អន្តរជាតិ
សណ្ឋាគារប្រាសាទខ្សាច់លើកដំបូងចាប់បើកនៅប្រទេសហូឡង់ សណ្ឋាគារប្រាសាទខ្សាច់លើកដំបូងក្នុងពិភពលោកបានបើកទ្វារបម្រើអតិថិនជននៅប្រទេសហូឡង់។ សណ្ឋាគារធ្វើពីដីខ្សាច់នេះមានពីរ មួយនៅទីក្រុង Oss និងមួយទៀតនៅទីក្រុងSneek ។កន្លងមក ធ្លាប់មានតែសណ្ឋាគារធ្វើពីទឹកកក ឬសណ្ឋាគារក្រោមទឹកប៉ុណ្ណោះ។ សណ្ឋាគារប្រាសាទខ្សាច់ទាំងពីរនេះត្រូវបានសាងសង់ឡើងក្នុងក្របខ័ណ្ឌមហោស្រពរូបចម្លាក់Friesland និង Brabant ។
បន្ទប់ត្រូវបានតុបតែងដោយស្នាដៃសិល្បៈធ្វើពីដីខ្សាច់ដូចជារូបនាគឬមហាកំផែងចិនជាដើម រីឯគ្រែ និងសម្ភារប្រើប្រាស់ផ្សេងៗមានលក្ខណៈបុរាណ។ ខុសពីប្រាសាទខ្សាច់របស់កូនក្មេងសណ្ឋាគារZand ទាំងពីរមានទ្វារ បង្អួចបណ្តាញទឹកអគ្គិសនី និងបណ្តាញអ៊ីនធឺណែតផងដែរ។គេប្រើពេលត្រឹមតែ៤ សប្តាហ៍ប៉ុណ្ណោះក្នុងការសាងសង់។ គំនិតនៃការសាងសង់សណ្ឋាគារនេះបានយកតម្រាប់តាមសណ្ឋាគារធ្វើពីទឹកកកនៅប្រទេសស៊ុយអែដ និងហ្វាំងឡង់។
បន្ទប់គ្រែមួយសម្រាប់មនុស្សពីរនាក់មានតម្លៃ១៦៨ ដុល្លារក្នុងមួយយប់។សណ្ឋាគារZandទាំងពីរត្រូវបិទទ្វារនៅពេលដែលមហោស្រពរូបចម្លាក់បានបញ្ចប់។សម្រាប់ទីក្រុង Sneek សណ្ឋាគារបានបិទទ្វារហើយនៅថ្ងៃទី ២៨ កញ្ញានេះ ឯសណ្ឋាគារមួយទៀតនៅទីក្រុង Oss នឹងបិទទ្វារនៅថ្ងៃទី ៤ តុលានេះ។ សណ្ឋាគារទាំងពីរនឹងបើកទ្វារឡើងវិញក្នុងឱកាសមហោស្រពរូបចម្លាក់ឆ្នាំក្រោយ៕
© រក្សាសិទ្ធិដោយ thmeythmey.com