សង្គមអន្តរជាតិ
អន្តរជាតិ
×![]()
ដោយ: ថ្មីៗ
អាជ្ញាធរមីយ៉ាន់ម៉ា ព្រួយបារម្ភថាគ្រោះមហន្តរាយទឹកជំនន់ដែលកំពុងវាយលុកមីយ៉ាន់ម៉ាបច្ចុប្បន្នអាចនឹងបង្កជាជំងឺឆ្លងធ្ងន់ធ្ងរដល់ប្រជាជនមីយ៉ាន់ម៉ាផងនៅពេលខាងមុខ។ បញ្ហាធំបច្ចុប្បន្នក្រៅពីការរាតត្បាតនៃជំងឺឆ្លង អាជ្ញាធរមិនអាចធ្វើដំណើរទៅដល់តំបន់មួយដែលមានរស់នៅប្រជាជននោះព្រោះទឹកជំនាន់កើនខ្លាំង។ ប្រជាជនមីយ៉ាន់ម៉ាប្រហែល២សែននាក់រងគ្រោះ ក្នុងនោះមានមនុស្សជាង៥០នាក់ផងដែរបានស្លាប់ដោយសារគ្រោះមហន្តរាយនេះ។
ភ្លៀងបន្តធ្លាក់ខ្លាំងស្រោចស្រពតំបន់មួយចំនួននៅក្នុងប្រទេសមីយ៉ាន់ម៉ា ខណៈពេលដែលទឹកទន្លេបន្តកើនកម្ពស់ជន់លិចតំបន់ជាច្រើនផង។ប្រជាជនច្រើនម៉ឺននាក់ត្រូវបានគេជម្លៀសទៅកាន់ទីទួលមានសុវត្ថិភាព ហើយអាជ្ញាធរមីយ៉ាន់ម៉ាកំពុងប្រឹងប្រែងដោះស្រាយបញ្ហាប្រឈមរបស់ប្រជាជនដែលរងគ្រោះដោយសារគ្រោះមហន្តរាយទឹកជំនន់។ យោងតាមអាជ្ញាធរមីយ៉ាន់ម៉ា ប្រជាជនរងគ្រោះដោយសារទឹកជំនន់បច្ចុប្បន្នកើនឡើងដល់ ២សែននាក់ ហើយក្នុងនោះមានប្រហែល៥០នាក់ផងដែរបានស្លាប់បាត់បង់ជីវិត។ ផ្ទះសម្បែង ផ្លូវ និងស្ពានជាច្រើនរងការបំផ្លិចបំផ្លាញដោយសារគ្រោះមហន្តរាយធម្មជាតិនេះដែរ។
រដ្ឋមន្ត្រីសំណង់មីយ៉ាន់ម៉ា Kyaw Lwin បានឲ្យដឹងថា ប្រជាជនជាច្រើនបាត់បង់ទ្រព្យសម្បត្តិ ប៉ុន្តែក្រុមការងាររបស់លោកប្រឹងប្រែងដើម្បីជម្លៀសប្រជាជនទៅកាន់កន្លែងមានសុវត្ថិភាព និងផ្តល់ជម្រកសម្រាប់ពួកគាត់ស្នាក់នៅផងដែរ។ លោកសង្កត់ធ្ងន់ថា គ្រោះមហន្តរាយទឹកជំនន់បច្ចុប្បន្ននេះធ្ងន់ធ្ងរខ្លាំង ដែលមីយ៉ាន់ម៉ាមិនធ្លាប់ជួបប្រទះពីមុនឡើយ តែលោកសន្យាថា រដ្ឋាភិបាលមីយ៉ាន់ម៉ាប្រឹងប្រែងឲ្យអស់ពីសមត្ថភាពដើម្បីជួយប្រជាជនឲ្យរួចផុតពីគ្រោះថ្នាក់។
បញ្ហាប្រឈមធំបច្ចុប្បន្នគឺ ការខ្វះខាតទឹកស្អាតប្រើប្រាស់ ស្បៀងអាហារនិងសម្ភារៈប្រើប្រាស់ចាំបាច់ផង។ ហើយអាជ្ញាធរនិងក្រុមសង្គ្រោះក៏មិនអាចធ្វើដំណើរទៅកាន់តំបន់ខ្លះដែរព្រោះតែទឹកជំនន់ជនលិចខ្លាំងនិងបំផ្លាញផ្លូវអស់ជាច្រើនដែរ។ អ្នកជំនាញព្រមានថា លទ្ធភាពនៃការកើតឡើងនៃជំងឺឆ្លងព្រោះតែទឹកជំនន់នេះកើនឡើងខ្លាំង បើភ្លៀងបន្តធ្លាក់ ហើយប្រជាជនប្រឈមការខ្វះខាតទឹកស្អាតដើម្បីប្រើប្រាស់ទៀត។ នេះមានន័័យថា អាជ្ញាធរមីយ៉ាន់ម៉ាចាំបាច់ត្រូវត្រៀមលក្ខណៈ និងមធ្យោបាយនានាដើម្បទប់ស្កាត់គ្រោះមហន្តជំងឺឆ្លងនេះ ដើម្បីកាត់បន្ថយគ្រោះថ្នាក់។
បច្ចុប្បន្នរដ្ឋាភិបាលមីយ៉ាន់ម៉ា សហការជាមួយស្ថាប័នពាក់ព័ន្ធដូចជាកាកបាទក្រហមមីយ៉ាន់ម៉ា និងអង្គការសហប្រជាជាតិដើម្បីដោះស្រាយបញ្ហាប្រឈមធំៗដែលបង្កមកពីគ្រោះទឹកជំនន់នេះ។ ជុំវិញការសង្គ្រោះប្រជាជនមីយ៉ាន់ម៉ាដែលរងគ្រោះដោយសារទឹកជំនន់ ប្រធានកាកបាទក្រហមមីយ៉ាន់ម៉ាលោក Tha Hla Shwe ស្ថាប័នលោកកំពុងគិតគូថានឹងជួយផ្គត់ផ្គង់ទឹក ជាពិសេសទឹកសម្រាប់បរិភោគផងដល់ប្រជាជនដែលរងគ្រោះនៅតំបន់ដែលលិចលង់ខ្លាំង។ ប៉ុន្តែលោកលើកឡើងពីបញ្ហាមួយចំនួនព្រោះក្រុមការងារលោកខ្វះខាតទូកសម្រាប់ធ្វើដំណើរទៅកាន់តំបន់លិចជនលិច ព្រោះគេមិនអាចធ្វើដំណើរតាមរថយន្តបានឡើយ៕
Tag:
មីយ៉ាន់ម៉ា
© រក្សាសិទ្ធិដោយ thmeythmey.com
