ជាតិ
នយោបាយជាតិ
ពីមុនអ្នកគាំទ្របក្សប្រឆាំងចូលហាងគុយទាវឱនមុខ តែឥឡូវហ៊ឺហា ហើយហ៊ានអួតគេទៀត
× ភ្នំពេញ៖ ថ្លែងនៅក្នុងវេទិកាជាមួយសកម្មជនមូលដ្ឋាន នៅស្រុកកំពង់ត្រឡាច ខេត្តកំពង់ឆ្នាំង នៅព្រឹកថ្ងៃទី០៧ កុម្ភៈនេះ ប្រធានស្តីទីគណបក្សសង្គ្រោះជាតិ ឯកឧត្តម កឹម សុខា បានប្រាប់ឲ្យសកម្មជនរបស់ខ្លួន ផ្តោតអារម្មណ៍លើការបោះឆ្នោត និងកុំគិតពីគណបក្សទើបបង្កើតថ្មី ដែលគ្មានលទ្ធភាពយកឈ្នះក្នុងការបោះឆ្នោតខាងមុខ។
ថ្លែងនៅចំពោះមុខសកម្មជនរាប់ពាន់នាក់នៅខេត្តកំពង់ឆ្នាំង ឯកឧត្តម កឹម សុខា ប្រធានស្តីទី គណបក្សសង្គ្រោះជាតិ បានបង្ហាញពីយុទ្ធសាស្ត្ររបស់គណបក្ស សម្រាប់ចូលរួមបោះឆ្នោតឃុំសង្កាត់ និងការបោះឆ្នោតជាតិនាពេលខាងមុននេះ។ តំណារាស្ត្រមណ្ឌលកំពង់ចាមរូបនេះ បានប្រាប់ទៅសកម្មជនរបស់ខ្លួនថា មិនចាំបាច់គិតពីគណបក្សដែលទើប
បង្កើតថ្មីៗ ព្រោះបក្សទាំងនោះ មិនអាចយកឈ្នះក្នុងការបោះឆ្នោតក្នុងពេលខាងមុខបានទេ។
មេដឹកនាំបក្សប្រឆាំងដ៏មានប្រជាប្រិយភាពរូបនេះ បានបញ្ជាក់ថា៖ «ដើម្បីយកឈ្នះ គណបក្សនយោបាយមានច្រើនជំហានណាស់។ ជំហានដំបូងត្រូវធ្វើឲ្យគេស្គាល់ បន្ទាប់មកធ្វើឲ្យគេជឿ តែឥឡូវក្នុងសភា បក្សប្រជាជនមានសំឡេងភាគច្រើន តែក្រៅសភា ដូចជា រោងចក្រ តាមផ្សារ តាមថ្នល់ ហាងគុយទាវ គណបក្សសង្គ្រោះជាតិ មានពលរដ្ឋស្គាល់ និងជឿសង្គ្រោះជាតិច្រើនជាង។ ចុះគណបក្សតូចៗទើបបង្កើតវិញ ទម្រាំធ្វើឲ្យគេស្គាល់ ក៏ប្រើពេល៥ឆ្នាំដែរ។ ចឹងហួសពេលបោះឆ្នោត២០១៧ និង២០១៨បាត់ហើយ។ ដូច្នេះយើងមិនចាំបាច់គិតពីបក្សតូចៗទេ ពីព្រោះពលរដ្ឋមិនស្គាល់ ធ្វើម៉េចក៏អត់បានកៅអី និងមិនអាចនាំមកនូវការផ្លាស់ប្តូរបានដែរ»។
អតីតប្រធានគណបក្សសិទ្ធិមនុស្សរូបនេះថ្លែងបែបកំប្លែងថា «សកម្មជនគណបកប្រឆាំង ពីដើម ចូលហាងគុយទាវ លឺគេថាមកពីបក្សប្រឆាំង គឺឱនមុខ អត់ហ៊ានមាត់ ទោះគេថាម៉េច ក៏នៅស្ងៀមដែរ តែឥឡូវហ៊ឺហាដែរ នៅសង្គ្រោះជាតិហ៊ានអួតប្រាប់គេថា នៅសង្គ្រោះជាតិ»។
គួរបញ្ជាក់ថា មួយរយៈពេលចុងក្រោយនេះ គណបក្សសង្គ្រោះជាតិ បានចុះពង្រឹងសកម្មជន មូលដ្ឋានរបស់ខ្លួន ដើម្បីរៀបចំខ្លួនយកឈ្នះ ក្នុងការបោះឆ្នោតឃុំសង្កាត់នៅឆ្នាំ២០១៧ និង ការបោះឆ្នោតជាតិនៅឆ្នាំ២០១៨ខាងមុខ៕
© រក្សាសិទ្ធិដោយ thmeythmey.com