ក្រុមបាល់ទាត់ជម្រើសជាតិកម្ពុជាក្រោមអាយុ១៦ឆ្នាំ (U-16) បានធ្វើដំណើរទៅដល់ប្រទេសសិង្ហបុរី ហើយនៅថ្ងៃច័ន្ទ ទី ៣១ ខែ សីហា ម្សិលមិញ ដើម្បីត្រៀមចូលរួមប្រកួតជម្រុះពូល H ក្នុងពានរង្វាន់បាល់ទាត់យុវជនប្រចាំទ្វីបអាស៊ី AFC U-16 Championship 2016 បន្ទាប់ពីទទួលសិទ្ធិធ្វើជាម្ចាស់ផ្ទះក្នុងវគ្គជម្រុះពានរង្វាន់យុវជនប្រចាំតំបន់អាស៊ាន AFF BIDC U-16 Championship 2015 កាលពីដើមខែសីហា កន្លងទៅ។
កាលធ្វើជាម្ចាស់ផ្ទះពាន AFF BIDC U-16 Championship ក្រុម U-16កម្ពុជាធ្លាក់ត្រឹមវគ្គជម្រុះតាមពូល បន្ទាប់ពីឈ្នះក្រុមហ្វីលីពីន ១ ទល់ ០ តែចាញ់អូស្ត្រាលី ៤ ទល់ ០ ហើយស្មើសិង្ហបុរី ០ ទល់ ០ មុនចាញ់មីយ៉ាន់ម៉ា ៣ ទល់ ០ ក្នុងប្រកួតបិទពូល B។
កាលពីថ្ងៃទី ២៧ ខែ សីហា កន្លងទៅក្រុម U-16កម្ពុជាបានធ្វើដំណើរទៅកាន់ប្រទេសម៉ាឡេស៊ី ដើម្បីប្រកួតមិត្តភាពអន្តរជាតិជាមួយក្រុមម្ចាស់ផ្ទះ ប៉ុន្តែជាលទ្ធផលត្រូវចាញ់ដោយលទ្ធផល ២ ទល់ ០ កាលពីថ្ងៃទី ២៩ ខែ សីហា កន្លងទៅនៅទីលាន Arena Stadium ក្នុងទីក្រុងកូឡាឡាំពួរ។
លោក Yusuke Iki គ្រូបង្វឹកប្រចាំសាលាបាល់ទាត់ជាតិ ត្រូវបានសហព័ន្ធកីឡាបាល់ទាត់កម្ពុជា តែងតាំងឱ្យធ្វើជាគ្រូបង្គោលសម្រាប់ដឹកនាំក្រុមកម្ពុជា ចូលរួមក្នុងពានរង្វាន់ ហើយលោក គឹម ភក្ដី និង លោក ជឿន សុភី ជាគ្រូជំនួយ ហើយលោក ប្រាក់ វណ្ណនី ជាគ្រូអ្នកចាំទី និង លោក ស្រ៊ុន សីហា ជាអ្នកបកប្រែ។
ចំពោះកីឡាករចំនួន ២៣ នាក់បានធ្វើដំណើរទៅជាមួយក្រុមមានដូចជា អាត អូនតូច, ហេង ទីណា, គង់ រ៉ាផាត, ហុល គឹមហ៊ុយ, ទេស សម្បត្តិ, យ៉េត ចិត្រា, គង់ ច័ន្ទសិរសា, យឺ សាហ្វី, រ័ត្ន ប៊ុននូ, សឿត ណាវ៉ា, ឈឿង វិស្ណុ, ទៀត គឹមហេង, សៀន សុភត្រា, ឡាត វណ្ណី, សេត ម៉ាស៊ូត, ឡូន ទេន, សួន សុភត្រា, ឡុង ម៉េងហាវ, ទុន សំឈី, សឹង្ហ កក្កដា, ត្រៃ វិចិត្រ, សាន្ត គឹមហេង, សៀង ចាន់ធា។
ចំពោះវគ្គជម្រុះ ពូល H នៃពានរង្វាន់ AFC U-16 Championship 2016 នេះ មានក្រុមចំនួន៤ គឺ កូរ៉េខាងជើង, ថៃ, កម្ពុជា និង ម្ចាស់ផ្ទះសិង្ហបុរី ដោយចាប់ប្រកួតពីថ្ងៃទី២ ដល់ ទី ៦ ខែ កញ្ញា ឆ្នាំ ២០១។ ក្រុមខ្លាំងក្នុងពូលចំនួន ២ មានឱកាសឡើងទៅលេងជុំបន្ទាប់។
ក្រុម U-16កម្ពុជា ត្រូវប្រកួតជាមួយក្រុមកូរ៉េខាងជើង នៅថ្ងៃបើកឆាកក្នុងពានរង្វាន់ប្រចាំទ្វីបនេះ ពោលគឺនៅថ្ងៃទី ២ ខែ កញ្ញា ឆ្នាំ ២០១៥ នៅកីឡដ្ឋាន Jalan Besar Stadium ក្នុងតំបន់ Kallang ប្រកួតហើយប្រកួតទី២ ក្រុមU-16 កម្ពុជា ត្រូវជួបក្រុម U-16 របស់ថៃ នៅថ្ងៃទី ៤ កញ្ញា នៅកីឡដ្ឋានដដែល និងប្រកួតចុងក្រោយ U-16កម្ពុជា ជួបក្រុម U-16សិង្ហបុរី នៅថ្ងៃទី ៦ ខែ កញ្ញា ឆ្នាំ ២០១។ នៅថ្ងៃទី ៧ ខែ កញ្ញា ក្រុមកម្ពុជានឹងត្រឡប់មកប្រទេសកំណើតវិញ។
វគ្គជម្រុះនៃពានរង្វាន់ AFC U-16 Championship 2016 មានក្រុមចូលរួមចំនួន ៤៥ ប្រទេសនិងបែងចែកជា ១១ ពូលចាប់ផ្ដើមដំណើរការប្រកួតពីថ្ងៃទី២ រហូតដល់ថ្ងៃទី២០ ខែកញ្ញា ឆ្នាំ២០១៥ ដើម្បីស្វែងរកក្រុមខ្លាំងចំនួន ១៦ ឡើងទៅលេងជុំផ្ដាច់ព្រ័ត្រដែលរៀបចំនៅប្រទេសឥណ្ឌា ឆ្នាំ ២០១៦ ខាងមុខ៕