អន្តរជាតិ
នយោបាយអន្តរជាតិ
លោក ពូទីនបញ្ជានាវាចម្បាំងឲ្យបាញ់ផ្លោងលើក្រុមរដ្ឋឥស្លាមនៅស៊ីរីពីសមុទ្រកាព្យែន
× នាវាចម្បាំងរុស្ស៊ីជាច្រើនគ្រឿងដែលសំចតនៅសមុទ្រកាព្យែន (Caspian) បានចាប់ផ្តើមបាញ់ផ្លោងគ្រាប់យ៉ាងច្រើនស្រោចលើទីតាំងសំខាន់ៗជាច្រើនកន្លែងដែលកាន់កាប់ដោយក្រុមរដ្ឋឥស្លាមនៅក្នុងប្រទេសស៊ីរីនៅថ្ងៃពុធនេះ។ ការវាយប្រហារចេញពីនាវាចម្បាំងនេះជាសកម្មភាពថ្មីមួយទៀត ដែលកើតឡើងក្រោយពីក្រុងម៉ូស្គូបញ្ជាឲ្យកងទ័ពជើងអាកាសទម្លាក់គ្រាប់បែកលើក្រុមរដ្ឋឥស្លាមដោយសហការជាមួយកងទ័ពរដ្ឋាភិបាលស៊ីរីសប្តាហ៍មុន។
ថ្ងៃពុធនេះកងទ័ពជើងទឹករុស្ស៊ីបានចាប់ផ្តើមបាញ់ផ្លោងគ្រាប់មីស៊ីលរយៈចម្ងាយវែងចេញពីសមុទ្រកាព្យែនឆ្ពោះទៅរកទីតាំងសំខាន់ៗដែលក្រុមរដ្ឋឥស្លាមកាន់កាប់ក្នុងទឹកដីស៊ីរី។ ជំុវិញការប្រើប្រាស់នាវាចម្បាំងនេះ រដ្ឋមន្ត្រីក្រសួងការពារជាតិរុស្ស៊ីលោក Sergei Shoigu បានអះអាងថា កងកម្លាំងជើងទឹកដីរុស្ស៊ីបានបាញ់គ្រាប់រ៉ុហ្កែតរយៈចម្ងាយឆ្ងាយចំនួនជាង២០គ្រាប់ពីនាវាចម្បាំងចំនួន៤គ្រឿង។ បើតាមសម្តីប្រមុខការពារជាតិខាងលើដែលដកស្រង់ដោយសារព័ត៌មានរដ្ឋរុស្ស៊ី RT គោលដៅសំខាន់របស់នៃប្រតិបត្តិការនេះគឺមានចំនួន១១ ហើយគោលដៅទាំងនេះត្រូវបានកម្ទេចហើយ។
នេះជាសកម្មភាពយោធាមួយថ្មីបំផុតដែលរុស្ស៊ីប្រើប្រាស់ បន្ទាប់ពីសម្រេចចិត្តធ្វើសង្គ្រាមផ្លូវអាកាសជាមួយក្រុមរដ្ឋឥស្លាមនៅក្នុងប្រទេសស៊ីរី និងគាំទ្រកងកម្លាំងអាសាស្ម័គ្រលោក បាសា អាល់អាសាដ។ ការវាយប្រហារតាមផ្លូវអាកាសរបស់រុស្ស៊ីនៅទើបចាប់ផ្តើមកាលពីដើមសប្តាហ៍មុនប៉ុណ្ណោះ។
ចំណែកប្រធានាធិបតីរុស្ស៊ីលោក វ្ល៉ាឌីមៀ ពូទីន ឯណោះវិញបានកោតសរសើរកងទ័ពរុស្ស៊ីដែលកំពុងច្បាំងប្រកៀកស្មារជាមួយកងម្លាំងលោក អាសាដ នៅស៊ីរីដើម្បីប្រឆាំងក្រុមរដ្ឋឥស្លាមផងដែរ។ ក្រៅពីកោតសរសើេរកងទ័ពរុស្ស៊ី លោក ពូទីន បានប្រកាសទាត់ចោលការចោទប្រកាន់ជាថ្មីម្តងទៀតជុំវិញការចោទប្រកាន់រុស្ស៊ីថាកំពុងប្រើប្រាស់អន្តរាគមន៍នៅស៊ីរីជាលែសកម្ចាត់ក្រុមឧទ្ទាមប្រឆាំងរដ្ឋាភិបាល។ លោក សង្កត់ធ្ងន់ថាគោលដៅនៃការវាយប្រហារគឺមានតែក្រុមរដ្ឋឥស្លាមប៉ុណ្ណោះ។
សូមបញ្ជាក់ថា រុស្ស៊ីបានពង្រាយកងទ័ពរបស់ខ្លួនទៅកាន់មូលដ្ឋានយោធាខ្លួនក្នុងប្រទេសស៊ីរីចំនួនប្រហែល៥០០នាក់ ហើយក្រៅពីនេះមានរថក្រោះ រថពាសដែក មីស៊ីល រួមជាមួយយន្តហោះចម្បាំងស៊េរីទំនើបមិនតិចជាង៥០គ្រឿងឡើយ ដើម្បីច្បាំងប្រឆាំងក្រុមរដ្ឋឥស្លាម។ ប៉ុន្តែសហរដ្ឋអាមេរិក និងបារាំងជាដើមបានដាក់ការសង្ស័យ និងចោទរុស្ស៊ីថា ក្រៅពីវាយប្រហារលើក្រុមរដ្ឋឥស្លាម កងទ័ពទាំងនោះក៏ជួយទ័ពលោក អាសាដ វាយប្រហារក្រុមឧទ្ទាមដែលខ្លួនចំណាយរាប់រយលានដុល្លារបង្វឹកឲ្យប្រឆាំងរដ្ឋាភិបាលក្រុងដាម៉ាសផងដែរ៕
© រក្សាសិទ្ធិដោយ thmeythmey.com