សង្គមអន្តរជាតិ
អន្តរជាតិ
អេស្ប៉ាញបញ្ចេញភ្នាក់ងារចារកិច្ចទៅស្វែងរកអ្នកសារព័ត៌មាន៣រូបនៅស៊ីរី
× អ្នកសារព័ត៌មានអេស្ប៉ាញ៣នាក់បានបាត់ខ្លួន នៅក្រុងអាឡេប ភាគខាងជើងស៊ីរី ជាង១០ថ្ងៃមកហើយ។ រដ្ឋាភិបាលអេស្ប៉ាញបានសម្រេចបញ្ជូនភ្នាក់ងារចារកិច្ចទៅប្រទេសដ៏គ្រោះថ្នាក់មួយនេះ ដើម្បីស្វែងរកអ្នកសារព័ត៌មានទាំង។ ក្រសួងការបរទេសអេស្ប៉ាញបានអះអាងនៅថ្ងៃពុធម្សិលមិញ ថាមិនបានទទួលដំណឹងពីក្រុមណាមួយស្តីពីការបាត់ខ្លួននេះទេ។
យោងតាមក្រសួងការបរទេសអេស្ប៉ាញ ភ្នាក់ងារចារកិច្ចជាតិកំពុងតែធ្វើសកម្មភាពស្វែងរកអ្នកសារព័ត៌មានទាំង៣នាក់ ក្នុងទឹកដីស៊ីរី។ អ្នកទាំង៣នេះគឺមាន Antonio Pampliega អាយុ៣៣ឆ្នាំ Jose Manuel Lopez អាយុ៤៤ឆ្នាំ និង Angel Sastre អាយុ៣៥ឆ្នាំ។ ពួកគេធ្លាប់បំរើការអោយសារព័ត៌មានក្នុងស្រុកជាច្រើន ដូចជា ABC និង La Razon, Cuatro, និងវិទ្យុ Onda Cero។ ត្បិតថា មិនទាន់មានក្រុមណាប្រកាសថា ចាប់ជំរិតអ្នកសារព័ត៌មានទាំង៣រូបក៏ពិតមែន ក៏រដ្ឋាភិបាលក្រុងម៉ាឌ្រីតគិតលើគ្រប់សម្មតិកម្មនៃបញ្ហានេះដែរ។
យោងតាមសាក្សីជាច្រើននាក់ដែលបានផ្តល់ព័ត៌មានអោយផ្នែកសង្កេតការណ៍សិទ្ធិមនុស្សស៊ីរី អ្នកសារព័ត៌មានទាំង៣រូប ត្រូវបានគេឃើញចុងក្រោយបង្អស់ នៅថ្ងៃ១៣កក្កដា នៅសង្កាត់ Maadi ក្រុងអាឡេប ភាគខាងជើងស៊ីរី។ ពួកគេបានបើកឡានកាំម្ញ៉ុងតូចមួយ ពណ៌ស ហើយត្រូវបានបុរសមួយក្រុមនាំចេញទៅ។
រដ្ឋមន្ត្រីការបរទេសអេស្ប៉ាញ Jose Manuel Garcia Margalloបានទាក់ទងជាប្រចាំ ទៅស្ថានទូតអេស្ប៉ាញក្នុងទឹកដីតួកគី ដែលកំពុងត្រួតពិនិត្យប្រតិបត្តិការតាមរកអ្នកសារព័ត៌មាន។ រដ្ឋាភិបាលអេស្ប៉ាញមិនចង់អោយប្រតិបត្តិការស្វែងរកនេះ ត្រូវចុះផ្សាយគគ្រឹកគគ្រេងទេ។
គិតពីពាក់កណ្តាលឆ្នាំ២០១២មក ក្រុងអាឡេបភាគខាងជើង ត្រូវបានបែងចែកគ្នា កាន់កាប់រវាងក្រុមឧទ្ទាមនិងកងទ័ពស៊ីរី។ សង្គ្រាមស៊ីរីជាង៤ឆ្នាំមកនេះបានសម្លាប់មនុស្សជាង២៣០ ០០០នាក់។ ក្នុងសមរភូមិ កងទ័ពរដ្ឋាភិបាល ក្រុមកៀឌីស្តង់ និងក្រុមជីហាត បានប្រយុទ្ធគ្នាឥតឈប់ឈរ។ យោងតាមអង្គការអ្នកសារព័ត៌មានគ្មានព្រំដែន អ្នកសារព័ត៌មានយ៉ាងហោច៤៤នាក់ ត្រូវបានសម្លាប់ តាំងពីឆ្នាំ២០១១មក។ កាលពីខែកញ្ញា ឆ្នាំ២០១១ អ្នកសារព័ត៌មានអេស្ប៉ាញ៣នាក់ផ្សេងទៀតត្រូវបានគេចាប់ជំរិត ប៉ុន្តែ ត្រូវបានដោះលែងមកវិញ ក្នុងខែមិនាឆ្នាំ២០១៤៕
© រក្សាសិទ្ធិដោយ thmeythmey.com