ជាតិ
ទូតអាមេរិកជូនពរ នី រតនា ឲ្យមានអនាគតភ្លឺស្វាង ដូចជ័យលាភី American Idol
× នី រតនា ជ័យលាភីនៃកម្មវិធី Cambodian Idol ក៏ទទួលបាននូវការចាប់អារម្មណ៍ពីសំណាក់ស្ថានទូតអាមេរិកប្រចាំនៅ កម្ពុជាផងដែរ។ មិនមានអ្វីដែលគួរឲ្យងឿងឆ្ងល់នោះពីព្រោះកម្មវិធីប្រឡងចម្រៀងនេះ ត្រូវបានទូរទស្សន៍ហង្សមាស ទិញសិទ្ធិពី American Idol របស់សហរដ្ឋអាមេរិក។
តាមរយៈទំព័រហ្វេសប៊ុកផ្លូវការខ្លួន ស្ថានទូតអាមេរិកប្រចាំប្រទេសកម្ពុជា បានសរសេរជាភាសាអង់គ្លេស និងភាសាខ្មែរ ជាមួយនឹងពាក្យជូនដល់ នី រតនា បេក្ខជនមកពីខេត្តកំពង់ធំ ដែលជាប់ជ័យលាភី Cambodian Idol រដូវកាលទីមួយ ក្រោយឆ្លងការប្រកួតប្រជែងអស់រយៈ៦ខែ។
ស្ថានទូតអាមេរិក បានកត់សម្គាល់ថា៖ «មុនពេលពួកគេបានក្លាយជាកំពូលតារា សិល្បករដូចជា Kelly Clarkson និង Carrie Underwood បានចាប់ផ្តើមពីការឈ្នះជ័យលាភីពីកម្មវិធី American Idol។ ដូច្នេះ អនាគតគឺភ្លឺស្វាងសម្រាប់ នី រតនា ហើយយើងសូមជូនពរគាត់អោយទទួលបានជោគជ័យជាបន្តបន្ទាប់។ សូមចូលរួមជាមួយយើងក្នុងការនិយាយថា សូមអបអរសាទរ!» ៕
© រក្សាសិទ្ធិដោយ thmeythmey.com