អន្តរជាតិ
ហេតុអ្វីមហាយក្សចិនត្រឹមតែជាប្រទេសកំពុងអភិវឌ្ឍ?
× ជាប្រទេសដែលមានសេដ្ឋកិច្ចធំលំដាប់ទី២លើលោក ជាមួយនិងប្រជាជនជាង១.៣ពាន់លាននាក់ ចិនត្រូវបានគេចាត់ទុកជាមហាអំណាចពិភពលោកមួយទៅហើយ។ ហើយចិនក៏ចាប់ផ្ដើមមានទំនួលខុសត្រូវលើបញ្ហាសំខាន់ៗរបស់ពិភពលោករួមទាំងសន្តិសុខ បរិស្ថាន និងភេវរកម្មជាដើម។ ប៉ុន្តែចិននៅតែចាត់ទុកខ្លួនឯង ជាប្រទេសស្ថិតកំពុងអភិវឌ្ឍនៅឡើយ។ តើអ្វីជាលក្ខខណ្ឌកំណត់ថា ប្រទេសមួយជាប្រទេសអ្នកមានឬអ្នកក្រនោះ ជាប្រទេសអភិវឌ្ឍឬកំពុងអភិវឌ្ឍនោះ?
នរណាក៏ដឹងថា ចិនជាប្រទេសដែលមានសេដ្ឋកិច្ចធំជាងគេលើពិភពលោកបន្ទាប់សហរដ្ឋអាមេរិក ហើយបើនិយាយពីផលិតផលក្នុងស្រុកសរុប (GDP) វិញ ក៏មានលំដាប់នៅតែពីក្រោមអាមេរិកមួយតែប៉ុណ្ណោះដែរ។ ប៉ុន្តែបើនិយាយពីចំនួនប្រជាជន ចិនជាប្រទេសមានចំនួនប្រជាជនច្រើនជាងគេលើលោកពោលគឺមានជាង១.៣ពាន់លាននាក់។ ដូច្នេះហើយ បើយើងប្រៀបធៀបចំនួនប្រជាជននិង ផលិតផលក្នុងស្រុកសរុប នោះចិននៅតែជាប្រទេសកំពុងអភិវឌ្ឍ។
យោងតាមរបាយការណ៍ អង្គការសហប្រជាជាតិ មូលនិធិរូបិយវត្ថុអន្តរជាតិ (IMF) និងធនាគារពិភពលោក ផលិតផលក្នុងស្រុកសម្រាប់មនុស្សម្នាក់គឺជាសូចនាករដ៏សំខាន់ក្នុងការកំណត់ថា ប្រទេសមួយជាប្រទេសអភិវឌ្ឍឬកំពុងអភិវឌ្ឍ។ តាមន័យនេះ ចិនជាប្រទេសកំពុងអភិវឌ្ឍ បើគេផ្អែកតាមលក្ខខណ្ឌខាងលើ។
ក្នុងរបាយកាណ៍របស់ខ្លួន មូលនិធិរូបិយវត្ថុអន្តរជាតិចាត់ទុកចិនជាប្រទេសកំពុងអភិវឌ្ឍ ពីព្រោះចិនមានផលិផលក្នុងស្រុកសម្រាប់មនុស្សម្នាក់តែ ៤៣៨២ដុល្លារប៉ុណ្ណោះ ដែលមានលំដាប់ទី៩២ក្នុងចំណោមប្រទេសសរុប១៨២ ។ ហើយចំនួននេះគឺមិនស្មើ ១ភាគ១០នៃផលិតក្នុងស្រុកសម្រាប់មនុស្សម្នាក់នៅអាមេរិកផង ព្រមទាំងទាបជាងប្រទសមួយចំនួននៅអាហ្វ្រិកទៅទៀត។
ចំណែក ធនាគារពិភពលោកវិញ ចាត់ទុកប្រទេសដែលមានចំណូលទាបនិងចំណូលមធ្យម ជាប្រទសកំពុងអភិវឌ្ឍ។ ងាកមកចិនវិញ ចិនស្ថិតក្នុងចំណោមប្រទេសដែលមានចំនូលមធ្យមកម្រិតទាប ដោយសារតែចំណូលជាតិសរុបសម្រាប់មនុស្សម្នាក់ (GNI) មានតែចំនួន៣,៦៥០ដុល្លារប៉ុណ្ណោះនៅឆ្នាំ២០០៩ ។ នេះមានន័យថា ចិនជាប្រទេសកំពុងអភិវឌ្ឍនៅឡើយ។
ក្រៅពីកត្តាខាងលើនោះ គេក៏អាចប្រើសន្ទស្សន៍អភិវឌ្ឍន៍មនុស្ស (HDI) ដើម្បីកំណត់ពីលក្ខណៈប្រទេសអភិវឌ្ឍន៍ឬអត់បានដែរ។ សន្ទស្សន៍នេះគិតលើកម្រិតរស់នៅរបស់មនុស្ស តាមរយៈចំណូល អាយុសង្ឃឹមរស់និងកត្តាផ្សេងទៀតរបស់ប្រទេសណាមួយ។ បើគិតតាមទិន្នន័យមួយចំនួនរបស់កម្មវិធីអភិវឌ្ឍន៍អង្គការសហប្រជាជាតិ (UNDP) ចំណាត់ថ្នាក់របស់ចិនគឺស្ថិតក្នុងកម្រិតមធ្យមតែប៉ុណ្ណោះ។
សរុបទៅ បើគិតតាមការកំណត់របស់ស្ថាប័នខាងលើនោះ គេអាចនិយាយបានថា ចិនគឺជាប្រទេសកំពុងអភិវឌ្ឍកម្រិតធ្យមឬក៏មធ្យមកម្រិតទាបប៉ុណ្ណោះ។ ថ្វីបើចិនមានសេដ្ឋកិច្ចធំយ៉ាងណាក្ដី តែប្រជាជនចិនភាគច្រើននៅក្នុងស្ថានភាពក្រីក្រដដែល ខណៈការអភិវឌ្ឍមិនកើតមានឡើងនៅទូទាំងប្រទេសឡើយ។ ម្យ៉ាងទៀត ចិនខ្លួនឯង ក៏ចង់ធ្វើខ្លួនជាអ្នកកំពុងអភិវឌ្ឍ ដើម្បីចៀសផុតពីការទទួលខុស ត្រូវខ្ពស់ក្នុងនាមជាមហាអំណាចផងដែរ៕
© រក្សាសិទ្ធិដោយ thmeythmey.com