អន្តរជាតិ
នយោបាយជាតិ
លោក ស៊ី ជិនពីង ប្រកាសបន្ថយទ័ព៣សែននាក់ក្នុងថ្ងៃបុណ្យជ័យជម្នះសង្គ្រាមលោកលើកទី២
× ថ្លែងបើកពិធីរំលឹកខួបលើកទី៧០នៃជ័យជម្នះសង្គ្រាមលោកលើកទី២ ប្រធានាធិបតីចិនលោក ស៊ី ជិនពីងបានប្រកាសថា ក្រុងប៉េកាំងនឹងកាត់បន្ថយកងទ័ពរបស់ខ្លួនឲ្យដល់៣សែននាក់។ ការប្រកាសកាត់បន្ថយកងទ័ពនេះជាចេតនារបស់ចិនដែលចង់បង្ហាញទៅពិភពលោកថា ចិនមិនប្រើប្រាស់យោធាដើម្បីគំរាមកំហែងសន្តិភាពពិភពលោកដូចដែលគេធ្លាប់ភ័យខ្លាចឡើយ។
ថ្លែងសុន្ទរកថាតាមក្នុងពិធីរំលឹកជ័យជម្នះសង្គ្រាមលោកលើកទី២ លោក ស៊ី ជិនពីង បានប្រកាសកាត់បន្ថយកងទ័ពចិនឲ្យដល់៣សែននាក់នៅពេលខាងមុខ។ ការប្រកាសបែបនេះកើតឡើងប៉ុន្មាននាទីប៉ុណ្ណោះមុនពេលដែលមានការដើរក្បួនព្យុះហយាត្រាយោធាទ្រង់ទ្រាយធំបំផុតមិនធ្លាប់មានពីមុនមកសោះនោះ។
ការលើកឡើងរបស់ប្រមុខរដ្ឋចិន បង្ហាញឲ្យឃើញពីចេតនានិងឆន្ទៈរបស់ចិនក្នុងការថែរក្សាសន្តិសុខ និងសន្តិភាពពិភពលោក ហើយការកាត់បន្ថយចំនួនទ័ពនេះ ជាសកម្មភាពវិជ្ជមានមួយដែលបញ្ជាក់ប្រាប់រដ្ឋក្នុងពិភពលោកថា ការរះត្រដែតឡើងនៃអំណាចយោធាចិន មិនមែនចាការគំរាមកំហែងពិភពលោកដូចគេធ្លាប់គិតឡើយ។ ចិនកំពុងប្រែក្លាយខ្លួនបន្តិចម្តងៗទៅជាមហាអំណាចមួយដែលមានតួនាទីនិងទំនួលខុសត្រូវខ្ពស់ក្នុងការរក្សាសន្តិសុខ និងសន្តិភាពពិភពលោកផងដែរ។
បច្ចុប្បន្ននេះ មហាអំណាចចិនមានកងទ័ពសរុបចន្លោះពី ២ទៅ ៣លាននាក់ ដែលអាចចាត់ទុកថាជាចំនួនមួយច្រើនណាស់បើធៀបចំនួនយោធាប្រទេសដទៃ។ ជុំវិញការកាត់បន្ថយកងទ័ពនេះដែរ លោក ស៊ី ជិនពីង មិនបានបញ្ជាក់លម្អិតពីពេលវេលាដែលចិនត្រូវបន្ថយទ័ពឲ្យដល់៣សែននាក់ឡើយ។
នៅពេលនេះលោក ស៊ី ជិនពីង រួមជាមួយបណ្តាមេដឹកនាំប្រទេសជាង៣០ទៀតរួមទាំងលោក វ្ល៉ាឌីមៀ ពូទីន ផងនោះកំពុងទស្សនាក្បួនយោធាធំបំផុតនៅទីលានធានអានមែន ដោយទ័ព ១២ពាន់នាក់ចូលរួមក្នុងក្បួននិងមានការបង្ហាញអាវុធយុទ្ធភ័ណ្ឌទំនើបគ្រប់ធុនដែលចិនផលិតបានរាប់រយប្រភេទផងដែរ៕
© រក្សាសិទ្ធិដោយ thmeythmey.com