កីឡាជាតិ
ជម្រើស U-13 ជើងឯកជាតិថ្នាក់ជាតិរកឃើញក្រុមខ្លាំងឡើងទៅវគ្គ៨ក្រុមចុងក្រោយហើយ
×![]()
ពានរង្វាន់បាល់ទាត់ជម្រើសជើងឯកយុវជនក្រោមអាយុ១៣ឆ្នាំ ប្រចាំឆ្នាំ ២០១៥ បានស្វែងរកក្រុមឡើងទៅវគ្គ ៨ ក្រុមចុងក្រោយឃើញហើយក្រោយដំណើរការចាប់តាំងថ្ងៃទី ២៨ ខែសីហា ឆ្នាំ ២០១៥ មកដែលរៀបចំឡើងនៅទីលានមជ្ឈមណ្ឌលនិងសាលាបាល់ទាត់ជាតិបាទី ក្នុងខេត្តតាកែវ។
សរុបលទ្ធផលវគ្គជម្រុះ ១/៨ ដែលរៀបចំនៅរសៀលថ្ងៃអង្គារ ទី ១ ខែ កញ្ញា ម្សិលមិញ ក្រុមយុវជនរតនៈ ដែលម្ចាស់ជើងឯកឆ្នាំចាស់ បានយកឈ្នះក្រុមអង្គការអភិវឌ្ឍន៍កម្ពុជា ១ ទល់ ០ ហើយក្រុមយុវជនថ្នាលរបស់ក្លិបភ្នំពេញក្រោន បានចាញ់ក្រុមមន្ទីរអប់រំយុវជននិងកីឡាខេត្តប៉ៃលិន ១ ទល់ ០ ក្រុមសៀមរាបអង្គរ ឈ្នះក្រុមអាវុធហត្ថខេត្តត្បូងឃ្មុំ ១ ទល់ ០ ក្រុមស្វាយរៀងអែហ្វស៊ី ចាញ់ក្រុមមន្ទីរអប់រំយុវជននិងកីឡាខេត្តតាកែវ ២ ទល់ ។
ចំណែកក្រុមក្រុមអធិរាជភ្នំពេញ ចាញ់ក្រុមអាវុធហត្ថខេត្តពោធិ៍សាត់ ២ ទល់ ១ ក្រុមយុវជនឧត្តរ ឈ្នះយុវជនខេត្តព្រះវិហារ ៨ ទល់ ០ ក្រុមត្បូងប៉ៃលិនឈ្នះ ពិស្ណុការអាកាដឺមី ៣ ទល់ ០ និងក្រុមខេត្តស្វាយរៀង ចាញ់អធិរាជភ្នំស្វាយ ដោយបាល់ប៉េណាំងទីកាត់សេចក្ដី ៣ ទល់ ៤ ក្រោយប្រកួតស្មើគ្នា ១ ទល់ ១ នៅម៉ោងធម្មតា។
សូមបញ្ជាក់ថាពានរង្វាន់យុវជនក្រោមអាយុ១៣ឆ្នាំ ប្រចាំឆ្នាំនេះមានក្រុមចូលរួមចំនួន ៣២ ក្រុមមកពីខេត្ត/ក្រុងទូទាំងប្រទេស ចែកជា ៨ ពូល ដោយចាប់ផ្ដើមប្រកួតពីថ្ងៃទី ២៨ ខែ សីហា ដល់ ថ្ងៃទី ៨ ខែ កញ្ញា ឆ្នាំ ២០១៥ នៅលើទីលានទាំង ៤ ក្នុងបរិវេណមជ្ឈមណ្ឌលនិងសាលាបាល់ទាត់ជាតិបាទី ក្នុងខេត្តតាកែវ។
សម្រាប់កម្មវិធីប្រកួតនៅវគ្គ ១/៤ នឹងធ្វើឡើងនៅល្ងាចថ្ងៃទី ៣ ខែ សីហា ស្អែកនេះមានដូចជា៖
-ក្រុមយុវជនរតនៈ Vsក្រុមមន្ទីរអប់រំយុវជននិងកីឡាខេត្តប៉ៃលិន (ម៉ោង ២:៣០នាទីរសៀល)
-ក្រុមសៀមរាបអង្គរ Vsក្រុមមន្ទីរអប់រំយុវជននិងកីឡាខេត្តតាកែវ (ម៉ោង២រសៀល)
-ក្រុមអាវុធហត្ថខេត្តពោធិ៍សាត់ Vsក្រុមយុវជនឧត្តរ (ម៉ោង ៤:០០ នាទីល្ងាច)
-ក្រុមត្បូងប៉ៃលិន Vs ក្រុមអធិរាជភ្នំស្វាយ (ម៉ោង ៤:០០ នាទីល្ងាច)
តាមគម្រោងដែលចេញដោយសហព័ន្ធកីឡាបាល់ទាត់កម្ពុជា ចាប់ពីថ្ងៃទី ២៨ ដល់ ៣០ ខែ សីហា ជាវគ្គប្រកួតជម្រុះតាមពូល។ ក្រុមលេខ ១ លេខ ២ តាមពូលមានឈ្មោះឡើងទៅលេងនៅវគ្គ ១៦ ក្រុមចុងក្រោយ ហើយត្រូវប្រកួតជម្រុះរហូតដល់វគ្គផ្ដាច់ព្រ័ត្រ រៀបចំពីថ្ងៃទី ១ ដល់ ៧ ខែ កញ្ញា ឆ្នាំ ២០១៥៕
Tag:
u-13
© រក្សាសិទ្ធិដោយ thmeythmey.com
