ជាតិ
ជនជាតិវៀតណាម២៧នាក់ទៀត ត្រៀមបណ្តេញចេញនៅចុងសប្តាហ៍នេះ រូបភាព៖ នាយកដ្ឋានស៊ើបអង្កេត និងអនុវត្តនីតិវិធី
× នាយកដ្ឋានស៊ើបអង្កេត និងអនុវត្តនីតិវិធី នឹងបណ្តេញជនអន្តោប្រវេសន៍វៀតណាមចំនួន២៧នាក់ទៀតចេញពីកម្ពុជា នៅចុងសប្តាហ៍នេះ។ ជនជាតិវៀតណាមទាំងនេះត្រូវបានឃាត់ខ្លួន នៅចំណុចភូមិដើមច័ន្ទ ក្នុងសង្កាត់ច្បារអំពៅ២ ខណ្ឌច្បារអំពៅ រាជធានីភ្នំពេញ ក្រោយពីរកឃើញថាពួកគេរស់នៅ និងរកស៊ីដោយខុសច្បាប់នៅកម្ពុជា។
ជនអន្តោប្រវេសន៍វៀតណាមចំនួន២៧នាក់ ក្នុងនោះស្រីចំនួន១២នាក់ ត្រូវបានសមត្ថកិច្ចឃាត់ខ្លួន កាលពីថ្ងៃទី២១ ខែកញ្ញា បន្ទាប់ពីរកឃើញថា បានលួចស្នាក់នៅ និងរកស៊ីដោយខុសច្បាប់នៅកម្ពុជា។ ពួកគេត្រូវបានឃាត់ខ្លួន នៅចំណុចភូមិដើមច័ន្ទ ក្នុងសង្កាត់ច្បារអំពៅ២ ខណ្ឌច្បារអំពៅ រាជធានីភ្នំពេញ។
បើតាមលោក អ៊ុក ហៃសីលា ប្រធាននាយកដ្ឋានស៊ើបអង្កេត និងអនុវត្តនីតិវិធី ជនជាតិវៀតណាមទាំងនោះ មករស់នៅដោយគ្មានលិខិតផ្លូវការអ្វីទាំងអស់។ ដូច្នេះយើងអាចនឹងបណ្តេញពួកគេចេញពីកម្ពុជានៅថ្ងៃសៅរ៍ ឬថ្ងៃអាទិត្យ សប្តាហ៍នេះ។
អ៊ុក ហៃសីលា ក៏បានអំពាវនាវដល់ប្រជាពលរដ្ឋគ្រប់ទីកន្លែង សហការជាមួយសមត្ថកិច្ច ក្នុងការឃាត់ខ្លួនជនជាតិវៀតណាម ដែលលួចមកស្នាក់នៅ និងរកស៊ីដោយខុសច្បាប់នៅកម្ពុជា។ លោកថា៖«យើងចង់ឲ្យប្រជាពលរដ្ឋជួយរាយការណ៍ជូនកម្លាំងគនរបាល ប្រសិនបើពួកគាត់បានដឹងថា មានជនជាតិវៀតណាមកំពុងរស់នៅដោយខុសច្បាប់ គ្មានលិខិតឆ្លងដែន ឬក៏ឯកសារត្រឹមត្រូវនោះ»។
គិតត្រឹមរយៈពេល៩ខែ នៅឆ្នាំ២០១៥នេះ មានជនអន្តោប្រវេសន៍ខុសច្បាប់សរុបចំនួន១,៨២៥នាក់ក្នុងនោះស្រី២៥៦នាក់ រួមមាន៤៦សញ្ចាតិ ត្រូវបានសមត្ថកិច្ចឃាត់ខ្លួន និងបណ្តេញចេញពីកម្ពុជា។ ក្នុងចំណោមជនអន្តោប្រវេសន៍ទាំងនោះ មានជនជាតិវៀតណាមចំនួន១,៦៤១នាក់ ៕
Tag:
អន្តោប្រវេសន៍
វៀតណាម
© រក្សាសិទ្ធិដោយ thmeythmey.com