ជាតិ
ពីនេះ ពីនោះ
នយោបាយជាតិ
គណបក្សនយោបាយថ្មីបង្កើតច្រើនធ្វើអោយ CPP សប្បាយផង និងភ័យផង…
× ការបោះឆ្នោតឃុំសង្កាត់ឆ្នាំ២០១៧ និងការបោះឆ្នោតជាតិឆ្នាំ២០១៨ខាងមុខមិនទាន់មកដល់មែន។ ប៉ុន្តែ គណបក្សនយោបាយជាប់ឆ្នោតទាំងពីរ គឺគណបក្សប្រជាជនកម្ពុជា និងគណបក្សសង្គ្រោះជាតិ បានចាប់ផ្តើមធ្វើសកម្មភាពនយោបាយរបស់ខ្លួនយ៉ាងសស្រាក់សស្រាំរួចទៅហើយ ផ្ទុយពីអាណត្តិមុនៗដែលបក្សនយោបាយចាប់ផ្តើមរកសំឡេងឆ្នោតតែក្នុងអំឡុងពេល៦ខែមុនការបោះឆ្នោតប៉ុណ្ណោះ។ មិនត្រឹមតែប៉ុណ្ណោះ គណបក្សបង្កើតថ្មីក៏មានច្រើនដែរ។ គណបក្សថ្មីទាំងនោះ ជារួមមាន៖ គណបក្សប្រជាធិបតេយ្យមូលដ្ឋានរបស់លោក យ៉ង សាំងកុមារ នាយកអង្គការសេដាក់, គណបក្សសំបុកឃ្មុំសង្គមប្រជាធិបតេយ្យរបស់លោក ម៉ម សូណង់ដូ, គណបក្សខ្មែរសាមគ្គី របស់លោកអ្នកស្រី ឡាក់ សុភាព, គណបក្សអំណាចពលរដ្ឋខ្មែរ របស់លោក សួន សេរីរដ្ឋា, និងអាចមានគណបក្សតូចផ្សេងៗទៀត។
គិតមួយភ្លែត គេអាចនិយាយបានថា បក្សតូចៗបង្កើតឡើងថ្មីនេះ អាចបំបែកសំឡេងគណបក្សសង្គ្រោះជាតិ ពីព្រោះ អ្នកគាំទ្រគណបក្សតូចៗទាំងនោះ ភាគច្រើនខឹងសម្បារជាមួយគណបក្សសង្គ្រោះជាតិដែលមិនបានគោរពពាក្យសន្យារបស់ខ្លួន។
ជាក្រិត្យក្រមសត្យានុម័ត ប្រសិនបើគណបក្សតូចៗទាំងនេះស្ថិតនៅដាច់ និងបែកពីគ្នាយ៉ាងនេះគណបក្សតូចៗពិតជាអាចបំបែកសំឡេងគណបក្សសង្គ្រោះជាតិមែន ហើយវាអនុញ្ញាតអោយគណបក្សប្រជាជនកម្ពុជាឈ្នះឆ្នោតយ៉ាងស្រួលនៅឆ្នាំ២០១៧ និង២០១៨ ។ ប៉ុន្តែ នយោបាយគេមិនអាចទស្សន៍ទាយជាមុនបានឡើយ មានន័យថា ចៃដន្យ គណបក្សតូចៗទាំងនោះ មកចងជាសម្ព័ន្ធ ឬរំលាយបញ្ចូលគ្នាដោយល័ក្ខខ័ណ្ឌណាមួយជាមួយគណបក្សសង្គ្រោះជាតិ មុនពេលបោះឆ្នោតនោះ នោះគណបក្សប្រឆាំងនឹងកាន់តែមានឥទ្ធិពលអាចដណ្តើមយកជោគជ័យលើបក្សប្រជាជនកម្ពុជាបាន។ ភាពចៃដន្យនេះ ធ្លាប់បានកើតឡើងរួចទៅហើយរវាងគណបក្សសិទ្ធិមនុស្ស និងគណបក្សសមរង្ស៊ី ដែលរួមគ្នាបង្កើតជាគណបក្សសង្គ្រោះជាតិមុនការបោះឆ្នោតឆ្នាំ២០១៣ ។
ភាពចៃដន្យដដែលនេះ បានធ្វើអោយគណបក្សប្រជាជនកម្ពុជាបាត់បង់សំឡេងពី៩០កៅអីនៅអាណត្តិ១៩៩៨-២០១៣ មកនៅត្រឹមតែ៦៨កៅអីប៉ុណ្ណោះសម្រាប់អាណត្តិ២០១៣-២០១៨ ។
សរុបសេចក្តីមក ស្ថានភាពគណបក្សតូចបង្កើតច្រើន អាចជាសញ្ញាអាក្រក់ផង និងល្អផងសម្រាប់គណបក្សប្រជាជនកម្ពុជាដែលបានកាន់អំណាចអស់រយៈពេលជាង៣០ឆ្នាំមកហើយនោះ៕
© រក្សាសិទ្ធិដោយ thmeythmey.com