អន្តរជាតិ
រុស្ស៊ី-ចិន ព្រួតគ្នាធ្វើសមយុទ្ធយោធាទ្រង់ទ្រាយធំព្រមានជប៉ុន និងអាមេរិក
× មហិច្ឆតានៃការបង្កើនឥទ្ធិពលយោធា និង ការលូកដៃជ្រៅរបស់រដ្ឋាភិបាលជប៉ុននៅក្នុងតំបន់ ប៉ាស៊ីហ្វិក មិនត្រឹមតែកំពុងរងនូវការប្រឆាំងពីប្រជាជនរបស់ខ្លួននោះទេ តែមហាអំណាចពីរ កំពុងតែចេញមុខប្រតិកម្មផងដែរ។ ក្នុងនោះ រុស្ស៊ី និង ចិន បានព្រមព្រៀងគ្នាធ្វើសមយុទ្ធយោធា ទ្រង់ទ្រាយធំនៅក្នុងព្រំប្រទល់ដែនសមុទ្ររុស្ស៊ី និង ជប៉ុន។ សមយុទ្ធយោធារវាង មហាអំណាចទាំងពីរ ត្រូវបានជឿជាក់ថា គឺជាការគំរាមកំហែងមួយទៅកាន់រដ្ឋាភិបាលជប៉ុន ដែលហ៊ានចេញមុខថ្កោលទោសរដ្ឋាភិបាលក្រុងប៉េកាំងកាលពីពេលថ្មីនេះ។
សូមស្ដាប់ពត៌មានលម្អិត៖
តាមការគ្រោងទុកនៅចន្លោះថ្ងៃទី២០ និង ២៨ ខែសីហាខាងមុខនេះ រុស្ស៊ី និង ចិន នឹងរួមគ្នា ធ្វើសមយុទ្ធយោធាទ្រង់ទ្រាយធំនៅក្នុងដែនសមុទ្ររុស្ស៊ីភែតធ័រ ឌឹហ្គ្រេត (Peter the Great) ដែលមានព្រំប្រទល់ជាប់នឹងសមុទ្ររបស់ជប៉ុន។
យោងតាមអ្នកនាំក្រសួងការពារជាតិចិន លោក យ៉ាង យូជុន លំហាត់យោធានឹងត្រូវផ្តោតលើ លំហាត់ប្រឆាំងនឹងនាវាមុជទឹក និង ប្រឆាំងនាវាចម្បាំង។ ក្នុងលំហាត់យោធានេះ ភាគីរុស្ស៊ីនឹងផ្គត់ផ្គង់នាវាចម្បាំង នាវាមុជទឹក និង យន្តហោះចម្បាំង។ រីឯភាគីចិន នឹងបញ្ជូនយន្តហោះប្រដេញ នាវាប្រល័យលោក និង កប៉ាល់តូចៗផងដែរ។
លំហាត់យោធាទ្រង់ទ្រាយធំនេះ ត្រូវបានរដ្ឋាភិបាលក្រុងមូស្កូ និង ក្រុងប៉េកាំង អះអាងថា ជាសកម្មភាពនៃការរឹតចំណងទ្វេរភាគីឲ្យកាន់តែជិតស្និទ និង បង្កើនទំនុកចិត្តនៃទំនាក់ទំនង យុទ្ធសាស្ត្រទ្វេរភាគី។
អ្វីដែលគួរកត់សម្គាល់នោះ លំហាត់យោធារវាងមហាអំណាចទាំងពីរនេះ ធ្វើឡើងស្របដែលភាពតានតឹងនៅក្នុងដែនជម្លោះសមុទ្ររវាងចិន និង ជប៉ុន និង ចិនជាមួយរដ្ឋអាស៊ាន កំពុងតែប្រឈមមុខគ្នាកាន់តែខ្លាំង។ ជុំវិញបញ្ហានេះ ត្រូវបានគេរំពឹងថា គឺជាចេតនារបស់រដ្ឋាភិបាលក្រុងមូស្កូ និង ក្រុងប៉េកាំង ដើម្បីបង្ហាញសាច់ដុំទៅកាន់ជប៉ុនដែលកំពុងតែព្យាយាមបង្កើន ឥទ្ធិពលអំណាចយោធារបស់ខ្លួននៅក្នុងតំបន់ប៉ាស៊ីហ្វិក។ ជាពិសេស វាការព្រមានទៅកាន់ លោកនាយករដ្ឋស៊ីនហ្សូ អាបេ ដែលទើបតែចេញរបាយការណ៍រិះគន់រដ្ឋាភិបាលក្រុងប៉េកាំង លើការបំពានដែនសមុទ្រជម្លោះ។
ថ្វីត្បិតសមយុទ្ធយោធានេះ ធ្វើឡើងនៅក្នុងដែនអធិបតេយ្យរបស់រុស្ស៊ីមែន វត្តមានសព្វាវុធចិនជាច្រើន នឹងអាចធ្វើឲ្យហ្វីលីពីន ដែលកំពុងពង្រឹងអំណាចយោធារបស់ខ្លួន ប្រឆាំងជាមួយចិន នៅក្នុងតំបន់មានការភ័យខ្លាចផងដែរ។ មួយវិញទៀត សកម្មភាពនេះ ក៏វាយប្រហារដោយប្រយោលទៅកាន់រដ្ឋាភិបាល ក្រុងវ៉ាស៊ិនតោន ដែលត្រូវបានគេស្គាល់ថាអ្នកជួយជ្រោមជ្រែង និង ជំរុញរដ្ឋាភិបាលជប៉ុន ក្នុងការលូកដៃចូលបញ្ហានៅក្នុងតំបន់។
សូមបញ្ជាក់ផងដែរថា ភាពកាន់តែជិតស្និទ្ធរវាងរដ្ឋាភិបាលចិន និង រុស្ស៊ី លើវិស័យពាណិជ្ជកម្ម ការទូត និងយោធា គឺអាចផ្តល់នូវផលវិជ្ជមានផង និង អវិជ្ជមានផងចំពោះពិភពលោក។ សម្រាប់ផលវិជ្ជមាន កាលណាប្រទេសទាំងពីរ មានឥទ្ធិពលកាន់តែខ្លាំង នោះមហាអំណាច ផ្សេងទៀត មិនងាយនឹងចូលសង្គ្រាមជាមួយនោះទេ។ ក៏ប៉ុន្តែ ប្រសិនបើមហាអំណាចនៅតែ បន្តប្រកួតប្រជែងគ្នា នោះសន្តិសុខ និង ស្ថិរភាពពិភពលោក នឹងត្រូវរងនូវការគំរាមកំហែង៕
© រក្សាសិទ្ធិដោយ thmeythmey.com