ជាតិ
ដាំត្រកួនខ្លួនឯង តែមិនហ៊ានហូប ព្រោះខ្លាច«ស្លាប់»
× ភ្នំពេញ៖ សុវត្ថិភាពចំណីអាហារ ម្ហូបអាហារនៅក្នុងប្រទេសកម្ពុជា គឺជារឿងដែលពលរដ្ឋខ្មែរភាគច្រើនព្រួយបារម្ភ។ ប៉ុន្តែ ចំណាត់ការ ឬវិធានការទប់ស្កាត់ ឬមធ្យោបាយដោះស្រាយសមរម្យណាមួយ មិនទាន់ត្រូវបានស្ថាប័នជំនាញយកចិត្តទុកដាក់នៅឡើយទេ។ សារព័ត៌មានក្រៅប្រទេសមួយចំនួននិយាយថា ពលរដ្ឋខ្មែរកំពុងពិសាថ្នាំពុល។
ម៉ោងប្រមាណជា៦កន្លះព្រឹក ព្រះអាទិត្យបានបញ្ចេញកាំរស្មីពីទិសខាងកើតជះទៅលើចម្ការដាំត្រកួននៅលើផ្ទៃទឹកបឹងទំពុនស្ថិតនៅខាងត្បូងទីក្រុងភ្នំពេញ។ តំបន់នេះ គឺជាគម្រោងអភិវឌ្ឍន៍ថ្មី តែវានៅមាននៅឡើយជំនួញដាំត្រកួន។
លាតសន្ធឹងលើផ្ទៃទឹកច្រើនហិកតា ត្រកួនលាស់ខៀវខ្ចី មើលទៅទំនងជាដុះដោយសារឥទ្ធិពលនៃកាំរស្មីព្រះអាទិត្យ និងទឹកស្អុយធម្មជាតិ។ ប៉ុន្តែ ការពិត វាមិនអ៊ីចឹងពេកទេ។ នៅពេលដែលគេឈានជើងចូលទៅកៀកចម្ការត្រកួនដាំលើទឹកបន្តិច, កម្មករថែទាំការដាំត្រកួនកំពុងតែប្រើប្រាស់សារជាតិគីមីដើម្បីជំរុញឲ្យត្រកួនដុះកាន់តែឆាប់ធំ និងលាស់ខ្ចីបៃតង។ ដឹងដែរពីគ្រោះថ្នាក់ដល់សុខភាព និងអាយុជីវិត។ ប៉ុន្តែប្រាក់ចំណូលខ្ពស់ និងក្រពះស្រែកឃ្លានរបស់អ្នកដាំមានទំហំធំជាងបញ្ហាសុខភាពទៅទៀត។
មាឌដំបងបន្តិច សម្បុរខ្មៅ បុរស សំណាង ដែលអះអាងថា រូបគាត់បានដាំត្រកួនអស់រយៈពេលប្រមាណជា២០ឆ្នាំមកហើយនោះ បាននិយាយដោយស្មោះត្រង់ថា អ្នកដាំត្រកួនគ្រប់គ្នាដឹងពីគ្រោះថ្នាក់បណ្តាលមកពីការប្រើប្រាស់សារជាតិគីមី។ ប៉ុន្តែ ពួកគេមិនដឹងថា តើត្រូវធ្វើយ៉ាងដូចម្តេចទេ។ អ្នកជំនាញដាំត្រកួនរូបនេះបាននិយាយត្រង់ៗថា៖«ខ្ញុំដាំ តែខ្ញុំមិនហូបទេ។ ខ្ញុំធ្លាប់ពុលម្តង រាគធ្ងន់ធ្ងរណាស់»។ អ្វីដែលគួរឲ្យភ្ញាក់ផ្អើលនោះ គឺលោក សំណាង បានបញ្ជាក់ថា ប្រសិនបើគេបាញ់ថ្នាំលើត្រកួនពីល្ងាច ព្រឹកឡើង ត្រកួនដុះលូតលាស់បានជាងមួយចំអាមដៃ ហើយដើម និងស្លឹករបស់វាដុះឡើងសខ្ចី។
សំណាង ដែលមានវ័យប្រមាណជា ៥០ឆ្នាំ ដឹងយ៉ាងច្បាស់ពីគ្រោះថ្នាក់ដែលបណ្តាលមកពីការប្រើប្រាស់សារជាតិគីមី។ ដូច្នេះហើយ បានជារូបលោកមិនអនុញ្ញាតឲ្យភរិយារបស់លោកមកធ្វើការដាំត្រកួនជាមួយក្រុមលោក។ ភរិយារបស់គាត់បម្រើការងារនៅក្នុងសិប្បកម្មមួយនៅទីក្រុងភ្នំពេញ។ ដើម្បីបញ្ជាក់ពីគ្រោះថ្នាក់ដោយសារការដាំត្រកួនដែលប្រើប្រាស់សារជាតិគីមីហួសកំណត់នោះ លោក សំណាង បានប្រាប់ឲ្យដឹងថា អ្នកភូមិដាំត្រកួនជាមួយរូបលោក ចំនួន ៣ ៤ ឬ៥នាក់ហើយបានបាត់បង់ជីវិតដោយសារសារជាតិគីមីបំផ្លាញសួត។ នេះគឺជាការបញ្ជាក់របស់គ្រូពេទ្យ ហើយត្រូវបានរៀបរាប់ឡើងវិញដោយលោក សំណាង។
ទឹកមុខស្ងួត និយាយមួយៗ លោក សំណាង ហាក់បីដូចជាមិនដឹងថា ត្រូវធ្វើដូចម្តេចដើម្បីចៀសផុតពីគ្រោះថ្នាក់។ គ្រោះថ្នាក់ដឹង តែចំណូលពីការដាំត្រកួនមានទំហំធំគួរសម។ ក្នុងមួយខែៗលោក សំណាង រកចំណូលបានពីការដាំត្រកួនប្រមាណជា១ពាន់ដុល្លារ។ តើលោកចង់ដាំបន្លែបែបធម្មជាតិ ឬចង់ប្រកបមុខរបរអ្វីផ្សេងដែលមិនបំផ្លាញសុខភាពឬទេ? លោក សំណាង បានឆ្លើយមកវិញភ្លាមថា លោកចង់ផ្លាស់ប្តូរមុខរបរដែរ តែមិនដឹងជាត្រូវធ្វើអ្វី។ មានគេចង់ឲ្យលោកដាំបន្លែបែបធម្មជាតិដែរ តែគម្រោងមិនទាន់ចេញជារូបរាងនៅឡើយទេ។
ក្នុងរយៈពេលចុងក្រោយនេះ ម្ហូបអាហារ បន្លែ ផ្លែឈើ ត្រូវបានគេរាយការណ៍ប្រាប់ថា មានផ្ទុកទៅដោយសារជាតិគីមីដែលបំផ្លាញដល់សុខភាពពលរដ្ឋខ្មែរ។ សារព័ត៌មានស្វីសដែលបានចុះមកធ្វើអង្កេតមួយនៅក្នុងប្រទេសកម្ពុជាកាលពីប៉ុន្មានឆ្នាំមុននេះ បានចុះផ្សាយអត្ថបទរបស់ខ្លួននៅក្នុងប្រទេសស្វីសដោយដាក់ចំណងជើងថា «ពលរដ្ឋខ្មែរពិសាថ្នាំពុលជារៀងរាល់ថ្ងៃ»៕
© រក្សាសិទ្ធិដោយ thmeythmey.com