ប្រធានាធិបតីហ្វីលីពីន Benigno Aquino ថ្លែងសន្ទរកថា អួតស្នាដៃ មុនពេលផុតអាណត្តិដឹកនាំ

អន្តរជាតិ

ប្រធានាធិបតីហ្វីលីពីន Benigno Aquino ថ្លែងសន្ទរកថា អួតស្នាដៃ មុនពេលផុតអាណត្តិដឹកនាំ

30, Jul 2015 , 6:59 pm

រូបភាព

ដោយ: ថ្មីៗ

នៅថ្ងៃចន្ទ កន្លងទៅ ប្រធានាធិបតីហ្វីលីពីន បេនីណូ អាគីណូ បានធ្វើសន្ទរកថាទៅកាន់ប្រជាជនទូទាំងប្រទេស មុននឹងលោកត្រូវផុតអាណត្តិដឹកនាំ នៅខែមិថុនា ឆ្នាំ២០១។ ស្របពេលជាមួយគ្នា នៅក្រុងម៉ានីល ក៏មានបាតុកររាប់ពាន់នាក់នាំគ្នាតវ៉ាប្រឆាំងលោកអាគីណូដែរ។ បាតុកម្មបានបង្កទៅជាការប៉ះទង្គិចជាមួយប៉ូលិស។

លោក អាគីណូ បានថ្លែងសន្ទរកថា ទៅកាន់ប្រជាជនទូទាំងហ្វីលីពីន នៅថ្ងៃចន្ទដើមសប្តាហ៍នេះ សបង្ហាញថា លោកបានត្រៀមខ្លួនចុះពីអំណាច នៅពេលលោកផុតអាណត្តិដឹកនាំនៅខែមិថុនា ឆ្នាំក្រោយ។ លោកអាគីណូ បានជាប់ឆ្នោតជាប្រធានាធីបតី តាំងពីឆ្នាំ២០១០ម្ល៉េះ។ លោកបានអំពាវនាវអោយមេដឹកនាំថ្មី បន្តកំណែទម្រង់ជំរុញកំណើនសេដ្ឋកិច្ចជាតិ។ នៅពីមុខសមាជិកសភា ប្រធានាធិបតីហ្វីលីពីនបានថ្លែងការពារការបង្កើតតំបន់អ្នកកាន់សាសនាអ៊ីស្លាមស្វ័យតមួយ នៅកោះមីនដាណាវ។ លោកក៏ឆ្លៀតលើកឡើងពីភាពវិជ្ជមាននៃការប្រយុទ្ធប្រឆាំងអំពើពុករលួយ និងការគេចពន្ធផងដែរ។

លទ្ធផលការងាររដ្ឋាភិបាលរបស់លោកអាគីណូពិតជាទទួលផលវិជ្ជមានច្រើន ដូចជាការអួតរបស់លោកពិតមែន។ ក្នុងអាណត្តិរបស់លោក សេដ្ឋកិច្ចហ្វីលីពីនជួបកំណើនលើស៦ភាគរយ ពីឆ្នាំ២០១២ដល់ឆ្នាំ២០១។ ទីផ្សារភាគហ៊ុនវិញក៏មានស្ថានភាពល្អ។ ខណៈកន្លងមក គេមិនសូវផ្តល់យោបល់អោយទៅរកស៊ីនៅហ្វីលីពីន ឥឡូវនេះ ហ្វីលីពីនបានក្លាយជាចំណាប់អារម្មណ៍របស់អ្នកវិនិយោគគួរអោយកត់សំគាល់។

ប៉ុន្តែ ក្រុងម៉ានីលនៅមិនទាន់បើកចំហដល់អ្នកវិនិយោគបរទេស១០០ភាគរយទេ។ តាមរយៈសន្ទរកថាជាតិ អួតស្នាដៃរដ្ឋាភិបាល កាលពីថ្ងៃចន្ទ ប្រធានាធិបតីអាគីណូប្រហែលចង់អោយអ្នកដឹកនាំអាណត្តិក្រោយរបស់ហ្វីលីពីនបើកចំហទ្វារ១០០ភាគរយដល់ការវិនិយោគបរទេសហើយ។ មុនផុតអាណត្តិដឹកនាំ ប្រជាប្រិយភាពរបស់លោកអាគីណូ មានកម្រិតខ្ពស់រហូតដល់ទៅជាង៥០ភាគរយឯណោះ៕