អន្តរជាតិ
សហរដ្ឋអាមេរិក៖ បុរសម្នាក់បានចាប់តាម្នាក់ទៅផ្ទះរបស់ខ្លួន ដើម្បីធ្វើអាហារឲ្យហូប
×![]()
ដោយ: ធីតា
បុរសម្នាក់ត្រូវប៉ូលិសចាប់ខ្លួនកាលពីថ្ងៃពុធសប្តាហ៍មុន ដោយសារបានចាប់ជំរិតលោកតាម្នាក់ទៅកាន់ផ្ទះរបស់ខ្លួន ដើម្បីធ្វើអាហារឲ្យបរិភោគ។
នៅព្រឹកថ្ងៃពុធសប្តាហ៍មុន David Pope អាយុ ៥៧ ឆ្នាំបានឃើញលោកតាអាយុ ៧៧ ឆ្នាំម្នាក់កំពុងតែរុញរទេះអេតចាយនៅតាមផ្លូវទីក្រុង Danbury រដ្ឋ Connecticut សហរដ្ឋអាមេរិក។ បុរសរូបនេះក៏ចាប់អូសដៃលោកតានោះទៅផ្ទះរបស់ខ្លួន ដើម្បីធ្វើអាហារឲ្យបរិភោគ នេះបើតាមការចុះផ្សាយរបស់គេហទំព័រ Newstimes ។
David បានប្រាប់បូលិសថា៖ « ខ្ញុំយល់ថា គាត់គ្មានផ្ទះសម្បែង ហើយខ្ញុំចង់ឲ្យអាហារគាត់ហូប »។ ជនរងគ្រោះបាននិយាយថា៖ « គេចាប់ដៃខ្ញុំ ហើយអូសខ្ញុំទៅផ្ទះរបស់គេ »។ ពេលទៅដល់ផ្ទះ សត្វឆ្កែរបស់ David បានទទួលស្វាគមន៍ភ្ញៀវ ដោយរត់មកខាំជើង។ ម្ចាស់ផ្ទះមិនបានចាប់អារម្មណ៍ទេ គាត់គិតតែពីហាន់សាច់ ចិតបន្លែដើម្បីធ្វើម្ហូបទទួលភ្ញៀវ។ ជនរងគ្រោះបានប្រាប់ប៉ូលិសថា គាត់សុខចិត្តហូបអាហារនោះ ព្រោះគាត់ភ័យខ្លាចក្រែងមានគ្រោះថ្នាក់ ប្រសិនបើគាត់បដិសេធ។
បន្តិចក្រោយមក ជនរងគ្រោះបានរត់គេចខ្លួនរួច ហើយបានរៀបរាប់ហេតុការណ៍ដ៏ចម្លែកនេះប្រាប់ប៉ូលិស។ ប៉ូលិសបានចុះទៅដល់ផ្ទះរបស់ជនជាប់សង្ស័យ ហើយឃើញថា បុរសម្ចាស់ផ្ទះស្ថិតក្នុងសភាពស្រវឹងស្រា។
David Pope ប្រឈមមុខនឹងជាប់ពន្ធនាគារពីបទចាប់ជំរិត និងបង្កគ្រោះថ្នាក់ដល់អ្នកដទៃ៕
© រក្សាសិទ្ធិដោយ thmeythmey.com
