អន្តរជាតិ
ពីថ្ងៃនេះទៅសហភាពអឺរ៉ុប បើកប្រតិបត្តិយោធាចាប់ខ្លួននិងកម្ទេចទូកដឹកជនភៀសខ្លួនខុសច្បាប់
× ជនភៀសខ្លួនរាប់ម៉ឺននាក់ បានបន្តធ្វើដំណើរផ្សងព្រេងតាមទូកដើម្បីមកកាន់តំបន់អឺរ៉ុប។ ជនភៀសខ្លួនមួយចំនួន បានបាត់បង់ជីវិត និង មួយចំនួនទៀត ត្រូវបានមេខ្យល់ បោកប្រាស់យកទៅចោលនៅក្នុងកណ្តាលសមុទ្រមីឌីទែរ៉ាណេ។ បញ្ហានេះ បានក្លាយជាវិបត្តិមួយដ៏ចម្រូងចម្រាសដែលកំពុងតែធ្វើឲ្យសមាជិកសភាពអឺរ៉ុបមើលមុខគ្នាមិនចំ។ ហើយ ចុងក្រោយនេះ សហភាពអឺរ៉ុប ចាប់ផ្តើមប្រតិបត្តិការកម្ចាត់ក្រុមអ្នកជួញដូរជនភៀសខ្លួនខុសច្បាប់ដោយប្រើប្រាស់កម្លាំងយោធាដើម្បីទប់ស្កាត់ជនភៀសខ្លួន។
សូមស្ដាប់ព័ត៌មានលម្អិត៖
គិតចាប់ពីថ្ងៃទី០៧ខែតុលានេះតទៅ Operation Sophia ជាគម្រោងនៃការប្រតិបត្តិការកម្ចាត់អ្នកជួញដូរ និង មេខ្យល់នាំជនភៀសខ្លួនតាមទូកខុសច្បាប់មកកាន់តំបន់អឺរ៉ុប នៅក្នុងមហាសមុទ្រមីឌីទែរ៉ាណេ នឹងមានអនុភាពហើយ។ ប្រតិបត្តិការនេះ នឹងអាចជួយទប់ស្កាត់នូវលំហូរនៃជនភៀសខ្លួនរាប់ម៉ឺននាក់មកកាន់តំបន់ អឺរ៉ុបដែលកំពុងធ្វើឲ្យមានវិបត្តិចម្រូងចម្រាសក្នុងចំណោមសមាជិកសហភាពអឺរ៉ុប។
១. តើអ្វីជាប្រតិបត្តិការ Sophia ?
Sophia គឺឈ្មោះរបស់ក្មេងស្រីម្នាក់ដែលត្រូវបានគេសង្គ្រោះនៅលើទូកនៅសមុទ្រមីឌីទែរ៉ាណេដែលធ្វើដំណើរមកកាន់តំបន់អឺរ៉ុប។ ឈ្មោះនេះ ត្រូវបានរដ្ឋមន្ត្រីការបរទេសហភាពអឺរ៉ុប សម្រេចដាក់ជាឈ្មោះប្រតិបត្តិកម្ចាត់ក្រុមអ្នកនាំជនភៀសខ្លួនខុសច្បាប់មកកាន់អឺរ៉ុបដែលជាយន្តការទី១ក្នុងដំណាក់ទី២នៃការទប់ស្កាត់ជនភៀសមកកាន់អឺរ៉ុប។ ប្រតិបត្តិការ Sophia ផ្តល់លទ្ធភាពឲ្យយោធា អាចតាមចាប់អ្នកជួញដូរជនភៀសខ្លួនខុសច្បាប់ រឹបអូសទូកដឹកជនភៀសខ្លួន និង កម្ទេចទូកទាំងនោះផងដែរ។ ហើយប្រតិបត្តិការនេះ ផ្តោតទៅលើតំបន់សមុទ្រមីឌីទែរ៉ាណេ។
២. រដ្ឋណាខ្លះបានចាប់ផ្តើមប្រតិបត្តិយន្តការនេះ?
មកពេលនេះ មានរដ្ឋសមាជិកសហភាពអឺរ៉ុបចំនួនប្រាំហើយ បានចាប់ផ្តើមអនុវត្តយន្តការនៃការប្រតិបត្តិការ Sophia។ ក្នុងនោះអ៊ីតាលី (បញ្ជូនយន្តហោះដឹកអ្នកដំណើរ) បារាំង(បញ្ជូននាវាចម្បាំង) អង់គ្លេស (នាវាមួយគ្រឿង) អេស្ប៉ាញ(នាវាមួយគ្រឿង) និង អាល្លឺម៉ង់(នាវាពីរគ្រឿង)។ ជុំវិញប្រតិបត្តិការនេះដែរ មិនទាន់ទទួលរងការអនុញ្ញាតពីអង្គការសហប្រជាជាតិ និង រដ្ឋាភិបាលលីប៊ីនោះ។ហើយ មតិរិះគន់មួយចំនួន បានលើកឡើង សកម្មភាពនេះ គឺបំពានទៅនឹងដែនអធិបតេយ្យរបស់លីប៊ីផងដែរ ។
៣. ការវិវត្តចុងក្រោយនៃវិបត្តិជនភៀសខ្លួនរបស់សហភាពអឺរ៉ុប
ជុំវិញនៃបញ្ហាជនភៀសខ្លួន គេសង្កេតថាចុងក្រោយនេះ រដ្ឋមន្ត្រីមហាផ្ទៃសហភាពអឺរ៉ុប បានអនុម័តកំណត់កូតាទទួលយកជនភៀសខ្លួនប្រមាណជាងដប់ម៉ឺននាក់ដើម្បីមករស់នៅក្នុងតំបន់អឺរ៉ុប។ ក៏ប៉ុន្តែ ការទទួលយកនេះ បានធ្វើឲ្យមានចម្រូងចម្រាសក្នុងចំណោមសមាជិកសហភាពអឺរ៉ុប ដ្បិតមិនមានការ គាំទ្រជាឯកច្ឆ័ន ហើយកំពុងតែធ្វើឲ្យសមាជិកមើលមុខគ្នាមិនចំ។ អ្វីដែលធ្ងន់ធ្ងរនោះ ហុងគ្រី បានបង្កើតច្បាប់តឹងរឹង អនុញ្ញាតឲ្យយោធាអាចទប់ស្កាត់ជនភៀសខ្លួន និង ដាក់របងលួសនៅតាមព្រំដែន ដែលបានបើកដោយសេរី២ទសវត្សរ៍មិនជនភៀសខ្លួនចូលទៅកាន់តំបន់អឺរ៉ុបទៀតផង។
ទោះចង់ឬមិនចង់ អឺរ៉ុប ត្រូវអនុវត្តវិធានការក្តៅតាមរយៈប្រតិបត្តិការយោធាដើម្បីកម្ចាត់នូវប្រភពដើមដែលនាំជនភៀសខ្លួនមកកាន់អឺរ៉ុប។
សូមរម្លឹកផងដែរក្នុងឆ្នាំ២០១៥នេះ មានជនភៀសខ្លួនដែលចេញពីតំបន់អាហ្វ្រិកខាងជើងមកកាន់អឺរ៉ុប ប្រមាណជាងដប់ម៉ឺននាក់។ ក្នុងនោះ មានជនភៀសខ្លួនប្រមាណជាងពីរពាន់នាក់ បានស្លាប់ ដោយសារលិចទូក និង ចាញ់បោកមេខ្យល់នៅកណ្តាលសមុទ្រ៕
© រក្សាសិទ្ធិដោយ thmeythmey.com