ជាតិ
នយោបាយជាតិ
ស្ថានទូតបារាំង ជាអ្នកប្រគល់ផែនទីឲ្យរដ្ឋាភិបាលកម្ពុជា
× រដ្ឋាភិបាលបារាំងបានយល់ព្រមផ្តល់ផែនទីឲ្យរដ្ឋាភិបាលកម្ពុជាខ្ចីហើយ។ ប៉ុន្តែគ្មានមន្ត្រីនៃរដ្ឋាភិបាលបារាំងណាម្នាក់នឹងនាំយកផែនទីទាំងនោះផ្ទាល់ពីប្រទេសបារាំងមកកម្ពុជា ដូចអង្គការសហប្រជាជាតិបានធ្វើឡើយ។ គឺមន្ត្រីនៃស្ថានទូតបារាំងប្រចាំកម្ពុជាដែលនឹងប្រគល់ផែនទីទាំងនោះ ដល់គណៈកម្មការចំពោះកិច្ច ដែលដឹកនាំដោយរដ្ឋមន្ត្រីការបរទេស លោក ហោ ណាំហុង។
នៅព្រឹកថ្ងៃទី៣ខែកញ្ញា វេលាម៉ោង៩ព្រឹក នៅវិមានសន្តិភាព មន្ត្រីនៃស្ថានទូតបារាំងនៅភ្នំពេញ នឹងនាំយក ច្បាប់ចម្លងនៃផែនទីដែលបោះពុម្ពដោយ ក្រុមភូមិសាស្ត្រឥណ្ឌូនចិន ប្រគល់ជូនគណៈកម្មការចំពោះកិច្ចរបស់រដ្ឋាភិបាលកម្ពុជា ដែលទទួលបន្ទុកសម្របសម្រួលទទួល ផ្ទៀងផ្ទាត់ និងប្រគល់ផែនទី។
សេចក្តីសម្រេចយ៉ាងដូច្នេះត្រូវបានបញ្ជាក់ដោយប្រធានាធិបតីបារាំងលោក François HOLLANDE នៅក្នុងលិខិតដែលលោកបានផ្ញើជូនលោកនាយករដ្ឋមន្ត្រី ហ៊ុន សែន នៃប្រទេសកម្ពុជា នៅថ្ងៃទី៣១សីហា។ នៅក្នុងលិខិតនោះ លោកប្រធានាធិបតីបារាំង បានសរសេរយ៉ាងប្រយ័ត្នប្រយែងយ៉ាងដូច្នេះ៖«ប្រទេសបារាំងសុំរក្សាភាពមិនលម្អៀង ក្នុងដំណោះ ស្រាយបញ្ហាព្រំដែនរវាងកម្ពុជា និងវៀតណាម។ ដើម្បីរួមចំណែកក្នុងការរកដំណោះស្រាយភាពខ្វែងគំនិតគ្នា ស្ថានទូតបារាំងនៅភ្នំពេញ នឹងប្រគល់ច្បាប់ចម្លងនៃផែនទីបោះពុម្ពដោយ ក្រុមភូមិសាស្ត្រឥណ្ឌូចិន ដែលទទួលបានពីវិទ្យាស្ថានជាតិភូមិសាស្ត្រ»។
នេះគឺជាការឆ្លើយតបរបស់លោកប្រធានាធិបតីបារាំងទៅនឹងលិខិតរបស់លោកនាយករដ្ឋមន្ត្រី ហ៊ុន សែន ដែលបានសរសេរស្នើសុំខ្ចីផែនទីពីរដ្ឋាភិបាលបារាំង កាលពីថ្ងៃទី១៥ ខែកក្កដាកន្លងទៅ។ នៅក្នុងលិខិតស្នើសុំខ្ចីផែនទីពីប្រទេសបារាំង របស់ប្រមុខរដ្ឋាភិបាលកម្ពុជានោះ លោក ហ៊ុន សែន ក៏បានស្នើសុំឲ្យបារាំងបញ្ជូនអ្នកជំនាញផែនទីមកកម្ពុជាផងដែរ។ ប៉ុន្តែការស្នើចុងក្រោយនេះ មិនទទួលបានចម្លើយវិជ្ជមានទេ នេះបើយោងតាមលិខិតរបស់លោក François HOLLANDE។ ប្រធានាធិបតីបារាំងឆ្លើយតបចំនុចយ៉ាងដូច្នេះថា៖«ការបញ្ជូនក្រុមអ្នកជំនាញផែនទីបារាំង ដើម្បីមកពិនិត្យផ្ទាល់ អាចធ្វើទៅបាន លុះត្រាណាមានការស្នើសុំ និងឯកភាពគ្នាពីភាគីទាំងពីរ»។
ទោះយ៉ាងណាក៏ដោយ លោកនាយករដ្ឋមន្ត្រីកម្ពុជាបានសរសេរលិខិតអរគុណលោកប្រធានាធិបតីបារាំងភ្លាមៗដែរ ចំពោះការយល់ព្រមឲ្យខ្ចីផែនទីពីសំណាក់រដ្ឋាភិបាលបារាំង។ នៅក្នុងលិខិតអរគុណនោះ លោក ហ៊ុន សែន បានពន្យល់ប្រធានាធិបតីបារាំងបន្ថែមអំពីគោលបំណងនៃការផ្ទៀងផ្ទាត់ផែនទីនៅពេលនេះ។ ដូចបានបញ្ជាក់ប្រាប់លោកអគ្គលេខា ធិការអង្គការសហប្រជាជាតិដែរ ការផ្ទៀងផ្ទាត់ផែនទីនៅពេលនេះ ត្រូវបានលោក ហ៊ុន សែន ពន្យល់ថា៖ ១ គឺដើម្បីបញ្ជាក់ពីភាពទទួលខុសត្រូវរបស់រដ្ឋាភិបាលចំពោះការងារព្រំដែន, ២ គឺបញ្ចប់ការញុះញង់បំបែកបំបាក់ជាតិ និងទី៣ គឺ បញ្ជាក់ពីការប្តេជ្ញាចិត្តរបស់រដ្ឋាភិបាលក្នុងការកសាងខ្សែបន្ទាត់ព្រំដែនសន្តិភាព មិត្តភាព និងសហប្រតិបត្តិការជាមួយប្រទេសជិតខាង៕
Tag:
ហ៊ុន សែន
បារាំង
ព្រំដែន
© រក្សាសិទ្ធិដោយ thmeythmey.com