ក្រុមបាល់ទាត់ជម្រើសជាតិយុវជនក្រោមអាយុ១៦ ឆ្នាំរបស់កម្ពុជា (U-16) នឹងបន្តជួបក្រុមជម្រើសជាតិថៃ U-16 នៅវេលាម៉ោង ៥ ល្ងាច (ម៉ោង ៤ ល្ងាចនៅកម្ពុជា) ថ្ងៃសុក្រ ទី ៤ ខែ កញ្ញា ឆ្នាំ ២០១៥ លើទីលានកីឡដ្ឋាន Jalan Besar Stadium ក្នុងវគ្គជម្រុះពូល H នៃពានរង្វាន់បាល់ទាត់យុវជនក្រោមប្រចាំទ្វីបអាស៊ី AFC U-16 Championship 2016 ដែលកំពុងរៀបចំឡើងនៅប្រទេសសិង្ហបុរី។
បើរំលឹកពីជំនួបដំបូងកាលពីថ្ងៃទី ២ ខែ កញ្ញា ឆ្នាំ ២០១៥ កន្លងទៅក្រុម U-16កម្ពុជា បានប្រកួតចាញ់ក្រុមជើងឯកឆ្នាំចាស់កូរ៉េខាងជើង ដោយលទ្ធផល ៧ ទល់ ០ ខណៈក្រុម U-16ថៃ បានយកឈ្នះម្ចាស់ផ្ទះសិង្ហបុរី ៥ ទល់ ០ ផងដែរ។ សរុបលទ្ធផលពេលនេះក្រុម កូរ៉េខាងជើង ឈរកំពូលតារាងមាន ៣ ពិន្ទុតាមពីក្រោយដោយក្រុមថៃ មាន ៣ ពិន្ទុតែខុសគ្រាប់បាល់ចំណេញ ចំណែកសិង្ហបុរី និង កម្ពុជា នៅបាតតារាងក្រោយបរាជ័យនៅថ្ងៃបើកឆាកដូចគ្នា។
វគ្គជម្រុះ ពូល H នៃពានរង្វាន់ AFC U-16 Championship 2016 នេះ មានក្រុមចំនួន៤ គឺ កូរ៉េខាងជើង, ថៃ, កម្ពុជា និង ម្ចាស់ផ្ទះសិង្ហបុរី ដោយចាប់ប្រកួតពីថ្ងៃទី២ ដល់ ទី ៦ ខែ កញ្ញា ឆ្នាំ ២០១៥។ ក្រុមខ្លាំងក្នុងពូលចំនួន ២ មានឱកាសឡើងទៅលេងជុំបន្ទាប់។ យោងតាមវិបសាយរបស់សហព័ន្ធកីឡាបាល់ទាត់សិង្ហបុរី ដែលជាម្ចាស់ផ្ទះក្នុងវគ្គជម្រុះពូលនេះបានដាក់តម្លៃលក់សំបុត្រចូលទស្សនាក្នុងការប្រកួតនេះតម្លៃ៥ ដុល្លារនិង ១០ ដុល្លារ។
ក្រៅពីបរាជ័យដោយថ្វីជើងក្រុម U-16កូរ៉េខាងត្បូង ៧ ទល់ ០ កន្លងទៅក្រុម U-16កម្ពុជា ត្រូវប្រកួតជាមួយក្រុម U-16 របស់ថៃ នៅថ្ងៃទី ៤ កញ្ញា នេះនិងប្រកួតចុងក្រោយ U-16កម្ពុជា ជួបក្រុម U-16សិង្ហបុរី នៅថ្ងៃទី ៦ ខែ កញ្ញា ឆ្នាំ ២០១៥ នៅកីឡដ្ឋាន Jalan Besar Stadium ដដែល មុនត្រឡប់មកប្រទេសកំណើតវិញ នៅថ្ងៃទី ៧ ខែ កញ្ញា ឆ្នាំ ២០១៥។
លោក Yusuke Iki គ្រូបង្វឹកប្រចាំសាលាបាល់ទាត់ជាតិ ត្រូវបានសហព័ន្ធកីឡាបាល់ទាត់កម្ពុជា តែងតាំងឱ្យធ្វើជាគ្រូបង្គោលសម្រាប់ដឹកនាំក្រុមកម្ពុជា ចូលរួមក្នុងពានរង្វាន់ ហើយលោក គឹម ភក្ដី និង លោក ជឿន សុភី ជាគ្រូជំនួយ ហើយលោក ប្រាក់ វណ្ណនី ជាគ្រូអ្នកចាំទី និង លោក ស្រ៊ុន សីហា ជាអ្នកបកប្រែ។
កីឡាករ U-16កម្ពុជាចំនួន ២៣ នាក់ដែលអាចបង្ហាញខ្លួនក្នុងការប្រកួតនេះមានដូចជា អាត អូនតូច, ហេង ទីណា, គង់ រ៉ាផាត, ហុល គឹមហ៊ុយ, ទេស សម្បត្តិ, យ៉េត ចិត្រា, គង់ ច័ន្ទសិរសា, យឺ សាហ្វី, រ័ត្ន ប៊ុននូ, សឿត ណាវ៉ា, ឈឿង វិស្ណុ, ទៀត គឹមហេង, សៀន សុភត្រា, ឡាត វណ្ណី, សេត ម៉ាស៊ូត, ឡូន ទេន, សួន សុភត្រា, ឡុង ម៉េងហាវ, ទុន សំឈី, សឹង្ហ កក្កដា, ត្រៃ វិចិត្រ, សាន្ត គឹមហេង, សៀង ចាន់ធា។
ងាកមកមើលក្រុមជម្រើសជាតិ U-16ថៃ វិញ ទើបតែលើកពានយុវជនក្រោមអាយុ១៦ឆ្នាំប្រចាំតំបន់អាស៊ាន AFF BIDC U-16 Championship 2015 កាលពីដើមខែសីហាថ្មីៗ ដែលរៀបចំនៅក្នុងរាជធានីភ្នំពេញ ប្រទេសកម្ពុជា បន្ទាប់ពីយកឈ្នះក្រុមមីយ៉ាន់ម៉ា នៅវគ្គផ្ដាច់ព្រ័ត្រ ដោយលទ្ធផល ៣ ទល់០ ។
ក្រុម U-16ថៃ ធ្លាប់ ឈ្នះពានរង្វាន់នេះម្ដងកាលពីឆ្នាំ ១៩៩៨ ក្រោយយកឈ្នះក្រុមកាតារ នៅវគ្គផ្ដាច់ព្រ័ត្រ ដោយបាល់ប៉េណាំងទីកាត់សេចក្ដី ៣ ទល់ ១ ក្រោយលទ្ធផលប្រកួតពេញម៉ោងត្រឹមស្មើគ្នា ១ ទល់ ១ ខណៈកាលពីឆ្នាំ ១៩៩៦ បានត្រឹមជើងឯករង ក្រោយចាញ់ក្រុមប្រទេសអូម៉ង់ នៅវគ្គផ្ដាច់ព្រ័ត្រ ១ ទល់ ០ ។
វគ្គជម្រុះនៃពានរង្វាន់ AFC U-16 Championship 2016 មានក្រុមចូលរួមចំនួន ៤៥ ប្រទេសនិងបែងចែកជា ១១ ពូលចាប់ផ្ដើមដំណើរការប្រកួតពីថ្ងៃទី២ រហូតដល់ថ្ងៃទី២០ ខែកញ្ញា ឆ្នាំ២០១៥ ដើម្បីស្វែងរកក្រុមខ្លាំងចំនួន ១៦ ឡើងទៅលេងជុំផ្ដាច់ព្រ័ត្រដែលរៀបចំនៅប្រទេសឥណ្ឌា ឆ្នាំ ២០១៦ ខាងមុខ។
ក្រុមគូប្រកួតរវាង U-16កម្ពុជា ជាមួយ U-16ថៃ នៅថ្ងៃសុក្រ នេះដែរក្រុមម្ចាស់ផ្ទះសិង្ហបុរី ត្រូវប៉ះក្រុមខ្លាំងកូរ៉េខាងជើង នៅវេលាម៉ោង ៨ យប់ (ម៉ោង៧ នៅកម្ពុជា) លើកីឡដ្ឋាន Jalan Besar Stadium ដូចគ្នា៕