ជាតិ
រដ្ឋាភិបាលបន្ថែមប្រាក់២លានដុល្លារទៀត សម្រាប់ផ្គត់ផ្គង់មន្ទីរពេទ្យគន្ធបុប្ផា
×
ពីពិធីបិទមហាសន្និបាតតំណាងសមាគមអតីតយុទ្ធជនកម្ពុជាទូទាំងប្រទេសលើក ទី២ នៅវិទ្យាស្ថានជាតិអប់រំ លោកនាយករដ្ឋមន្ត្រី ហ៊ុន សែន បញ្ជាក់ថា រដ្ឋាភិបាលនឹងបង្កើនថវិកាវិភាគទានចំនួន២លានដុល្លារបន្ថែមទៀត ពីលើថវិកាវិភាគទាន ៣លាន ២សែន ដុល្លារ ពោលគឺស្មើនឹង៥,២លានដុល្លារ សម្រាប់ទ្រទ្រង់មន្ទីពេទ្យគន្ធបុប្ផា នៅឆ្នាំ២០១៥នេះ។ សម្រាប់ឆ្នាំ២០១៦ រដ្ឋាភិបាលនឹងបង្កើនថវិកាវិភាគទានរហូតដល់៦លានដុល្លារ។ ប្រមុខរដ្ឋាភិបាល បញ្ជាក់ទៀតថា រដ្ឋាភិបាលនឹងបន្ដផ្ដល់ប្រាក់បន្ថែមលើសពីនេះ នៅឆ្នាំក្រោយៗទៀត។
បច្ចុប្បន្នមន្ទីរពេទ្យគន្ធបុប្ផាបានចំណាយថវិកាបានចំណាយថវិកា ចំនួន១២ម៉ឺនដុល្លារក្នុងមួយថ្ងៃ ដើម្បីព្យាបាលជំងឺដោយឥតគិតថ្លៃដល់ កុមារកម្ពុជា។ ចាប់តាំងពីឆ្នាំ១៩៩២មកមន្ទីរពេទ្យគន្ធបុប្ផាបានចំណាយថវិកាអស់ ប្រមាណ៥៦០លានដុល្លារ ក្នុងនោះ៣,៥ភាគរយបានមកពីរាជរដ្ឋាភិបាលកម្ពុជា៤,៥ភាគរយពីរដ្ឋាភិបាល ស្វ៊ីសនិង៩២,៥ភាគរយជាថវិកាដែលប្រមូលបានមូលនិធិសប្បុរសជន។
សូមបញ្ជាក់ថា នៅឆ្នាំ២០១៤កន្លងទៅមន្ទីរពេទ្យគន្ធបុប្ផាបានចំណាយថវិកាប្រមាណ៤០លាន ដុល្លារដើម្បីពិនិត្យ និងព្យាបាលជំងឺដល់កុមារកម្ពុជាជិត១លាននាក់។ ដោយឡែកនៅឆ្នាំ២០១៥នេះ មន្ទីរពេទ្យគន្ធបុប្ផាមានកញ្ចប់ថវិកាចំនួន៤៣លានដុល្លារ សម្រាប់ចំណាយលើការពិនិត្យ និងព្យាបាលជំងឺដល់កុមារ និងស្ត្រីកម្ពុជា ក្នុងនោះប្រាក់ជាង៣លានដុល្លារផ្តល់ដោយរដ្ឋាភិបាលកម្ពុជា ៤លានដុល្លារពីរដ្ឋាភិបាលស្វីស និង៣៦លានដុល្លារទៀត បានមកពីការបរិច្ចាគឯកជន ដែលភាគច្រើនជាប្រជាជនស្វីស៕
Tag:
មន្ទីរពេទ្យគន្ធបុប្ផា
គន្ធបុប្ផា
© រក្សាសិទ្ធិដោយ thmeythmey.com