ជាតិ
វប្បធម៌៖ វិចិត្រករខ្មែរម្នាក់ប្រើទេព្យកោសល្យអប់រំសង្គមក្នុងពហុវិស័យ
×![]()
ដោយ: ថ្មីៗ
ភ្នំពេញ៖ លោក ឈឹម សុធី គឺជាវិចិត្រករ និងជាជាងចម្លាក់ ដែលគួរឲ្យកោតសសើរ។ កន្លងទៅស្នាដៃរបស់លោកជាច្រើនត្រូវបានដាក់តាំងបង្ហាញនៅក្នុងពិព័រណ៍ទាំងក្នុង និងក្រៅប្រទេស។
មានស្រុកកំណើតនៅស្រុកល្វាឯម ខេត្តកណ្តាល លោក ឈឹម សុធី បានឆ្លងកាត់ការឈឺចាប់ និងទុក្ខវេទនាជាច្រើន ក្នុងការរស់រានជីវិតនារបបខ្មែរក្រហម។ ដូចគ្នាទៅនឹងគ្រួសារកម្ពុជាជាច្រើន លោកបានបាត់បង់ឪពុកម្នាក់ និងបងប្អូនបង្កើតពីរនាក់នៅក្នុងរបបនេះ។
លោក ឈឹម សុធី ជាសិល្បករសហសម័យម្នាក់ នៅក្នុងប្រទេសកម្ពុជា ដែលជាប្រទេសមូយដែលភាគច្រើនឲ្យតម្លៃទៅលើទម្រង់សិល្បៈបែបប្រពៃណីដូចជារបាំបុរាណ។ ដូច្នេះ វាមិនមានភាពងាយស្រួលនោះទេ នៅក្នុងការដើរនៅលើផ្លូវមួយ ប៉ុន្តែលោកឲ្យដឹងថា វាអាចចាត់ទុកជាបេសកម្មមួយក្នុងការលើកកម្ពស់សិល្បៈសហសម័យនៅក្នុងប្រទេសកម្ពុជា។
ដោយសារតែមានទេពកោសល្យ និងចំណង់ចំណូលចិត្ត កាលពីនៅក្មេងលោក សុធីតែងតែគូររូបផ្សេងៗនៅតាមដងទន្លេ នៅលើដីខ្សាច់ និងអ្វីដែលលោកមាន និងរកឃើញ។ ក្រោយមកលោក សុធី បានចំណាយពេល១០ឆ្នាំទៅលើការសិក្សាអំពីការគូរគំនូរ ហើយលោកក៏បានបញ្ចប់ការសិក្សានៅសាកលវិទ្យាល័យភូមិន្ទវិចិត្រសិល្បៈនារាជធានីភ្នំពេញ។
នាក្រោយពេលដែលលោក សុធី បញ្ចប់ការសិក្សា លោកបានក្លាយជានាយកផ្នែករចនាម៉ូដ និងសិល្បៈនៅអង្គការមួយនាខេត្តសៀមរាប បន្ទាប់មកលោកក៏បានចាប់ផ្តើមការងារនៅក្រសួងវប្បធម៌ និងវិចិត្រសិល្បៈនៅក្នុងឆ្នាំ១៩៩។
នៅក្នុងបទសម្ភាសន៍មួយជាមួយវីអូអេ លោកបាននិយាយថា៖«សិល្បៈគឺជាកញ្ចក់ឆ្លុះបញ្ចាំងពីសង្គម» ។
គំនូរបែបប្រពៃណីរបស់លោក សុធី ភាគច្រើនរួមបញ្ចូលរឿងព្រេងរបស់ហិណ្ឌូ និងរឿងរ៉ាវនៅក្នុងព្រះពុទ្ធសាសនា។
ចំណែកឯនៅក្នុងគំនូរសហសម័យរបស់លោកវិញ លោកបានស្វែងរកគំនូរណាដែលអាចឲ្យអ្នកមើល អាចស្វែងយល់អំពីអតីតកាល និងសោកនាដកម្មនានារបស់ប្រទេសកម្ពុជា។ លើសពីនេះទៅទៀត គំនូររបស់លោក មួយចំនូនក៏បង្ហាញពីការលំបាក និងទុក្ខវេនារបស់ប្រជាជននៅក្នុងប្រទេសកម្ពុជាដែលបានរស់នៅក្នុងសង្គ្រាម។
លោកក៏បានបន្ថែមថា លោកក៏បានបញ្ចូលការអប់រំខ្លះនៅក្នុងគំនូរដែរ ដោយលោកសង្ឃឹមថា វានឹងបង្កើនការយល់ដឹងដល់ប្រជាជនទូទៅ ដោយក្នុងនោះមានគំនូរខ្លះបង្ហាញអំពីវិសមភាពរវាងអ្នកមាន និងអ្នកក្រនៅក្នុងប្រទេសនានាផងដែរ។
លោកបានថ្លែងថា៖«ទោះបីជាប្រទេសនានា មានការអភិវឌ្ឍ និងការរីកចម្រើនយ៉ាងណា ក៏នៅតែមានប្រជាជនមួយចំនួននៅតែជួបការលំបាកក្នុងជីវភាពរបស់ពួកគេ»។
កាលពីពីរខែកន្លងទៅ មានការធ្វើពិព័រណ៍ផ្ទាំងស្នាដៃគំនូរបស់លោក នៅសណ្ឋាគារ Plantation នៅឯទីក្រុងភ្នំពេញ ក្នុងនោះមានគំនូរទាំងអស់ចំនួន២០ផ្ទាំង ដែលបានដាក់តាំងសម្ពោធជាសាធារណៈ។ ពណ៌គំនូរនេះធ្វើឡើងក្នុងគោលបំណងអំពាវនាវឲ្យមានការថែរក្សាបរិស្ថាន និងធនធានធម្មជាតិនៅក្នុងប្រទេសកម្ពុជា។
ទោះបីជាការចាប់អារម្មណ៍ទៅលើគំនូរសហសម័យរបស់ប្រជាជនកម្ពុជានៅមានតិចតួចនៅឡើយ ក៏លោក ឈឹម សុធី នៅតែមានសុទិដ្ឋិនិយមអំពីតួនាទីរបស់សិល្បៈសហសម័យដដែល។
លោកថ្លែងថា៖ «នៅពេលដែលយើងធ្វើឲ្យកាន់តែច្រើនៗទៅ យូរៗទៅ ពួកគេនឹងមានចំណេះដឹងតិចតួច ឬដឹងពីវាច្រើនជាងមុន។ អញ្ចឹងពួកគេប្រាកដជាយល់ពីគំនិតនេះ»។
ទន្ទឹមនឹងនេះដែរ ស្នាដៃរបស់លោកក៏បានដាក់បង្ហាញនៅក្នុងប្រទេសជាច្រើនរួមមានសហរដ្ឋអាមេរិក និងប្រទេសមួយចំនួនទៀតនៅអឺរ៉ុប ហើយលោកក៏បានទទូលពានរង្វាន់ជាច្រើនផងដែរ។
លោកបានឲ្យដឹងថា សមិទ្ធផលដែលលោកទទួលបាននេះគឺកើតមកពីការខិតខំប្រឹងប្រែង និងការស្រឡាញ់ចូលចិត្តរបស់លោកទៅលើការគូរគំនូរ។
លោកបានប្រាប់ថា៖ «គំនូរជាបេះដូង និងព្រលឹងរបស់ខ្ញុំ ខ្ញុំចូលចិត្តវិស័យនេះណាស់ ជាធម្មតាខ្ញុំតែងប្រាប់អ្នកផ្សេងថា ប្រសិនបើពួកគេចូលចិត្ត និងចង់ធ្វើមួយ ពួកគាត់ត្រូវធ្វើឱ្យល្អបំផុត និងខំឲ្យឈានដល់ចំណុចកំពូលនៃសមត្ថភាពរបស់ពួកគេ ដូចចាស់ៗគាត់តែងនិយាយថា បើលូកប្រហុក ត្រូវលូកអោយកប់ដល់បាត»៕
ផ្ដល់សិទ្ធិដោយ៖ វិទ្យុសំឡេងសហរដ្ឋអាមេរិក(VOA)
Tag:
វប្បធម៌
© រក្សាសិទ្ធិដោយ thmeythmey.com
