ជាតិ
នី រតនា ក្លាយជាម្ចាស់ពាន Cambodian Idol រដូវកាលទី១
× នី រតនា បានក្លាយជាម្ចាស់ពាននៃកម្មវិធីប្រឡងចម្រៀង Cambodian Idol រដូវកាលទីមួយរបស់ទូរទស្សន៍ហង្សមាស បន្ទាប់ពីរូបគេបានទទួលសារគាំទ្រច្រើនបេក្ខជនពីរនាក់ទៀត គឺ ម៉ៅ ហាជី និងសៅ ឧត្តម នៅវគ្គផ្តាច់ព្រ័ត្រនារាត្រីថ្ងៃអាទិត្យ ទី១ ខែវិច្ឆិកា ដោយមានលោក ខៀវ កាញារីទ្ធ រដ្ឋមន្ត្រីក្រសួងព័ត៌មាន ចូលរួមធ្វើជាអធិបតីភាព។
នៅជុំទីមួយ បេក្ខជនផ្តាច់ព្រ័ត្រទាំងបីរូប ត្រូវបានតម្រូវឲ្យបកស្រាយបទចម្រៀងដែលទាក់ទងនឹងខេត្តកំណើតរបស់ខ្លួន។ នី រតនា ដែលមកពីខេត្តកំពង់ធំ ច្រៀងបទ «សម្រស់បុប្ឆាកំពង់ធំ» ខណៈ ម៉ៅ ហាជី ពីខេត្តបាត់ដំបងលើកយកបទ «រដួលដងស្ទឹងសង្កែ» មុនពេលដែលបេក្ខជនពីខេត្តស្វាយរៀង សៅ ឧត្តម បង្ហើរសំនៀងជាមួយបទ «បុប្ឆាស្វាយរៀង» ។
ឈានដល់ជុំទីពីរ បេក្ខជនទាំងអស់ ត្រូវលើកបទសម័យថ្មីមកច្រៀង។ ម៉ៅ ហាជី លើកយកបទ «ឈឺចាប់បន្តិចម្តង» មកបកស្រាយមុនគេ បន្ទាប់មក សៅ ឧត្តម ច្រៀងបទ «ដល់ពេលវេលាបែកទើបថាបងមិនស័ក្តិសម» មុនពេល នី រតនា បកស្រាយបទ «ស្រលាញ់អូនមិនខ្វល់ពីអារម្មណ៍អ្នកដទៃ»។
ជុំទីបីឈានដល់ការបកស្រាយបទចម្រៀងញាក់កន្ត្រាក់អារម្មណ៍។ នៅជុំនេះ សៅ ឧត្តម ឡើងច្រៀងមុនគេជាមួយនឹងបទ «រាំចង្វាក់ Rock & Roll» នី រតនា បកស្រាយបទ «យុវជនខូចចិត្ត» និង ម៉ៅ ហាជី ច្រៀងបទ «ម៉ាកស៊ី នារីថ្មី»។
នៅជុំចុងក្រោយ អ្នកទាំងបី បកស្រាយបទចម្រៀងតែមួយរួមគ្នា គឺបទ « ក្រោកឈរ» របស់កញ្ញា ឱក សុគន្ធកញ្ញា ដែលជាសមាជិកគណៈកម្មការមួយរូប។
នី រតនា ដែលជាម្ចាស់ពានរង្វាន់ បានទទួលទឹកប្រាក់១០០លានរៀល រួមទាំងប្រាក់ និងរង្វាន់លើកទឹកចិត្តផ្សេងទៀត រីឯម៉ៅ ហាជី និង សៅ ឧត្តម ក៏ទទួលបានប្រាក់ និងរង្វាន់លើកទឹកចិត្តជាច្រើនផងដែរពីម្ចាស់ស្ថានីយ៍ និងអ្នកឧបត្ថម្ភកម្មវិធី៕
© រក្សាសិទ្ធិដោយ thmeythmey.com