រោះយោបល់ជាមួយភាគីពាក់ព័ន្ធ ពិសេសគឺ NGO។ សេចក្តីព្រាងច្បាប់នេះ ដែលបានដាក់ឆ្លងគណៈរដ្ឋមន្ត្រីកាលពីថ្ងៃទី៥ ខែមិថុនា កំពុងស្ថិតក្រោមការពិនិត្យរបស់ គណៈកម្មការអចិន្ត្រៃយ៍នៃរដ្ឋសភា។
នាយិកាប្រតិបត្តិ នៃមជ្ឈមណ្ឌលសិទ្ធិមនុស្សកម្ពុជា (CCHR) អ្នកស្រី ចក់ សុភាព បានសម្ដែងការសោកស្ដាយយ៉ាងខ្លាំង ចំពោះពេលវេលាពិគ្រោះយោបល់លើសេចក្តីព្រាងច្បាប់ LANGO ដែលរដ្ឋសភានឹងរៀបចំនៅថ្ងៃទី៨ កក្កដានេះ។ អ្នកស្រីនិយាយថា ការកំណត់ពេលវេលាពិ គ្រោះយោបល់នេះ នឹងមិនអនុញ្ញាតឲ្យ NGO អាចពិភាក្សាទូលំទូលាយឡើយ ប្រសិនបើសភា អនុម័ត ឲសេចក្តីព្រាងច្បាប់នេះ លោកស្រីមិនអាចទទួលយកនោះទេ។ នាយិកា នៃ CCHR រូបនេះ ថ្លែងថា៖«យើងស្នើឲ្យរដ្ឋសភាបញ្ឈប់ការអនុម័តសេចក្តីព្រាង ច្បាប់ដែលមាន លក្ខណៈឆាប់នេះ ហើយសភាគួរតែបើកទូលាយក្នុងការពិគ្រោះយោបល់ យើងមិនអាច ពិគ្រោះយោបល់លើសេចក្តីព្រាងច្បាប់នេះតែ មួយថ្ងៃបាននោះទេ។ ប្រសិនបើសេចក្តី ព្រាងច្បាប់នឹងត្រូវអនុម័តតាមទម្រង់បច្ចុប្បន្ននេះ យើងមិនអាចទទួលយកបានទេ»។
លោកស្រីថ្លែងបែបបនេះ ក្នុងសិក្ខាសាលាពិភាក្សាស្តីពីសេចក្តីព្រាងច្បាប់សមាគម និងអង្គការ ក្រៅរដ្ឋាភិបាល នៅព្រឹកថ្ងៃអង្គារនេះ នៅសណ្ឋាគារ កាំបូឌីយ៉ាណា។ កិច្ចពិភាក្សានេះដែរ មានការចូលរួមពីតំណាងអង្គការសង្គមស៊ីវិលជាតិ និងអន្តរជាតិ សិស្ស និស្សិត ព្រមទាំងតំណាងរាស្ត្រគណបក្សសង្គ្រោះជាតិប្រមាណ ៣០០ នាក់។ជាមួយគ្នានេះដែរ លោក តឹក វណ្ណារ៉ា នាយកប្រតិបត្តិវេទិកានៃអង្គការមិនមែនរដ្ឋាភិបាល ស្តីពីកម្ពុជា (NGO Forum) បានស្នើឲ្យរដ្ឋសភាលុបចោលមាត្រាមួយចំនួន ដែលអាចប៉ះពាល់ ដល់ដំណើរការងាររបស់ NGO។ ហើយថា រដ្ឋសភាគួរតែបើកឲ្យមានត្រួតពិនិត្យ និងពិភាក្សា សេចក្តីព្រាងច្បាប់នេះ ជាមួយភាគីពាក់ព័ន្ធបន្ថែមទៀត«យើងនឹងបន្តទាមទារឲ្យភាក្សាសភា បន្ថែមពេលវេលាពិភាក្សាពិគ្រោះលើសេចក្តីព្រាងច្បាប់នេះ ព្រោះសេចក្តីព្រាងច្បាប់នេះ មិនទាន់អាចទទួលយកបានទេ មាត្រាមួយចំនួននៅមានភាពមិនច្បាស់លាស់ ដែលអាចក្លាយជាឧបសគ្គសម្រាប់សមាគម និងអង្គការនានា»។ នេះជាប្រសាសន៍បញ្ជាក់របស់ លោក តឹក វណ្ណារ៉ា។
ដោយឡែក លោក ព្រាប កុល ប្រធានអង្គការតម្លាភាពកម្ពុជា បានព្រួយបារម្ភចំពោះមាត្រា មួយ ដែលមានចែងក្នុងសេចក្តីព្រាងច្បាប់ NGO នេះ ដែលនឹងមិនអនុញ្ញាតឲ្យថ្នាក់ដឹកនាំ NGOក្នុងស្រុក ដែលត្រូវបានលុបឈ្មោះចេញពីបញ្ជី អាចចុះឈ្មោះបង្កើតសមាគម និងNGO ថ្មី។ «តាមមាត្រា ៥ នៃសេចក្តីព្រាងច្បាប់នេះ គេអាចទំលាក់កំហុសមកថ្នាក់ដឹកនាំ NGO បានយ៉ាងងាយ ក្នុងករណីដែលបុគ្គលិកអង្គការណាមួយ មានភាពមិនស្មោះត្រង់ និងបង្កបញ្ហានោះ ថ្នាក់ដឹកនាំឬ ប្រធានអង្គការនឹងមិនមានឱកាសបន្ត ការងាររបស់ខ្លួនទៀត»។ នេះជាកង្វល់របស់លោក ព្រាប កុល។
ទាក់ទិននឹងសេចក្តីព្រាងច្បាប់ LANGO នេះ កាលពីថ្ងៃទី២ កក្កដាកន្លងទៅនេះ អង្គការតម្លាភាពអន្តរជាតិបានសេចក្តីថ្លែងការណ៍ ទទូចសុំឱ្យរដ្ឋាភិបាលកម្ពុជា ពិចារណាច្បាប់នេះឡើងវិញ ដើម្បីធានាថាដំណើរការនៃការតាក់តែងច្បាប់នេះ ពិសេសគឺ ស្របតាមមាត្រាទី២២ និងមាត្រាទី១៩ នៃ អនុសញ្ញាអន្តរជាតិស្ដីពីសិទ្ធិពលរដ្ឋ និងសិទ្ធិនយោបាយ មាត្រា ទី១៣ នៃអនុសញ្ញាអង្គការសហប្រជាជាតិប្រឆាំងអំពើពុករលួយ និងគោលការណ៍ទី២៣ នៃសេចក្ដីប្រកាសរបស់អាស៊ានស្ដីពីសិទ្ធិមនុស្ស។
សេចក្តីព្រាងច្បាប់ស្តីពី សមាគម និងអង្គការមិនមែនរដ្ឋាភិបាល មាន៩ជំពូក និង៣៩មាត្រា ហើយច្បាប់នេះត្រូវបានរដ្ឋាភិបាលអនុម័តនៅថ្ងៃទី៥មិថុនាកន្លងទៅ។ នៅថ្ងៃទី៨ ខែកក្កដា ស្អែកនេះ រដ្ឋសភានឹងបើកការពិគ្រោះយោបល់សេចក្តីព្រាងច្បាប់ស្តីពី សមាគម និងអង្គការមិនមែនរដ្ឋាភិបាលនេះ ជាមួយភាគីពាក់ព័ន្ធដែរ៕
© រក្សាសិទ្ធិដោយ thmeythmey.com
