ជាតិ
សង្គមជាតិ
កម្ពុជាធ្វើជាម្ចាស់ផ្ទះរៀបចំទិវាអាស៊ានសម្រាប់ការគ្រប់គ្រងគ្រោះមហន្តរាយ ឆ្នាំ ២០១៥
×![]()
ដោយ: ថ្មីៗ
ភ្នំពេញ៖ កម្ពុជាបានធ្វើជាម្ចាស់ផ្ទះប្រារព្វទិវាអាស៊ានស្តីពី ការគ្រប់គ្រងគ្រោះមហន្តរាយ និងទិវា អន្តរជាតិកាត់បន្ថយគ្រោះមហន្តរាយ រយៈពេល ២ថ្ងៃ គឺចាប់ពីថ្ងៃទី ០៩ ដល់ ១០ ខែតុលា ឆ្នាំ២០១៥ ក្រោមប្រធានបទ «អាស៊ានធន់នឹងគ្រោះមហន្តរាយតែមួយ» នៅមជ្ឈមណ្ឌលសហប្រតិបត្តិការកម្ពុជា-កូរ៉េ (CKCC)។
គណៈកម្មាធិការគ្រប់គ្រងគ្រោះមហន្តរាយអាស៊ាន សហការជាមួយលេខាធិការអាស៊ាន និងអង្គការដៃគូពាក់ព័ន្ធ ប្រារព្វទិវាអាស៊ានស្តីពីការគ្រប់គ្រងគ្រោះមហន្តរាយ និងទិវាអន្តរជាតិ កាត់បន្ថយគ្រោះមហន្តរាយ ក្នុងឆ្នាំ២០១៥នេះ បន្ទាប់ពីប្រទេសថៃជាម្ចាស់ផ្ទះក្នុងឆ្នាំ ២០១។ អ្នកចូលរួមជាង ២ពាន់នាក់ តំណាងមកពីបណ្តាប្រទេសសមាជិកអាស៊ាន លេខាធិការដ្ឋាន អាស៊ាន ទេសរដ្ឋមន្ត្រី តំណាងស្ថានទូត ទីភ្នាក់ងារអង្គការសហប្រជាជាតិ ដៃគូអភិវឌ្ឍ តំណាងរាជរដ្ឋាភិបាលកាកបាទក្រហមកម្ពុជា ក្រុមអង្គការសង្គមស៊ីវិល តំណាងសហគមន៍ ក្រុមយុវជន និងវិស័យឯកជននឹងចូលរួមក្នុងកម្មវិធីនេះ។
ប្រធានបទទិវាអាស៊ានសម្រាប់ការគ្រប់គ្រងគ្រោះមហន្តរាយឆ្នាំនេះ ឆ្លុះបញ្ចាំងពីកិច្ចខិតខំប្រឹងប្រែងរួមនៃបណ្តាប្រទេសអាស៊ានដែលជាសហគមន៏តែមួយក្នុងការចូលរួមចំណែកដោះស្រាយបញ្ហាពាក់ព័ន្ធនឹងគ្រោះមហន្តរាយធម្មជាតិ បំរែបំរួលអាកាសធាតុ និងការអភិវឌ្ឍន៍ប្រកបដោយចីរភាព។
អគ្គលេខាធិការរងនៃគណៈកម្មាធិការជាតិគ្រប់គ្រងគ្រោះមហន្តរាយ និងជាប្រធានគណៈ កម្មាធិការគ្រប់គ្រងគ្រោះមហន្តរាយអាស៊ាន លោក រស់ សុវណ្ណ បានមានប្រសាសន៍ថា ប្រធានបទផ្តោតសំខាន់ក្នុងឆ្នាំនេះ ផ្តោតលើការលើកកម្ពស់ការយល់ដឹងអំពីអាស៊ានស្តីពី សហគមន៍តែមួយធន់នឹងគ្រោះមហន្តរាយ និងការប្រែប្រួលអាកាសធាតុ តាមរយៈការលើក កម្ពស់ឳ្យបានគ្រប់ជ្រុងជ្រោយ ចំពោះគម្រោងសុវត្ថិភាពតាមសាលារៀននិងការបង្កើនការ ឆ្លើយតបរបស់អាស៊ានស្តីអំពីការប្រែប្រួលអាកាសធាតុ។ លោកថា៖«រាជរដ្ឋាភិបាលកម្ពុជានិងសហគមន៍អន្តរជាតិបាននឹងកំពុងធ្វើការរួមគ្នាដើម្បីឆ្លើយតបទៅនឹងផលប៉ះពាល់ពីការប្រែប្រួលអាកាសធាតុតាមរយៈសកម្មភាពសំខាន់ៗដូចជា ការត្រៀមរៀបចំ ការឆ្លើយតប ការកាត់បន្ថយ និងការបន្ស៊ាំ»។
យោងតាមរបាយការណ៍ហានិភ័យឆ្នាំ២០១៤ របស់អង្គការសហប្រជាជាតិ ប្រទេសកម្ពុជាជាប្រទេសទី៩ ដែលងាយរងគ្រោះជាងគេ ក្នុងករណីគ្រោះមហន្តរាយនៅលើពិភពលោក ហើយវាជាឧបសគ្គដល់ដំណើរការអភិវឌ្ឍន៍សម្រាប់ប្រទេសកម្ពុជា។ ប្រជាជនកម្ពុជាចំនួន ១៦៥៥១៦នាក់ ក្នុងនោះ ប្រជាជនចំនួន ៤៩នាក់បានស្លាប់បាត់បង់ជីវិត ក្នុងករណីគ្រោះទឹកជំនន់ក្នុងឆ្នាំ ២០១។ តួលេខនេះមិនបានគិតរួមបញ្ចូល អំពីការខូចខាតធ្ងន់ធ្ងរ និងការបំផ្លិចបំផ្លាញលើដីកសិកម្មជាច្រើនពាន់ហិចតារបស់ប្រជាជន ការចិញ្ចឹមសត្វ ហេដ្ឋារចនាសម្ព័ន្ធ និងរបរចិញ្ចឹមជីវិតរបស់ពួកគេ ជាពិសេសគឺ ប្រជាជនក្រីក្រ។
ជាងនេះទៀត គ្រោះទឹកជំនន់បានធ្វើឳ្យប៉ះពាល់ដល់វិស័យសំខាន់ៗ មួយចំនួន ដូចជា វិស័យកសិកម្ម សេដ្ធកិច្ច សុខភាព និងអប់រំជាដើម។ យោងតាមក្រសួងបរិស្ថាន ទឹកប្រាក់ប្រមាណ ១.២កោដិលានដុល្លាសហរដ្ឋអាមេរិក ត្រូវចំណាយទៅលើការឆ្លើយតបនឹងការប្រែប្រួលអាកាសធាតុសម្រាប់រយៈពេល ៥ឆ្នាំ ចាប់ពីឆ្នាំ២០១៤ ទៅឆ្នាំ ២០១៨ ។
គួរបញ្ជាក់ថា ប្រទេសកម្ពុជាបានដាក់បញ្ចូលកម្មវិធីគ្រប់គ្រងគ្រោះមហន្តរាយ និងកម្មវិធីបន្ស៊ាំទៅនឹងការប្រែប្រួលអាកាសធាតុទៅក្នុងផែនការយុទ្ធសាស្ត្រអភិវឌ្ឍជាតិ។ បច្ចុប្បន្ន រដ្ឋាភិបាលកម្ពុជាកំពុងរៀបចំផែនការដើម្បីប្រយុទ្ធប្រឆាំងទៅនឹងការប្រែប្រួលអាកាសធាតុ ក្រោមពិធីសារនៃក្របខ័ណ្ឌរបស់អង្គការសហប្រជាជាតិដែលហៅថា ផែនការបម្រុងជាតិ តូបនីយកម្ម ដើម្បីកំណត់បរិវិសទាន (ចំនួនប្រាក់ដែលអ្នកចុះកិច្ចសន្យាត្រូវបង់) នៅក្នុងកិច្ចប្រជុំនាទីក្រុងប៉ារីស ប្រទេសបារាំង នៅចុងឆ្នាំ ២០១៥ខាងមុខនេះ៕
© រក្សាសិទ្ធិដោយ thmeythmey.com
