សង្គមអន្តរជាតិ
អន្តរជាតិ
ឥណ្ឌា៖ សត្វសេកពូកែជេរមួយក្បាលត្រូវនាំខ្លួនទៅប៉ុស្តិ៍ប៉ូលិស
× ប៉ូលិសនៅទីក្រុង Rajura ប្រទេសឥណ្ឌា បានចាប់ខ្លួន និងឃុំខ្លួនសត្វសេកមួយក្បាលដែលបានជេរប្រមាថលោកយាយអាយុ ៨៥ឆ្នាំម្នាក់។
នៅទីបំផុត ពាក្យបណ្តឹងរបស់លោកយាយមានប្រសិទ្ធភាពហើយ។ គាត់បានដាក់ពាក្យបណ្តឹងបីដងហើយ ក្នុងអំឡុងពេលពីរឆ្នាំចុងក្រោយនេះ ដោយសារតែមិនអាចទ្រាំនឹងពាក្យជេរប្រមាថរបស់សត្វសេកដែលចេះប្រើពាក្យអាសគ្រាមបានយ៉ាងស្ទាត់ជំនាញ។
ស្ត្រីដើមបណ្តឹងបាននិយាយថា៖ « ប៉ូលិសបានកោះហៅខ្ញុំ សត្វសេក និងម្ចាស់របស់វាទៅប៉ុស្តិ៍។ ប៉ូលិសត្រូវតែធ្វើការស៊ើបអង្កេត ហើយចាប់ខ្លួនអាសេកនោះ »។
តាមពិតទៅ វាជាជម្លោះរវាងម្តាយក្មេក និងកូនប្រសាប្រុសដែលជាម្ចាស់សេកសោះ។ តែបែរជានាំទុក្ខដល់សត្វដ៏គួរឲ្យស្រឡាញ់ទៅវិញ។ ម្តាយក្មេក និងកូនប្រសាបានម្លោះប្រកែកគ្នារឿងដីធ្លី។ ក្រោយមក បុរសជាកូនប្រសាក៏បានបង្រៀនសេករបស់ខ្លួនឲ្យជេរម្តាយក្មេក។ សត្វសេកដ៏ឆ្លាតវៃក៏ជេរប្រមាថលោកយាយមិនឈប់ឈរ នៅរាល់ពេលដែលវាឃើញស្ត្រីរូបនេះ។
ប៉ូលិសមិនអាចសួរចម្លើយសេកថា តើវាពិតជាបានជេរស្ត្រីដើមបណ្តឹងឬយ៉ាងណាទេ។ ដូច្នេះ មានតែរង់ចាំសង្កេតមើលថា តើវាពិតជាចេះជេរមែនឬទេ។ លោកអធិការប៉ូលិសនៅទីក្រុង Rajura បានប្រាប់បណ្តាញព័ត៌មានក្នុងស្រុកថា៖ « យើងបានសង្កេតមើលវាដោយយកចិត្តទុកដាក់ ប៉ុន្តែវាមិននិយាយអ្វីទាល់តែសោះ ក្រោយពីប្រឈមមុខជាមួយដើមបណ្តឹងនៅប៉ុស្តិ៍ប៉ូលិសមក »។
បើទោះបីជាគ្មានភស្តុតាងដាក់បន្ទុកលើសត្វសេកក៏ដោយ ប៉ូលិសបានសម្រេចចិត្តប្រគល់វាទៅឲ្យក្រុមអភិរក្សសត្វព្រៃ តាមការស្នើសុំរបស់ដើមបណ្តឹង៕
© រក្សាសិទ្ធិដោយ thmeythmey.com