សង្គមអន្តរជាតិ
អន្តរជាតិ
កូនទាំងបីរបស់ Michael Jackson ចាយលុយមរតកខ្ជះខ្ជាយ ដើម្បីរស់នៅដូចជាស្តេច
× កាល Michael Jackson មានជីវិតរស់នៅ គាត់មិនដែលទុកឲ្យកូនទាំងបីរស់នៅក្នុងជីវិតខ្វះខាតទេ។ គាត់បានទម្លាប់ឲ្យកូនរស់នៅក្នុងជីវភាពដ៏ប្រណីត និងចាយវាយលុយខ្ជះខ្ជាយដូចទឹកហូរ។ បើតាមតួលេខខ្ទង់ចំណាយកាលពីពីរឆ្នាំមុន ដែលផ្តល់ដោយមេធាវីរក្សាមរតករបស់អតីតតារាចម្រៀងនេះ ទាយាទទាំងបីបានចាយប្រាក់អស់ជិត ៤,៥ លានដុល្លារក្នុងមួយឆ្នាំ។
Prince អាយុ ១៨ ឆ្នាំ, Paris អាយុ ១៦ ឆ្នាំ និង Bigi អាយុ ១៣ ឆ្នាំមានជីវិតរស់នៅប្រកបដោយផាសុកភាព។ ពួកគេទាំងបីត្រូវបានចិញ្ចឹមបីបាច់ដោយជីដូន អាយុ ៨៥ ឆ្នាំ ហើយពួកគេមិនធ្លាប់ខ្វះខាតអ្វីឡើយ។ ពេលដែលឪពុកបានស្លាប់នៅឆ្នាំ ២០០៩ ឪពុករូបនេះបានបន្សល់ទុកនូវមរតកចំនួន ២៧៣ លានដុល្លារ។ ក្មេងទាំងបីត្រូវចំណាយ ៤,៥ លានក្នុងមួយឆ្នាំ ដែលមួយភាគធំបានចាយទៅលើការសិក្សា។ បងទាំងពីររៀននៅ Buckley High School ដែលគ្រាន់តែថ្លៃចុះឈ្មោះគឺត្រូវបង់ជិត ៨ ម៉ឺនដុល្លារ។ បើទោះបីជា Prince នឹងឈប់រៀននៅសាលានេះ ពេលណាដែលគេបញ្ចប់ការសិក្សាក៏ដោយ ក៏ការចំណាយមិនត្រូវបានកាត់បន្ថយដែរ ព្រោះថាប្អូនប្រុសពៅរៀននៅសាលាសម្រាប់ជនវៃឆ្លាត ដែលត្រូវចំណាយជាង ៣ ម៉ឺនដុល្លារក្នុងមួយឆ្នាំ។
ក្រៅពីការសិក្សា ពួកគេចាយលុយយ៉ាងសម្បើមដើម្បីជីវិតសុខស្រួល ដូចជាជួលផ្ទះដ៏មានផាសុកភាពដែលមានតម្លៃជាង ៤៥ ម៉ឺនដុល្លារក្នុងមួយឆ្នាំ និងប្រាក់ខែបុគ្គលិកសម្រាប់ចាំបម្រើឆ្វេងស្តាំដែលប្រហាក់ប្រហែលនឹងថ្លៃជួលផ្ទះដែរ នេះបើតាមគេហទំព័រ Femalefirst ។
ចំពោះការកម្សាន្ត ទាយាទទាំងបីតែងតែស្វែងរកនូវដំណើរកម្សាន្តប្រកបដោយប្រណីតភាពនៅជុំវិញពិភពលោក និងការចាយវាយដ៏សម្បើមសម្រាប់ប្រារព្ធពិធីខួបកំណើតជាដើម។ នៅអាយុ ៣៣ ឆ្នាំ ទាយាទទាំងនេះនឹងត្រូវទទួលបានប្រាក់ពាក់កណ្តាលនៃចំណែកមរតករបស់ខ្លួន ហើយពាក់កណ្តាលទៀត នៅអាយុ ៤០ ឆ្នាំប្រសិនបើមរតកនៅសេសសល់៕
© រក្សាសិទ្ធិដោយ thmeythmey.com