ជាតិ
រដ្ឋមន្ត្រីការបរទេសកម្ពុជា-វៀតណាម នឹងជួបពិភាក្សាទ្វេភាគីនៅប្រទេសម៉ាឡេស៊ី
× លោក ហោ ណាំហុង រដ្ឋមន្ត្រីការបរទេស និងសហប្រតិបត្តិការអន្តរជាតិ នឹងជួបពិភាក្សាទ្វេភាគីជាមួយរដ្ឋមន្ត្រីការបរទេសវៀតណាម លោក ផាម ប៊ិញម៉ិញ នៅឯប្រទេសម៉ាឡេស៊ី។ លោក ហោ ណាំហុង នឹងស្នាក់នៅប្រទេសម៉ាឡេស៊ីរយៈពេល៤ថ្ងៃ ពីថ្ងៃទី៣ ដល់ថ្ងៃទី៦ ខែសីហានេះ ដើម្បីចូលរួមកិច្ចប្រជុំអាស៊ាន។
ក្រៅពីជួបពិភាក្សាជាមួយសមភាគីវៀតណាមរដ្ឋមន្ត្រីការបរទេសកម្ពុជា នឹងជួបពិភាក្សាជាមួយសមភាគីនៃប្រទេសចំនួន៤ទៀត មានលោក រីមប៊ីង ប៉ាតួ រដ្ឋមន្ត្រីការបរទេសប៉ាពួញូហ្គីណេ លោក វ៉ាង យី រដ្ឋមន្ត្រីការបរទេសចិន លោក ស៊ែហ្គេយ ឡារ៉ូវ រដ្ឋមន្ត្រីការបរទេសរុស្ស៊ី និងនិងលោកស្រី ជូលី ប៊ីស្សប រដ្ឋមន្ត្រីការបរទេសអូស្ត្រាលី។ នេះបើផ្អែកតាមសេចក្តីជូនព័ត៌មានរបស់ក្រសួងការបរទេសចុះថ្ងៃទី២៨ ខែកក្កដា។
បើតាមសេចក្តីជូនព័ត៌មានដដែល របៀបវារៈប្រជុំអាស៊ានមានដូចជា កិច្ចប្រជុំរដ្ឋមន្ត្រីការបរទេសអាស៊ានលើកទី៤៨ សន្និសីទក្រោយកិច្ចប្រជុំរដ្ឋមន្ត្រីការបរទេសជាមួយដៃគូសន្ទនាទាំង១០របស់អាស៊ាន កិច្ចប្រជុំរដ្ឋមន្ត្រីការបរទេសអាស៊ានបូក៣លើកទី១៦ កិច្ចប្រជុំកំពូលរដ្ឋមន្ត្រីការបរទេសអាស៊ីបូព៌ាលើកទី៥ កិច្ចប្រជុំវេទិកាតំបន់អាស៊ានលើកទី២២ កិច្ចប្រជុំគណៈកម្មការនៃតំបន់អាស៊ីអាគ្នេយ៍គ្មានអាវុធនុយក្លេអ៊ែរ និងជំនួបរវាងរដ្ឋមន្ត្រីការបទេសអាស៊ានជាមួយតំណាងគណៈកម្មការ អន្តររដ្ឋាភិបាលអាស៊ានស្តីពីសិទ្ធិមនុស្ស។
ក្រៅពីកិច្ចប្រជុំអាស៊ាន លោក ហោ ណាំហុង នឹងចូលរួមកិច្ចប្រជុំថ្នាក់រដ្ឋមន្ត្រីនៃគំនិតផ្តួចផ្តើមមេគង្គក្រោមលើកទី៨ កិច្ចប្រជុំរដ្ឋមន្ត្រីការបរទេសមេគង្គ-ជប៉ុនលើកទី៨ និងកិច្ចប្រជុំរដ្ឋមន្ត្រីការបរទេសមេគង្គ-កូរ៉េលើកទី៥ ។
លោក ហោ ណាំហុង ក៏នឹងជួបជាមួយរដ្ឋមន្ត្រីការបរទេសអាស៊ានដទៃទៀត និងជួបសម្តែងការគួរសមជាមួយ លោក ណាជិប រ៉ាហ្សាក់ នាយករដ្ឋមន្ត្រីម៉ាឡេស៊ីផងដែរ៕
© រក្សាសិទ្ធិដោយ thmeythmey.com