ជាតិ
តុលាការសម្រេចឃុំខ្លួនស្ត្រីជេរប្រមាថសមត្ថកិច្ច ក្នុងករណីគ្រោះថ្នាក់ចរាចរណ៍
× ភ្នំពេញ៖ សាលាដំបូងខេត្តបាត់ដំបងបានសម្រេចឃុំខ្លួនស្ត្រីម្នាក់ដែលបើករថយន្តបង្កគ្រោះថ្នាក់ចរាចរណ៍ និងជេរប្រមាថសមត្ថកិច្ចបណ្តោះអាសន្ន ដើម្បីរង់ចាំបើកការស៊ើបសង្កេតតាមនីតិវិធី បន្ទាប់ពីកម្លាំងនគរបាលខេត្តបាត់ដំបងចាប់បញ្ជូនខ្លួនស្ត្រីរូបនោះ ឡើងកាន់តុលាការ កាលពីព្រឹកថ្ងៃទី៨ ខែតុលា ឆ្នាំ២០១៥ ។ នេះបើតាមការចុះផ្សាយរបស់អគ្គស្នងការដ្ឋាននគរបាលជាតិ នៅថ្ងៃទី៩ តុលានេះ។
ព្រះរាជអាជ្ញារងអមសាលាដំបូងខេត្តបាត់ដំបង ចោទប្រកាន់ស្ត្រីសង្ស័យពីបទបើកបរបណ្តាលឱ្យគ្រោះថ្នាក់ដល់អ្នកដទៃដោយចេតនា ហើយរត់គេចខ្លួន និងបទប្រមាថមកលើ សមត្ថកិច្ចកំពុងអនុវត្តច្បាប់។ បើតាមប្រភពនគរបាលជាតិ ស្ត្រីជាប់ចោទឈ្មោះ សូ ដាម៉ុន អាយុ៤០ឆ្នាំ ជាស្ត្រីមេម៉ាយមានកូន១ ប្រកបមុខរបរបើកហាងសំអាងការ មានទីលំនៅបច្ចុប្បន្ននៅភូមិត្រពាំងព្រលិត ឃុំសន្តិភាព ស្រុកសំពៅលូន ខេត្តបាត់ដំបង ត្រូវបាននគរបាលស្រុកសំពៅលូន ចាប់ឃាត់ខ្លួន កាលពីល្ងាចថ្ងៃទី៧ ខែតុលា ឆ្នាំ២០១៥ នៅលើកំណាត់ផ្លូវជាតិលេខ៥៩ B ស្ថិតក្នុងភូមិវាលវង់ ឃុំតាស្តា ស្រុកសំពៅលូន ខណៈពេលស្ត្រីជាប់ចោទធ្វើដំណើរចេញពីប្រទេសថៃ ចូលមកដីខ្មែរវិញ។
កន្លងទៅ អគ្គស្នងការរងនគរបាលជាតិ និងជាមេបញ្ជាការនគរបាលជាតិទទួលទិសយោធភូមិភាគ៤និងភូមិភាគ៥ លោក ខេង សុមេធ ក៏បានចេញបទបញ្ជាឱ្យនគរបាលខេត្តបាត់ដំបងស្វែងរកចាប់ឃាត់ខ្លួនស្ត្រីឈ្មោះ សូ ដាម៉ុន ដើម្បីយកមកផ្តន្ទាទោសតាមផ្លូវច្បាប់។ គួររម្លឹកថា កាលពីម៉ោង៨កន្លះយប់ថ្ងៃទី១៩ ខែកញ្ញា ឆ្នាំ២០១៥ ស្ត្រីឈ្មោះ សូ ដាម៉ុន បានបើករថយន្តទំនើបម៉ាក AUDI ១គ្រឿងពណ៌សពាក់ស្លាក លេខភ្នំពេញ 2AG 7576 ក្នុងស្ថានភាពស្រវឹង បង្កគ្រោះថ្នាក់ទៅលើស្ត្រីម្នាក់កំពុងជិះកង់បណ្តាលឱ្យរងរបួសធ្ងន់ធ្ងរ នៅលើផ្លូវជាតិលេខ៥៩b ស្ថិតនៅចំណុចត្រាវជូ ក្នុងភូមិអូរចំណិត ឃុំ តាស្តា ស្រុកសំពៅលូន ។ នៅពេលកើតហេតុគេឃើញនគរបាលម្នាក់បានទៅសួរនាំ ពេលនោះស្ត្រីឈ្មោះ សូ ដាម៉ុន បានជេរប្រមាថមើលងាយមកលើនគរបាលរូបនោះ កំពុងតែបំពេញភារកិច្ច៕
© រក្សាសិទ្ធិដោយ thmeythmey.com