អន្តរជាតិ
លីប៊ីកាត់ទោសប្រហារប្រជីវិតកូនប្រុសមេដឹកនាំផ្តាច់ការហ្គាដាហ្វីខណៈប្រទេសអស្ថេរភាព
× តុលាការលីប៊ីបានសម្រេចកាត់ទោសលោកសេហ្វអាល់អ៊ីស្លាម (Saif al-Islam)ដែលកូនប្រុសដ៏មានឥទ្ធិពលរបស់លោកមូអាមម៉ាហ្គាដាហ្វីដោយបាញ់នឹងកាំភ្លើង។ការកាត់ទោសនេះត្រូវបានគេជឿជាក់ថានឹងបន្ថែមបន្ទុកទៅលើលីប៊ីខណៈប្រទេសមិនទាន់មានរដ្ឋាភិបាលមួយពិតប្រាកដ។
លោក មុំ ពិទូរ្យ លម្អិតព័ត៌មាននេះ
ម្សិលមិញតុលាការលីប៊ីបានសម្រេចកាត់ទោសប្រហារជីវិតកំបាំងមុខលោកសេហ្វអាល់អ៊ីស្លាមដែលជាតួអង្គដ៏សំខាន់នៅក្នុងនយោបាយលីប៊ីនិងជាកូនប្រុសដ៏មានឥទ្ធិពលរបស់លោកមូអាមម៉ាហ្គាដាហ្វីដោយបាញ់នឹងកាំភ្លើង។ ការកាត់ទោសនេះក៏រាប់បញ្ចូលជាមួយនឹងមន្ត្រីជាន់ខ្ពស់មួយចំនួនរបស់មេដឹកនាំផ្តាច់ការលោកហ្គាដាហ្វីដែលត្រូវបានស្លាប់ក្នុងពេលប្រយុទ្ធតទល់ជាមួយទាហានអន្តរជាតិឆ្នាំ២០១។
លោកសេហ្វអាល់អ៊ីស្លាម ដែលជាកូនប្រុសទី២របស់លោកហ្គាដាហ្វីត្រូវបានគេស្គាល់ថាតួអង្គដ៏សំខាន់នៅក្នុងរបបគ្រប់គ្រងផ្តាច់ការបួនទស្សវត្សន៍របស់លោកហ្គាដាហ្វី។ លោកត្រូវបានតុលាការកាត់ទោសកំបាំងមុខពីបទឧក្រិដ្ឋកម្មសង្គ្រាមនិងការបង្ក្រាបទៅលើតវ៉ាដោយសន្តិភាពរបស់ក្រុមបាតុករនៅក្នុងឆ្នាំ២០១។
ជុំវិញនៃការអវត្តមានរបស់ជនជាប់ចោទដែលជាហេតុនាំឲ្យតុលាការត្រូវកាត់ទោសលោកអាល់អ៊ីស្លាមក៏ព្រោះតែលោកកំពុងស្ថិតនៅជាមួយនឹងក្រុមឧទ្ទាម នៅក្នុងក្រុងZintanដែលជាក្រុមឧទ្ទាមធ្លាប់រងនូវការវាយប្រហារពីកងកម្លាំងរបស់ហ្គាដាហ្វី។ យោងតាមការបញ្ជាក់រវាងក្រុមនេះជាមួយនិងពត៌មានBBC ក្រុមឧទ្ទាមនឹងមិនបញ្ជូនលោកអាល់អ៊ីស្លាមទៅកាន់តុលាការនោះទេហើយពួកគេក៏មិនសម្លាប់លោកអាល់អ៊ីស្លាមនោះដែរ។ យ៉ាងណាក៏ដោយជនជាប់ចោទដែលរួមបញ្ចូលទាំងកូនប្រុសលោកហ្គាដាហ្វីនិងមន្ត្រីជាន់ខ្ពស់ផ្សេងទៀតនៅមានសិទ្ធិប្តឹងជំទាស់នៅក្នុងរយៈពេល៦០ថ្ងៃ។
សម្រាប់ការកាត់ទោសនេះដែរ ត្រូវបានគេជឿជាក់ថាមិនមែនជាយុទ្ធសាស្ត្រមួយដ៏ល្អដើម្បីស្តារសន្តិសុខនិងផ្សះផ្សារជាតិរបស់លីប៊ីឡើងវិញនោះទេ។ នោះក៏ព្រោះតែសាលក្រមនេះនឹងធ្វើឲ្យមានចលនាបះបោរពីក្រុមឧទ្ទាមនិងអ្នកគាំទ្ររបស់លោកហ្គាដាហ្វីប្រឆាំងទៅនឹងតុលាការនិងរដ្ឋាភិបាលក្រុងទ្រីប៉ូលីដែរនោះ។ បន្ថែមពីនេះភា្នក់ងារសិទ្ធិមនុស្សអង្គការសហប្រជាជាតិក៏បានរិះគន់និងទាមទារឲ្យមានតម្លាភាពនិងយុត្តិធម៌នៅក្នុងការជំនុំជម្រះផងដែរ។
គួរបញ្ជាក់ដែរថា ក្រោយពីទាហានអន្តរជាតិចូលអន្តរាគមន៍និងបានផ្តួលរំលំរបបផ្តាច់ការរបស់ហ្គាដាហ្វីក្នុងឆ្នាំ២០១១លីប៊ីទាំងមូលមិនទាន់ទទួលបាននូវស្ថេរភាពនិងសន្តិសុខនៅឡើយទេ។ មកដល់បច្ចប្បន្នប្រទេសនេះមិនមានរដ្ឋាភិបាលមួយពិតប្រាកដគ្រប់គ្រងនោះដែរ ពោលគឺប្រទេសទាំងមូលត្រូវបានបែងចែកជាតំបន់គ្រប់គ្រងផ្សេងៗគ្នាដោយក្រុមឧទ្ទាម៕
© រក្សាសិទ្ធិដោយ thmeythmey.com