សង្គមអន្តរជាតិ
អន្តរជាតិ
អ៊ីស្រាអែលស្នើឲ្យមានការចរចាសន្តិភាពជាមួយប៉ាឡេស្ទីនឡើងវិញ
× កាលថ្ងៃព្រហស្បតិ៍ ក្នុងមហាសន្និបាតអង្គការសហប្រជាជាតិមេដឹកនាំអ៊ីស្រាអែលបានទទូចឱ្យមានការចរចាឡើងវិញជាមួយប៉ាឡេស្ទីន ក្រោយការចរចាជាប់គាំងអស់ពេលជាយូរមកហើយ។ មេដឹកនាំទាំងពីរ អ៊ីស្រាអែលនិងប៉ាឡេស្ទីនក៏ឆ្លៀតឱកាសវាយប្រហារគ្នាលើការគោរពកិច្ចព្រមព្រៀងសន្តិភាពកន្លងមកដែរ។
នាយករដ្ឋមន្ត្រីអ៊ីស្រាអែលលោក បេនចាមិន ណេតាយ៉ាហ៊ូបានបញ្ជាក់ពីការត្រៀមខ្លួនបើកការចរចាជាមួយប៉ាឡេស្ទីនឡើងវិញ ដើម្បីរកដំណោះស្រាយដើម្បីសន្តិភាពនិងស្ថិរភាព។ លោកថា៖« អ៊ីស្រាអែលបានត្រៀមខ្លួនរួចជាស្រេចទៅហើយដើម្បីបន្តការចរចាជាមួយប៉ាឡេស្ទីនដោយគ្មានលក្ខខណ្ឌជាមុនអ្វីទាំងអស់»។
លោក ណេតាន់យ៉ាហ៊ូ បានសង្កត់ធ្ងន់ថា ការចរចាសន្តិភាពមិនមែនជារឿងងាយស្រួលនោះទេ ប៉ុន្តែលោកចាត់ទុកថាវាជាអ្វីដែលប្រជាជនចង់បាន ដូច្នេះរដ្ឋាភិបាលលោកចាំបាច់ត្រូវតែពុះពារសម្រេចឲ្យបាន។
លោកជឿជាក់ថា មានតែការអង្គុយជជែកគ្នានិងដោះស្រាយបញ្ហាទាំងអស់គ្នាប៉ុណ្ណោះទើបអាចធ្វើឲ្យប្រជាជាតិទាំងពីរស្គាល់សុខសន្តិភាព។ លោក ណេតាន់យ៉ាហ៊ូ ចង់ផ្តាំផ្ញើរសារនេះទៅកាន់ប្រធានអាជ្ញាធរប៉ាឡេស្ទីនលោក ម៉ាមូដ អាបាស់ ដែលបានអង្គុយក្នុងកិច្ចប្រជុំជាមួយគ្នានៅមហាសន្និបាតអង្គការសហប្រជាជាតិ។
យ៉ាងណាក៏ដោយ លោកក៏បានឆ្លៀតបរិហារមេដឹកនាំប៉ាឡេស្ទីនដូចគ្នាដែរ។លោកថា ប៉ាឡេស្ទីនមិនគួរចរចាដើម្បីតែចរចានោះទេ ហើយមិនមែនចរចាដើម្បីតម្រូវជនណាមួយដែរ។គេដឹងថាការលើកឡើងដូច្នេះជា ការឆ្លើយតបនឹងសម្ដីលោក អាបាស ដែលបង្ហាញចេតនាចង់ដកខ្លួនចេញពីការចរចា។
បើតាមសុន្ទរកថានៅមហាសន្និបាត ប្រធានអាជ្ញាធរប៉ាឡេស្ទីនលោកម៉ាមូដ អាបាស បានចោទប្រកាន់អ៊ីស្រាអែលថា បានរំលោភកិច្ចព្រមព្រៀងសន្តិភាព ដែលមានស្រាប់ កន្លងមកនោះ។ លោកថា អ៊ីស្រាអែលមិនបានដោះលែងអ្នកទោស តែគឃ្លើនបន្តការសាងសង់លំនៅដ្ឋានក្នុងទឹកដីប៉ាឡេស្ទីនទៀត។ ហើយទាំងនេះសុទ្ធតែជាសកម្មភាពរំលោភលើកិច្ចព្រមព្រៀង។ លោកថា៖ ‹‹ពួកគេមិនបានទុកផ្លូវឱ្យយើងទេ ហើយការអត់ធ្មត់របស់យើងក៏អស់ដែរ›។
សូមរម្លឹកថា ជម្លោះរវាងអ៊ីស្រាអែលនិងប៉ាឡេស្ទីននៅមិនទាន់ឈានដល់ទីបញ្ចប់នៅឡើយ។ ហើយរាល់ពេលដែលការចរចាត្រូវពន្យារដោយសារការបន្ទោសគ្នាទៅវិញទៅមកនិងការមិនគោរពកិច្ចព្រមព្រៀងដែលមានជាធរមានរបស់អ៊ីស្រាអែលនិងប៉ាឡេស្ទីន៕
© រក្សាសិទ្ធិដោយ thmeythmey.com