ជាតិ
វត្ដវាលធំ អត្ដខាត់ទទួលបានការចូលរួមដាក់បិណ្ឌពី វិទ្យាស្ថាន និងសាលារៀន អន្តរទ្វីប អាមេរិកាំង
× នៅរដូវកាលបុណ្យភ្ជុំបិណ្ឌនេះ គណៈគ្រប់គ្រងវិទ្យាស្ថាន និងសាលារៀន អន្តរទ្វីប អាមេរិកាំង រួមទាំងលោកគ្រូ អ្នកគ្រូ និងបុគ្គលិកចំនួន៥២៥នាក់ បានទៅដាក់បិណ្ឌវេនទី៧ នៅវត្ដវាលធំ ដែលជាវត្តអត្ដខាត់ ស្ថិតក្នុងភូមិវត្ដវាលធំ ឃុំក្រែងត្រយឹង ស្រុកភ្នំស្រួច ក្នុងខេត្តកំពង់ស្ពឺ កាលពីព្រឹកថ្ងៃទី០៤ ខែតុលា ឆ្នាំ២០១៥ កន្លងទៅនេះ។
លោកស្រី ឡា សុភៈ គណៈគ្រប់គ្រងនៃវិទ្យាស្ថាន និងសាលារៀន អន្តរទ្វីប អាមេរិកាំង បានឱ្យដឹងថា ការដាក់បិណ្ឌនេះជាការមូលមតិគ្នាជាឯកឆន្ទពីសំណាក់គណៈគ្រប់គ្រងសាលា លោកគ្រូ អ្នកគ្រូ និងបុគ្គលិកនៃវិទ្យាស្ថាន និងសាលារៀន អន្តរទ្វីប អាមេរិកាំង ដើម្បីនាំយកនូវទេយ្យទានមួយចំនួនដែលទទួលបានពីលោកគ្រូ អ្នកគ្រូ បុគ្គលិក សិស្សានុសិស្ស និងសប្បុរសជននានាក្នុងសកម្មភាពសប្បុរសធម៌កន្លងមក រួមទាំងបច្ច័យ និងទេយ្យវត្ថុមួយចំនួនធំដែល វិទ្យាស្ថាន និងសាលារៀន អន្តរទ្វីប អាមេរិកាំង រៀបចំឡើងដើម្បីយកទៅវេរប្រគេនដល់ព្រះសង្ឃឧទ្ទិសមគ្គផលកុសលផលបុណ្យជូនដល់ញាតិការ បុព្វការីជន ដែលបានចែកឋានទៅកាន់បរលោកខាងមុខ ទោះបីបុព្វការីជននៅទិសទីណាក្តី ក៏សូមអញ្ជើញមកអនុមោទនាទទួលយកនូវភោគផលដែលកូនចៅបានឧទ្ទិសជូនក្នុងឱកាសវេលាបុណ្យភ្ជុំបិណ្ឌនេះ។
គួរបញ្ជាក់ដែរថា ទេយ្យទានដែលវិទ្យាស្ថាន និងសាលារៀន អន្តរទ្វីប អាមេរិកាំង បាននាំយកទៅប្រគេនដល់វត្តក្នុងពិធីដាក់បិណ្ឌវេនទី៧នេះរួមមាន ទៀន ធូប មីចំនួន១០កេះ ទឹកក្រូច៥កេះ ទឹកផ្លែឈើ៥កេះ ទឹកសុទ្ធ៥កេះ សៀង១៥គីឡូក្រាម ឆៃប៉ូវ១៥គីឡូក្រាម អំបិល១០គីឡូក្រាម ស្ករស៥គីឡូក្រាម ប៊ីចេង២គីឡូក្រាម ត្រីខ២ឡូ ប្រេងឆា៥លីត្រ ទឹកត្រី២ឡូ ទឹកស៊ីអីវ២ឡូ និងអង្ករ១០០គីឡូក្រាម ជូនដល់វត្តវាលធំ ព្រមទាំងបានប្រគេននូវបច្ច័យ និងទេយ្យទានដល់ព្រះសង្ឃ និងចែកជូននូវថវិកា និងក្រមាដល់គណៈកម្មការវត្ត និងលោកយាយ លោកតាចំនួន២០នាក់ ដែលបានអញ្ជើញមកចូលរួមពិធីដាក់បិណ្ឌនេះផងដែរ៕
© រក្សាសិទ្ធិដោយ thmeythmey.com