×![]()
ភ្នំពេញ ៖ កញ្ញា នៅ ម៉ារីសា ដែលជាអតីតសិស្សរៀននៅវិទ្យាល័យស៊ីសុវត្ថិ រាជធានីភ្នំពេញដែលពេលនេះត្រូវបានគេមើលឃើញថា នាងកំពុងតែលេចធ្លោក្នុងវិស័យសិល្បៈគួរឲ្យកត់សម្គាល់។
តារាសិល្បៈដែលទើបតែរះ នាង នៅ ម៉ារីសាបានឲ្យដឹងទៀតថា សម្រាប់នាងជាតារាសិល្បៈថ្មោងថ្មី គឺពិតជាលំបាកណាស់ ក្នុងការស្វែងរកភាពលេចធ្លោក្នុងវិស័យសិល្បៈនោះ តែទោះយ៉ាងណាក៏ដោយ នឹងខំប្រឹងប្រែងឲ្យអស់ពីសមត្ថភាពនៅពេលថតសំដែងម្តង។ ការចូលប្រឡូកក្នុងវិស័យសិល្បៈរបស់នាង គឺជារឿងចៃដន្យបំផុត ពីព្រោះកន្លងមកនាងថា មិនដែលនឹកគិត ឬក៏ស្រមើស្រមៃចង់ក្លាយជាតារាសំដែងនោះឡើយ។ តែពេលនេះ នាងបានចូលប្រឡូកហើយ នាងគិតថា គឺប្រឡូកឲ្យពេញទំហឹងតែម្ដង ដូចពាក្យចាស់និយាយថា បើលូកប្រហុកលូកឲ្យកប់ដៃ ហើយប្រសិនបើទៅថ្ងៃមុខមានបណ្ដាផលិតកម្មណាទាក់ទងឲ្យនាងថតសំដែងនោះ គឺស្វាគមន៍ជានិច្ច។
ដោយសារតែភាពចៃដន្យ រួមផ្សំនឹងមានទេពកោសល្យសិល្បៈ ក៏ដូចជារូបសម្បត្តិអំណោយផលផងនោះ ពេលនេះបានជំរុញចិត្តរបស់នាងឲ្យស្រឡាញ់ និងចូលចិត្តសិល្បៈយ៉ាងងប់ងុល។ ពន្លកតារាសិល្បៈថ្មីមួយដួងនេះនិយាយប្រាប់ឲ្យដឹងបន្តថា ទៅថ្ងៃមុខ រូបនាងចង់ក្លាយជាតារាសំដែងល្បី ដោយពឹងផ្អែកលើសមត្ថភាពសិល្បៈផ្ទាល់ ពោលគឺមិនចង់ល្បីដោយការលះបង់កិត្តិយសនោះឡើយ ហើយសង្ឃឹមថាឱកាសសាងកេរ្តិ៍ឈ្មោះក្នុងវិស័យសិល្បៈ នឹងមានសម្រាប់រូបនាងជាបន្តទៀតជាក់ជាមិនខាន។
ទាក់ទិននឹងរឿងមនោសញ្ចេតនាស្នេហាវិញ តារាសិល្បៈថ្មោងថ្មីដ៏ស្រស់ប្រិមប្រិយវ័យ១៨ឆ្នាំរូបនេះ បាននិយាយឲ្យដឹងក្នុងសភាពអៀនប្រៀនបែបនារីក្រមុំប្រាប់ថា នាងមិនទាន់មានស្នេហាទេ ពោលគឺបេះដូងរបស់នាងនៅទំនេរល្អណាស់ច។ ចំពោះរឿងគូស្រករនេះដែរ នាងគិតថា ទុកឲ្យព្រេងវាសនា និងព្រហ្មលិខិតជាអ្នកកំណត់ទៅចុះ បើពេលណាដល់ គឺពេលនោះហើយ៕
© រក្សាសិទ្ធិដោយ thmeythmey.com
