នាយករដ្ឋមន្ត្រីរុស្ស៊ី ឌីមីទ្រី មេវេដេវ បានអញ្ជើញទៅទស្សនកិច្ចនៅប្រជុំកោះគូរីល (Kuril) កាលពីថ្ងៃសៅរ៍ម្សិលមិញនេះ។ ដំណើរទស្សនកិច្ចរបស់មន្ត្រីកំពូលរុស្ស៊ីលើកោះជម្លោះជាមួយជប៉ុនបានធ្វើឲ្យរដ្ឋាភិបាលោក ស៊ីនហ្សូអាបេ ក្តៅក្រហាយដេកមិនលក់ ចេញមុខរិះគន់រុស្ស៊ីផងដែរ។
ម្សិលមិញនេះប្រមុខរដ្ឋាភិបាលរុស្ស៊ីលោក ឌីមីទ្រី មេវេដេវ បានធ្វើដំណើរទៅកាន់កោះ Iturup ដែលជាតំបន់ទេចរណ៍ល្បីល្បាញ់ស្ថិតក្នុងប្រជុំកោះជាប់ជម្លោះជាមួយជប៉ុន គូរីល។ កោះខាងលើស្ថិតនៅភាគខាងជើងប្រទេសជប៉ុន និងភាគខាងកើតឆ្នេររបស់រុស្ស៊ី។ គេឃើញមេដឹកនាំរុស្ស៊ីខាងលើទៅទស្សនាទីតាំងហ្វឹកហ្វឺយោធារុស្ស៊ីនៅលើកោះ ផងដែរ។ ប៉ុន្តែរឿងមិនអាចចៀសផុតគឺ វត្តមានមន្ត្រីកំពូលរដ្ឋាភិបាលក្រេមឡាំងបានធ្វើឲ្យជប៉ុនក្តៅក្រហាយខ្លាំងមែនទែន។
ដំណើរទស្សនកិច្ចរបស់លោក មេវេដេវ បានបង្ខំឲ្យរដ្ឋមន្ត្រីការបរទេសជប៉ុន លោក Fumio Kishida ពន្យារពេលទស្សនកិច្ចនៅរុស្ស៊ីប៉ុន្មានសប្តាហ៍ខាងមុខដែលបានគ្រោងទុកមកជាយូរមកហើយនោះ។ ប្រភពរដ្ឋាភិបាលជប៉ុនបានបញ្ជាក់ថា ប្រមុខការទូតជប៉ុនត្រៀមលក្ខណៈដើម្បីជួបប្រធានាធិបតីរុស្ស៊ីលោក វ្ល៉ាឌីមៀពូទីន ដើម្បីជជែកពិភាក្សាបញ្ហាជម្លោះដែនកោះដែលអូសបន្លាយមកអស់ពេលជាយូរជាង៧ទសវត្សមកហើយនោះ។ ការជជែកពិភាក្សាដើម្បីដោះស្រាយជម្លោះចេះតែប្រឈមឧបសគ្គ ហើយភាគីទាំងពីរចេះតែបន្តពន្យារពេលរហូតដល់ពេលបច្ចុប្បន្ន។ កោះទាំងប៉ុន្មានដែលប្រទេសជិតខាងទាំងពីរដណ្តើមគ្នានោះ ដើមឡើយត្រូវជប៉ុនកាន់កាប់ ប៉ុន្តែក្រោយជប៉ុនចាញ់សង្គ្រាមលោកលើកទី២ សហភាពសូវៀតដណ្តើមមកកាន់កាប់វិញ ។
កន្លងមកដោយសារតែជម្លោះដែនកោះនេះបានធ្វើឲ្យជប៉ុននិងរុស្ស៊ីប្រឈមមុខដាក់គ្នា ហើយជម្លោះនេះទៀតសោតរារាំងភាគីទាំងពីរមិនឲ្យបង្កើតកិច្ចព្រមព្រៀងសន្តិភាពតាំងពីក្រោយសង្គ្រាមលោកលើកទីពីរមកម្ល៉េះនោះ។
ក្រៅពីប្រកាសពន្យារដំណើរទស្សនកិច្ចរបស់រដ្ឋមន្ត្រីការបរទេសខាងលើ ជប៉ុនក៏កោះហោះឯកអគ្គរដ្ឋទូតរុស្ស៊ីប្រចាំប្រទេសជប៉ុនដើម្បីសួរនាំនិងបង្ហាញការតវ៉ារឿងដំណើរទស្សនកិច្ចទៅកាន់កោះជម្លោះនេះដែរ។ Hajime Hayashi ប្រធានផ្នែកកិច្ចការអឺរ៉ុបនៃក្រសួងការបរទេសជប៉ុនបានថ្លែងថា សកម្មភាពរបស់រុស្ស៊ីនៅពេលនេះនៅលើទឹកដីភាគខាងជើង (ជប៉ុនហៅបែបនេះ) វាផ្ទុយស្រឡះពីឆន្ទៈរបស់ជប៉ុនក្នុងការដោះស្រាយបញ្ហាជម្លោះ និងធ្វើឲ្យប្រជាជនជប៉ុនឈឺចាប់ជាខ្លាំង។ លោកបានបន្ថែមថា លោកពិតជាសោកស្តាយជាខ្លាំងដែលរុស្ស៊ីបន្តធ្វើសកម្មភាពយ៉ាងគឃ្លើននៅលើកោះដែលកំពុងមានជម្លោះនេះ។
យ៉ាងណាក៏ដោយចុះនាយរដ្ឋមន្ត្រីរុស្ស៊ីបានទាត់ចោលការរិះគន់និងព្រួយបារម្ភរបស់ជប៉ុន ដោយលោកបញ្ជាក់ថាលោកនឹងបន្តទៅទស្សនកិច្ចនៅលើកោះគួរី នេះទៀតនៅពេលខាងមុខ។ លោកបានសង្កត់ធ្ងន់ថា៖« យើងចង់ធ្វើជាមិត្តជាមួយជប៉ុន ហើយជប៉ុនជាមិត្តជិតខាងរបស់យើង។ ប៉ុន្តែវាគ្មានទាស់ខុសអ្វីគ្រាន់ទៅទស្សនកិច្ចនៅកោះ គូរីលដែលជាកោះរបស់រុស្ស៊ីនិងស្ថិតក្នុងអធិបតេយ្យរបស់រុស្ស៊ីក្នុងតំបន់ Sakhalin (រុស្ស៊ីដាក់ឈ្មោះបែបនេះ)»។
តាមពិតទៅកន្លងមករុស្ស៊ីរៀបចំសេចក្តីព្រៀងគម្រោងអភិវឌ្ឍន៍កោះគូរីលដែលជាប់ជម្លោះជាមួយជប៉ុនរយៈពេល១០ឆ្នាំ ចាប់ផ្តើមពីឆ្នាំ ២០១៦ដល់ឆ្នាំ ២០២៥ឯណោះ។ គម្រោងថ្មីជាគម្រោងរបស់រដ្ឋាភិបាលសហព័ន្ធ ហើយវាកំពុងស្ថិតក្រោមការសិក្សានៅឡើយ។ រុស្ស៊ីប្រហែលជាត្រូវចំណាយថវិកាសរុបរហូតដល់ ១.២២ពាន់លានដុលា្លរដើម្បីសម្រេចគម្រោងរយៈពេល១០ឆ្នាំ។ គេមិនទាន់ដឹងច្បាស់នៅឡើយទេ ថាផែនការរយៈពេល១០ឆ្នាំរបស់រុស្ស៊ីដើម្បីអភិវឌ្ឍប្រជុំកោះនេះ មានអ្វីខ្លះទេ ប៉ុន្តែវាមិនមានអ្វីក្រៅពីការសាងសង់សំណង់ និងហេដ្ឋារចនាសម្ព័ន្ធជាដើមផង។
ក្រៅពីផ្តោតលើការអភិវឌ្ឍន៍កោះ ដោយសាងសង់សំណង់ ហេដ្ឋារចនាសម្ព័ន្ធ រដ្ឋាភិបាលក្រុងម៉ូស្គូក៏ព្យាយាមបង្កើនសមត្ថភាពយោធារបស់កងទ័ពដែលកំពុងកាន់កាប់កោះជម្លោះនេះ។ ជាពិសេសក្រោយរុស្ស៊ីក្រសោបយកឧបទ្វីប Crimea ពីអ៊ុយក្រែន រុស្ស៊ីចាប់ផ្តើមធ្វើទំនើបកម្មកងទ័ពនៅកោះ និង បញ្ជូនសព្វាវុធច្រើនសន្ធឹកសន្ធាប់ទៅកាន់កោះនេះផងដែរ។ តាមពិតទៅ រុស្ស៊ីខឹងជប៉ុន ដែលហ៊ានដាក់ទណ្ឌកម្មប្រឆាំងខ្លួន ក្រោយជម្លោះអ៊ុយក្រែនកើតឡើងក្នុងពីខែមិនាឆ្នាំ២០១៤ កន្លងទៅ។
សូមបញ្ជាក់ថា ប្រទេសទាំងពីរកន្លងមកធ្លាប់ព្យាយាមស្តារចំណងការទូត កិច្ចសហប្រតិបត្តិការផ្នែកសន្តិសុខ នយោបាយ និងសេដ្ឋកិច្ចផងដែរ។ ឆន្ទៈស្តារទំនាក់ទំនងប្រទេសទាំងពីរ ស្តែងឡើងតាមដំណើរទស្សនកិច្ចរបស់លោកស៊ីនហ្សូ អាបេ កាលពីឆ្នាំ ២០១៣ ទៅកាន់ប្រទេសរុស្ស៊ី៕