សង្គមអន្តរជាតិ
អន្តរជាតិ
មីយ៉ាន់ម៉ា៖ កម្មករផ្តើមតវ៉ាទារឡើងប្រាក់ឈ្នួល ខណៈការបោះឆ្នោតជិតមកដល់
× ម្សិលមិញនេះ មានកម្មករជាច្រើនរយនាក់ប្រមូលផ្តុំគ្នាបាតុកម្មតវ៉ាដោយសនិ្តភាព ដើម្បីទារឡើងប្រាក់ឈ្នួលអប្បបរមាប្រចាំថ្ងៃរបស់ពួកគេ។ បាតុកម្មនេះកើតឡើង នៅភាគខាងជើងទីក្រុងយ៉ង់ហ្គូន ហើយពួកគេសុំតំឡើងពី ៣,៦០០ គីយ៉ាត ( ៣.១៨ ដុល្លាសហរដ្ឋអាមេរិក) ទៅ ៤,០០០ គីយ៉ាត (៣.៥៤ដុល្លាសហរដ្ឋអាមេរិក) សម្រាប់ការងារប្រចាំថ្ងៃរបស់ពួកគេ។
កាលពីខែមុននេះ ក្រោយពីមានការចរចាគ្នារវាងរដ្ឋាភិបាល កម្មករ និង និយោជកគណៈកម្មាធិការជាតិទទួលបន្ទុកប្រាក់ឈ្នួល បានកំណត់ប្រាក់ឈ្នួលអប្បបរមាថ្មីសម្រាប់ កម្មកររោងចក្រ។ ក៏ប៉ុន្តែក្រោយការអនុម័ត មិនបានប៉ុន្មានផង ស្រាប់តែមានចលនាបាតុកម្មជាថ្មីទៀត ដោយពួកគេទាមទាររតំឡើងប្រាក់ខែ។ ក្រុមកម្មករប្រមូលផ្តុំគ្នានៅក្នុងទីក្រុងយ៉ង់ហ្គូន ហើយពួកគេបានបញ្ជាក់ថា ចំនួនប្រាក់ឈ្នួលកន្លងមកនោះ មិនអាចទ្រទ្រង់ជីវភាពប្រចាំថ្ងៃរបស់ពួកគេបាននោះទេ។
ជុំវិញការទាមទារនេះ ក្រុមនិយោជក និងម្ចាស់រោងចក្រ បានបញ្ជាក់ថាការតំឡើងថែមទៀត មិនអាចធ្វើទៅរួចទេ ព្រោះវាអាចប៉ះពាល់ដល់ការប្រតិបត្តិរបស់រោងចក្រ។ បន្ថែមពីនេះ មានរោងចក្រចិន និងកូរ៉េខាងត្បូងមួយចំនួន បានព្រមានកម្មករម្តងហើយថានឹងបិទរោងចក្រចោល ប្រសិនបើជាការទាមទារនេះត្រូវបានអនុវត្តមែននោះ។ យ៉ាងណាក៏ដោយ បើប្រៀបធៀបពីប្រាក់ឈ្នួលអប្បបរមាមីយ៉ាន់ម៉ា ទៅនឹងរដ្ឋអាស៊ានផ្សេងទៀត គេមើលឃើញថាការទាមទារនេះមិនច្រើនលើសលុបពេកទេ ។
ដោយឡែក អ្វីដែលគួរកត់សម្គាល់នោះ ការទាមទារនេះផ្ទុះឡើងស្របពេល ដែលការបោះឆ្នោតជាសកលរបស់មីយ៉ាន់ម៉ាកាន់តែខិតជិតមកដល់ហើយ។ ក្នុងក្រសែរភ្នែករបស់អ្នកវិភាគនេះ ការបាតុកម្ម ជាយុទ្ធសាស្ត្រមួយរបស់ក្រុមសហជីពដើម្បីដាក់សម្ពាធលើរដ្ឋាភិបាល និង ទាញការចាប់អារម្មណ៍គណបក្សនយោបាយផងដែរនោះ។
គួរបញ្ជាក់ផង គណៈកម្មាធិការបោះឆ្នោតមីយ៉ាន់ម៉ាបានកំណត់យកថ្ងៃ ៨ខែវិច្ឆិកាខាងមុខជាថ្ងៃសម្រាប់រៀបចំការបោះឆ្នោតជាសកល ដោយសន្តិសភាព និង ប្រជាធិបតេយ្យដំបូងក្នុងប្រវត្តិសាស្ត្រមីយ៉ាន់ម៉ា៕
© រក្សាសិទ្ធិដោយ thmeythmey.com