សង្គមអន្តរជាតិ
អន្តរជាតិ
យ៉ាងហោច៥០នាក់ បានស្លាប់ដោយហិង្សាក្នុងខែកញ្ញាតំបន់ស៊ីនជាំងប្រទេសចិន
×![]()
មនុស្សយ៉ាងតិច៥០នាក់ត្រូវបានសម្លាប់ក្នុងការវាយប្រហារកាលពីខែមុន ក្នុងតំបន់ស៊ីនជាំង។ តំបន់នេះជាតំបន់ដែលញាំញីដោយអំពើហិង្សា និងចលនាភេរវកម្ម ។ ការបង្ហាញរបាយការណ៍នេះ ចំពេលដែលប្រទេសចិនកំពុងញាប់ដៃជើងក្នុងការរៀបចំប្រារព្ធពិធីរម្លឹកខួប៦០ឆ្នាំនៃការបង្កើតតំបន់ស្វយ័តស៊ីនជាំងផងដែរ។
រដ្ឋាភិបាលចិនអះអាងថា ខ្លួនបានប្រឈមមុខជាមួយការគំរាមកំហែងពីសំណាក់ក្រុមបំបែកខ្លួននិងក្រុមជ្រុលនិយមក្នុងតំបន់ស៊ីនជាំង ដែលមានព្រំដែនជាប់នឹងអាស៊ីកណ្ដាល ។ អាជ្ញាធរថា មនុស្សយ៉ាងហោចណាស់ ៥០នាក់បានស្លាប់ក្នុងអំពើហិង្សានាក្នុងខែកញ្ញនេះ។ ប៉ុន្តែក្រុមសិទ្ធិមនុស្សបានរិះគន់រដ្ឋាភិបាលចិន ព្រោះតែមិនបានផ្ដល់ភស្ដុតាងជាក់លាក់អំពីវត្តមានក្រុមជ្រុលនិយម និងបានលើកឡើងថា បញ្ហាកើតឡើងបណ្ដាលមកពីការរឹតត្បិតសេរីភាពរបស់ជនអម្បូរអ៊ុយហ្គួរពីសំណាក់រដ្ឋាភិបាលចិន។
យោងតាមរបាយការណ៍របស់អាជ្ញាធរចិនក្នុងខែកញ្ញាមានការវាយប្រហារ១៨លើកបណ្ដាលឱ្យមនុស្សស្លាប់យ៉ាងហោចណាស់ ៥០នាក់នៅឯអណ្ដូងរ៉ែធ្យូងថ្មក្នុងតំបន់Aksuដែលជាកន្លែងជនជាតិហានភាគច្រើនរស់នៅ។ ចំណែកឯមន្ត្រីប៉ូលិសក៏បានឱ្យដឹងដែរថា កម្មករភាគច្រើនមិនអាចរត់គេចទាន់ពេល បានស្លាប់និងរបួស ខណៈអ្នកខ្លះកំពុងសម្រាក ខ្លះទៀតរៀបចំធ្វើការ។យ៉ាងណាមិញ រដ្ឋាភិបាលចិនមិនដែលបញ្ជាក់ពីហេតុការណ៏ដែលបានកើតឡើងនោះទេ ទោះបីជាមានរបាយការណ៍បង្ហាញពីការវាយប្រហារក៏ដោយ។
ជម្លោះរវាងជនជាតិភាគច្រើនហាននិងក្រុមជនជាតិភាគតិចអ៊ុយហ្គួរ បានបង្កឱ្យមានអំពើហិង្សាបង្ហូរឈាមយ៉ាងធ្ងន់ធ្ងរ។តែ ក្រុមសិទ្ធិមនុស្សនិយាយថា គោលនយោបាយរឹតត្បិតសិទ្ធិសេរីភាពជនជាតិភាគតិចរបស់ក្រុងប៉េកាំងនៅតំបន់ស៊ីនជាំង គឺជាឫសគល់នៃអំពើហិង្សាទាំងឡាយ ។ ប៉ុន្តែអាជ្ញាធរចិនបដិសេធការលើកឡើងនេះ។
សូមបញ្ជាក់ថា ឆ្នាំនេះខួបទី៦០នៃការបង្កើតតំបន់ស្វយ័តស៊ីនជាំងធ្វើឡើងនៅឯក្រុងUrumqi ដោយមានការចូលរួមពីសំណាក់មន្ត្រីជាន់ខ្ពស់លំដាប់ទី៤នៃបក្សកុម្មុយនីស្តចិនលោក Yu ZhengSheng ដែលទទួលបន្ទុកកិច្ចការសាសនានិងជនភាគតិចផងដែរ៕
© រក្សាសិទ្ធិដោយ thmeythmey.com
