ជាតិ
ក្រោយបានប្លង់ យាយម៉ាមីឈប់តវ៉ា?
×
សកម្មជនដីធ្លីសហគមន៍បឹងកក់ លោកស្រី ង៉ែត ឃុន ហៅយាយ ម៉ាមី បានទទួលប័ណ្ណកម្មសិទ្ធិកាន់កាប់ដីធ្លី ពីលោក គួច ចំរើន អភិបាលខណ្ឌដូនពេញ កាលពីព្រឹកថ្ងៃទី២៨ កក្កដានេះ។ លោកស្រី ង៉ែត ឃុន អះអាងថា ខ្លួននៅតែគាំទ្រសកម្មភាពតវ៉ារបស់អ្នករងគ្រោះដោយសារជម្លោះដីធ្លីដដែល តែមិនចេញមុខតវ៉ាលេចធ្លោជាងគេដូចមុននោះទេ។
សកម្មជនជម្លោះដីធ្លីសហគមន៍បឹងកក់ ដែលតែងតែចេញមុខតវ៉ាលេចធ្លោមួយរូប គឺលោកស្រី ង៉ែត ឃុន បានបង្ហាញអារម្មណ៍ត្រេកអរយ៉ាងខ្លាំង ក្រោយពីបានទទួលប័ណ្ណកម្មសិទ្ធិកាន់កាប់ដីធ្លីទំហំក្បាលដី ៨ ម៉ែត្រ គុណនឹង ១៨ ម៉ែត្រ ស្មើនឹង ១៤៤ ម៉ែត្រការ៉េ នៅតំបន់បឹងកក់។ ថ្លែងប្រាប់សារព័ត៌មានថ្មីៗ ស្ត្រីវ័យជាង៧០ឆ្នាំរូបនេះ បានបញ្ជាក់ថា ការលះបង់កំលាំងកាយចិត្តក្នុងការតវ៉ារហូតដល់មានការរងរបួស និងចាប់ឃុំក្នុងពន្ធនាគារ ពីសំណាក់សមត្ថកិច្ច គឺមិនធ្វើឲ្យលោកស្រី អស់សង្ឃឹមនោះឡើយ ។ «ខ្ញុំបានទទួលប័ណ្ណកាន់កាប់ដីធ្លី គឺដោយសារតែការខិតខំតវ៉ារបស់ខ្ញុំកន្លងមក ទោះជាត្រូវគេវាយបែកក្បាល២ដង និងចាប់ដាក់គុក២ដង»។
នេះជាការលើកឡើងរបស់លោកស្រី ង៉ែត ឃុន ដែលបានចំណាយពេលតវ៉ាជាច្រើនឆ្នាំមកនេះបានបន្ថែមយ៉ាងដូច្នេះថា៖«ខ្ញុំនៅតែគាំទ្ររកភាពយុត្តិធម៌ លើកទឹកចិត្តអ្នករងគ្រោះតវ៉ាដីធ្លី ប្រាប់បទពិសោធន៍ និងជំរុញឲ្យពួកគាត់ប្រឹងប្រែងតស៊ូទាមទារដីធ្លីពួកគេវិញ តែខ្ញុំនឹងមិនចេញតវ៉ាជាងគេដូចមុនទៀតនោះទេ ព្រោះទុកឲ្យពួកគេជាអ្នកចេញមុខខ្លាំងម្ដង»។
លោក គួច ចំរើន អភិបាល នៃគណៈអភិបាលខណ្ឌដូនពេញ និងលោក ហុក ហួលឹម នាយកទីចាត់ការច្បាប់ និងសិទ្ធិមនុស្សប្រចាំនៅសាលារាជធានីភ្នំពេញ បានចុះទៅចែកប័ណ្ណកម្មសិទ្ធិជូនលោកស្រី ង៉ែត ឃុន និងលោកស្រី គឹម វណ្ណី ប្រជាពលរដ្ឋរស់នៅក្នុងតំបន់បឹងកក់តាមគោលនយោបាយអភិវឌ្ឍន៍នៅនឹងកន្លែង របស់សាលារាជធានីភ្នំពេញ៕
© រក្សាសិទ្ធិដោយ thmeythmey.com