សង្គមអន្តរជាតិ
អន្តរជាតិ
ក្រុងបាងកក អាចលិចបាត់ក្រោមទឹក២០ឆ្នាំខាងមុខ
× របាយការណ៍គណកម្មការកំណែទម្រង់ថៃដែលទើបបោះពុម្ពផ្សាយកាលពីថ្មីៗនេះបង្ហាញច្បាស់ថា រាជធានីបាងកក អាចនឹង លិច បាត់ក្រោមទឹកនៅក្នុងរយៈពេល ២ទសវត្សខាងមុខនេះ។ យោងតាមរបាយការណ៍នេះ គ្រោះមហន្តរាយទីក្រុងលិចក្រោមទឹក បណ្តាលមកពីការកើនឡើងកម្ពស់ទឹកសមុទ្រនិងការរីកដុះដាលនៃសំណង់ធំៗឥតឈប់ឈរ។ គណកម្មការនេះក៏អំពាវនាវឲ្យរដ្ឋាភិបាលនិងអាជ្ញាធរពាក់ព័ន្ធចាត់វិធានការឲ្យឆាប់ដើម្បីទប់ស្កាត់គ្រោះមហន្តរាយនេះដែរ។
ស្តាប់សំឡេង
រាជធានីបាងកក ប្រទេសថៃអាចនឹងលិចបាត់កប់ក្រោមទឹក ក្នុងរយៈពេល២០ឆ្នាំខាងមុខនេះ ។នេះបើយោងតាមរបាយការណ៍ស្រាវជ្រាវរបស់គណកម្មការកំណែទម្រង់ថៃ ដែលទើបបោះពុម្ពផ្សាយកាលពីពេលថ្មីៗកន្លងទៅនេះ។ ប្រជាជនថៃគ្រប់គ្នាហាក់ដូចជាមានការបារម្ភខ្លាំងដែរ ចំណោះការវាយតម្លៃថា ទីក្រុងបាងកកនឹងលិចក្រោមទឹកនៅពេលខាងមុខនេះ។
របាយការណ៍ថ្មីបានបញ្ជាក់ច្បាស់ថា មូលហេតុចម្បងដែលនាំឲ្យបាងកក លិចកប់ក្រោមទឹកនាពេលអនាគតដ៏ខ្លី គឺមានការអភិវឌ្ឍន៍ឥតឈប់ឈរដោយមានសំណង់ធំៗរីកដុះដាលរហ័ស និងការកើនឡើងនៃកម្រិតកម្ពស់ទឹកសមុទ្ររៀងរាល់ឆ្នាំដោយសារតែការកើនកម្តៅផែនដីផងដែរ។
ក្រៅពីបញ្ជាក់ពីមូលហេតុដែលបង្កឲ្យគ្រោះមហន្តរាយកើតឡើង របាយការណ៍ដដែល ក៏បានស្នើឲ្យរដ្ឋាភិបាលនិងអាជ្ញាធរពាក់ព័ន្ធចាត់វិធានការចាំបាច់និងបន្ទាន់មួយដើម្បីដោះស្រាយ និងទប់ស្កាត់កុំឲ្យក្រុងបាងកកលិចបាត់ក្រោមទឹក។ វិធានការដែលប្រសើរជាងគេដែលគណកម្មការនេះស្នើឡើងគឺ បង្កើនការគ្រប់គ្រងប្រភពទឹកក្រោមដី និងធ្វើយ៉ាងណារក្សាទម្ងន់សំណង់ដោយកែទម្រង់ការអភិវឌ្ឍន៍ទីក្រុងជាដើម។ ប៉ុន្តែបញ្ហាដែលចោទ ក្នុងការអនុវត្តគម្រោងនេះឲ្យជោគជ័យ ចាំបាច់ត្រូវប្រើប្រាស់ទឹកប្រាក់ជាង ១៤ពាន់លានដុល្លារអាមេរិកឯណោះ។
គណកម្មការកំណែទម្រង់ជាតិថៃ បានជំរុញឲ្យរដ្ឋាភិបាលបង្កើតគណកម្មការជំនាញថ្នាក់ជាតិដើម្បីគ្រប់គ្រងបញ្ហានានា ជាពិសេសការស្រុតដីដែលមានកំណត់ក្នុងរបាយការណ៍នៅក្នុងក្រុមបាងកកតែម្តង។ បច្ចុប្បន្នអាគារខ្ពស់ចាប់ពី២០ជាន់ឡើង រួមជាមួយការអភិវឌ្ឍន៍រោងចក្រឧស្សាហកម្ម នៅក្នុងទីក្រុងបាងកកសុទ្ធតែរួមចំណែកធ្វើឲ្យមានការបាក់ស្រុតដីផងដែរ។ ក្រៅពីនេះកំណើនហេដ្ឋារចនាសម្ព័ន្ធធំៗ និងខ្ពស់ ក៏ជួយបន្ថែមទម្ងន់ និងធ្វើឲ្យបាងកកស្រុតចុះក្រោមយ៉ាងរហ័សដូចគ្នា។
ដោយឡែកអ្នកជំនាញធនធានទឹកបានផ្តល់យោបល់ជុំវិញការកើនឡើងនៃកម្រិតទឹកសមុទ្រនាពេលបច្ចុប្បន្នថា បាងកកស្ថិតនៅរយៈកម្ពស់ចន្លោះពី ០.៥ ទៅ២ម៉ែត្រខ្ពស់ជាងកម្រិតទឹកសមុទ្រប៉ុណ្ណោះ។ ប៉ុន្តែបើនិយាយពីការស្រុតចុះវិញ បាងកកស្រុតបន្តិចម្តងៗរហូតដល់កម្រិត១០មីលីម៉ែត្រ ក្នុងមួយឆ្នាំៗ ៕
© រក្សាសិទ្ធិដោយ thmeythmey.com