សង្គមអន្តរជាតិ
អន្តរជាតិ
ចិន៖ ជារឿងអាម៉ាសដល់បុព្វបុរស បើចិនមិនអាចការពារសមុទ្រចិនខាងត្បូង
× រដ្ឋមន្ត្រីការបរទេសចិនលោក Wang Yi បានអះអាងថា បើសិនជាចិនផ្លាស់ប្តូរជំហររបស់ខ្លួនក្នុងការទាមទារដែនទឹកសមុទ្រចិនខាងត្បូងដែលជារបស់ខ្លួនយូរអង្វែងមកហើយនោះ វានឹងធ្វើឲ្យអាម៉ាសដល់បុព្វបុរសចិន។ ម្យ៉ាងទៀតលោកបានបន្ថែមថា ប្រសិនបើចិនមិនអាចប្រឈមមុខជាមួយការរំលោភបំពានអធិបតេយ្យរបស់ខ្លួនបានពេលបច្ចុប្បន្នវាក៏ជារឿអាម៉ាសបន្សល់ទុកទៅដល់កូនចៅជំនាន់ក្រោយដូចគ្នាដែរ។
សកម្មភាពចិននៅសមុទ្រចិនខាងត្បូងបានបង្ខំឲ្យអាមេរិកដែលសម្ព័ន្ធមិត្តភាគីជម្លោះសមុទ្រចិនហ្វីលីពីន ចេញមុខរិះគន់ចិន និងចោទថាចិនកំពុងរំលោភឈ្លានពានដែនអធិបតេយ្យរបស់ភាគីជម្លោះឯទៀតផង។ យ៉ាងណាក៏ដោយភាគីចិនមិនបានខ្វល់ខ្វាយនឹងពាក្យរិះគន់ ជេរប្រទេចផ្តាសាររបស់អ្នកណាឡើយ។ ចិននៅតែបន្តសកម្មភាពរបស់ខ្លួនក្នុងតំបន់ជម្លោះដដែល។ អ្វីដែលគួរឲ្យចាប់អារម្មណ៍ ប្រមុខការទូតចិនលោក Wang Yi កាលពីម្សិលមិញបានបកស្រាយបញ្ហាគោលជំហររបស់ចិន និងលើកឡើងពីបញ្ហាប្រឈមនានាក្នុងជម្លោះសមុទ្រចិនផង។ លោក បានរៀបរាប់ពីដំណើរដើមទងនៃការកាន់កាប់កោះនៅសមុទ្រចិនខាងត្បូង ដោយលោកបង្ហើបថា ចិនទេដែលជាជនរងគ្រោះ ព្រោះបណ្តារដ្ឋដែលកំពុងទាមទារ ទើបតែចាប់ផ្តើមចោលកាន់កាប់កោះរបស់ចិនឆ្នាំ ១៩៦០ ក្រោយពេលដែលគេប្រទះឃើញប្រេងប៉ុណ្ណោះ។
លោកបានសង្កត់ធ្ងន់ថា ការផ្លាស់ប្តូរគោលជំហររបស់ចិនក្នុងការទាមទារយកតំបន់ជម្លោះ វានឹងបង្កភាពអាម៉ាសដល់បុព្វបុរសចិនដែលប្រឹងប្រែងបន្សល់ទុកមរតកតាំងពីយូរមកហើយនេះ។
«មួយពាន់ឆ្នាំមុន ចិនជារដ្ឋដែលមានអ្នកធ្វើដំណើរតាមសមុទ្របានឆ្ងាយជាងគេ ហើយជាការពិតដែលចិនជារដ្ឋដំបូងបំផុតដែលរកឃើញ និងគ្រប់គ្រងកោះ Nansha »។ រដ្ឋមន្ត្រីការបរទេសចិនបាននិយាយដូច្នេះដោយប្រើប្រាស់ភាសាចិន សម្គាល់កោះ Spratly ។ លោកបានបន្ថែមផងដែរថា ចិនមិនបន្ថែមការទាមទាររបស់ខ្លួនដែលមានតាំងពីយូរមកហើយឡើយ ហើយចិនក៏មិនបន្ថយការទាមទារដូចគ្នា ព្រោះបើចិនហ៊ានផ្លាស់ប្តូររដ្ឋាភិបាលចិនបច្ចុប្បន្នគ្មានមុខអ្វីប្រឈមជាមួយបុព្វបុសឡើយ។ ហើយអ្វីដែលធ្ងន់ធ្ងរ បើសិនជារដ្ឋាភិបាលមិនអាចតតាំងជាមួយការបំពារបំពានអធិតេយ្យរបស់ខ្លួននាពេលបច្ចុប្បន្ន ចិនក៏រឹតតែគ្មានមុខអ្វីដើម្បីប្រឈមជាមួយកូនចៅជំនាន់ក្រោយដូចគ្នា។
សូមរម្លឹកបន្តិចថា ប៉ុន្មានឆ្នាំចុងក្រោយ មហាអំណាចចិនកាន់តែសកម្មក្នុងការទាមទារយកដែនទឹកក្នុងសមុទ្រចិនខាងត្បូង រហូរដល់បង្កឲ្យមានភាពតានតឹងនិងមានការប៉ះទង្គិចគ្នាផងនៅក្បែតំបន់ជម្លោះ។ បច្ចុប្បន្ននេះក្រុងប៉េកាំងបានបន្តសកម្មភាពសាងសង់កោះសិប្បនិម្មិតនៅក្បែរប្រជុំកោះដែលបណ្តារដ្ឋដទៃទៀតជាភាគីជម្លោះកំពុងតែទាមទារដែរនោះ។
ប្រទេសភាគីជម្លោះដូចជាហ្វីលីពីន និងវៀតណាមបណ្តាថ្កោលទោស និងឡាំប៉ាខឹងចិនថារំលោភយកដែនទឹកដោយអាងខ្លួនខ្លាំង។ ហ្វីលីពីន ក្រៅពីមានអាមេរិកជាខ្នងបង្អែកហើយនោះ រដ្ឋអាស៊ានមួយនេះបានអូសទាញជប៉ុនឲ្យមកពាក់ព័ន្ធបញ្ហាជម្លោះនេះថែមទៀត។ កាលពីថ្មីៗនេះដែរលមន្ត្រីការទូតក្រុងវ៉ាស៊ីនតោនពីររូបបានប្រដូចសកម្មភាពចិននៅសមុទ្រចិនខាងត្បូង ទៅនឹងសកម្មភាពរុស្ស៊ីនៅតំបន់ភាគខាងកើតអ៊ុយក្រែន ប៉ុន្តែចិនមិនទាន់តបតឬបង្ហាញប្រតិកម្មអ្វីតបវិញឡើយ៕
Tag:
សមុទ្រចិនខាងត្បូង
ចិន
© រក្សាសិទ្ធិដោយ thmeythmey.com