ជាតិ
សេដ្ឋកិច្ច
ក្រុមហ៊ុនជាង២០០ ចូលរួមក្នុងពិព័រណ៍ម្ហូបអាហារ និងភេសជ្ជៈខ្នាតអន្តរជាតិនៅសៀមរាប
× ពិព័រណ៍ម្ហូបអាហារ និងភេសជ្ជៈខ្នាតអន្តរជាតិលើកទី២ រយៈពេល៣ថ្ងៃ នៅទឹកដីអង្គរ ខេត្តសៀមរាប។ ពិព័រណ៍នេះ ចាប់ផ្តើមពីថ្ងៃទី៦ដល់ថ្ងៃទី៨ខែតុលានៅក្នុងសណ្ឋាការអប្សរាផាលែស ដោយមានការចូលរួមពីសហព័ន្ធទេសចរណ៍ សមាគមចុងភៅកម្ពុជា និងក្រុមហ៊ុនជាង២០០ មកពី១៦ប្រទេស ។
ថ្លែងនៅក្នុងសន្និសីទសារព័ត៌មានកាលពីថ្ងៃទី៣០ខែកញ្ញាកន្លងទៅ លោក នួន វាសនា តំណាងក្រុមហ៊ុន AMB Event Group បានមានប្រសាសន៍ថា៖«ពិព័រណ៍នេះ គឺជាព្រឹត្តិការណ៍ទេសចរណ៍ដ៏សំខាន់ ក្នុងការបង្ហាញអំពីសេវាកម្មទេសចរណ៍ ដូចជាម្ហូបអាហារមានទាំងគុណភាព រសជាតិ និងអនាម័យ សេវាស្នាក់នៅពោរពេញដោយផាកសុខភាព និងភាពរីកចម្រើនផ្សេងៗទៀត ដែលពាក់ព័ន្ធទៅនឹងវិស័យទេសចរណ៍នៅកម្ពុជា»។
សូមបញ្ជាក់ថា នៅក្នុងពិព័រណ៍រយៈពេល៣ថ្ងៃនេះ សមាគមចុងភៅកម្ពុជា ក៏នឹងរៀបចំការប្រកួតម្ហូបអាហារផងដែរ ដោយមានការដាក់ពិន្ទុពីអ្នកជំនាញលំដាប់ពិភពលោក។ការប្រកួតនោះ នឹងផ្តោតលើម្ហូបចំនួន៧ គឺការធ្វើម្ហូបខ្មែរ ម្ហូបអឺរ៉ុប ម្ហូបត្រជាក់ ឆ្លាក់ផ្លែឈើ ឆ្លាក់ទឹកកក ការធ្វើម្ហូបអាថ៌កំបាំង និងបដិសណ្ឋារកិច្ច រួមមានការរៀបចំផ្កា និងគ្រែ។
បើតាមលោក ចាន់ សុភា តំណាងសមាគមចុងភៅកម្ពុជា មានហេតុផល៣ដែលសមាគមចុងភៅកម្ពុជា រៀបចំការប្រកួតនេះឡើង។ ទី១. ចង់បង្ហាញ និងធ្វើឲ្យម្ហូបខ្មែរកាន់តែល្បីល្បាញ នៅលើឆាកអន្តរជាតិ។ ទី២. បង្ហាញពីស្នាដៃចុងភៅកម្ពុជា។ និងទី៣. ចង់បង្ហាញថាកម្ពុជាក៏អាចធ្វើអ្វីបានដូចប្រទេសអភិវឌ្ឍន៍ដែរ៕
ប្រភព៖ AKP
Tag:
សៀមរាប
ពិព័រណ៍
ទេសចរណ៍
© រក្សាសិទ្ធិដោយ thmeythmey.com