ជាតិ
ប៉ូលីសឃាត់ខ្លួនវៀតណាមខុសច្បាប់ ៣២នាក់ ក្នុងការដ្ឋានក្រុមហ៊ុនព្រីម៉ាលីស
× ភ្នំពេញ៖ កម្លាំងនគរបាលនៃស្នងដ្ឋាននគរបាលខេត្តកំពង់ស្ពឺ សហការជាមួយកម្លាំងអគ្គនាយកដ្ឋានអន្តោប្រវេសន៍ បានចុះឃាត់ខ្លួនជនជាតិវៀតណាម ៣២នាក់ កំពុងលាក់ខ្លួនធ្វើកម្មករសំណង់ខុសច្បាប់នៅក្នុងក្រុមហ៊ុនព្រីម៉ាលីស ក្នុងស្រុកឧដុង្គ ខេត្តកំពង់ស្ពឺ ។ នេះបើតាមការផ្សាយ លើអគ្គស្នងការដ្ឋាននគរបាលជាតិ នៅថ្ងៃទី៧ ខែតុលា ឆ្នាំ២០១៥នេះ។
ការឃាត់ខ្លួនជនជាតិវៀតណាមខុសច្បាប់ ធ្វើឡើងកាលពីថ្ងៃទី៥ ខែតុលា ឆ្នាំ២០១៥ នៅស្រុកឧដុង្គ ខេត្តកំពង់ស្ពឺ។
ស្នងការរងទទួលបន្ទុកអន្តោប្រវេសន៍លោក សម សាមួន បានឲ្យប្រភពខាងលើដឹងថា ជនជាតិវៀតណាមម្នាក់ប៉ុណ្ណោះ មានលិខិតឆ្លងដែន ចំណោមជនជាតិវៀតណាមខុសច្បាប់ ទាំង ៣២នាក់ ដែលបានជ្រៀតចូលតាមច្រកព្រំដែនកម្ពុជា។ ប៉ុន្តែក្រោយផ្ទៀងផ្ទាត់ លោកថា លិខិតឆ្លងដែនមួយនោះ គឺខុសនឹងទិដ្ឋាការ ដូចនេះពួកគេជាជនអន្តោប្រវេសន៍ ខុសច្បាប់ទាំងអស់។
សមត្ថកិច្ចបានបញ្ជូនជនអន្តោប្រវេសន៍វៀតណាមខុសច្បាប់ទាំង ៣២នាក់ មកកាន់អគ្គនាយកដ្ឋានអន្តោប្រវេសន៍នៃក្រសួងមហាផ្ទៃ ដើម្បីចាត់ការតាមនីតិវិធី៕
© រក្សាសិទ្ធិដោយ thmeythmey.com