កីឡាជាតិ
ជាតិ
កម្ពុជារៀបចំ National Games ដើម្បីយកបទពិសោធន៍ត្រៀមធ្វើម្ចាស់ផ្ទះស៊ីហ្គេម
× លោក វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា NOCC នាសន្និសីទសារព័ត៌មានមួយកាលពីដើមខែកុម្ភៈ នៅទីស្នាក់ការ NOCC ផ្ទាក់ បានជំរុញថ្នាក់ដឹកនាំសហព័ន្ធកីឡាជាតិឲ្យត្រៀមខ្លួនសម្រាប់ការធ្វើជាម្ចាស់ផ្ទះ National Games ឆ្នាំ២០១៦ ដើម្បីដកស្រង់បទពិសោធន៍មុនឈានដល់ការធ្វើជាម្ចាស់ផ្ទះស៊ីហ្គេមលើកទី៣២ ឆ្នាំ២០២៣ ។
លោក វ៉ាត់ ចំរើន បានជំរុញឲ្យសហព័ន្ធមួយចំនួនដែលមានលក្ខណៈសម្បត្តិគ្រប់គ្រាន់ និងត្រូវបានជ្រើសរើសដោយក្រសួងអប់រំ យុវជន និងកីឡា ត្រូវត្រៀមខ្លួនក្នុងការធ្វើជាម្ចាស់ផ្ទះ National Games 2016 ដែលជាការប្រកួតកីឡាថ្នាក់ជាតិមានកម្រិតបច្ចេកទេសខ្ពស់បំផុតសម្រាប់កម្ពុជា ក្នុងគោលបំណងដើម្បីវាស់ស្ទង់កម្រិតបច្ចេកទេសការងារ និងសមត្ថភាពរបស់កីឡាករកីឡាការិនីសម្រាប់ត្រៀមធ្វើជាម្ចាស់ផ្ទះនៃការប្រកួតស៊ីហ្គេមលើកទី៣២ ឆ្នាំ២០២៣ ។
លោកអគ្គលេខាធិការ NOCC រូបនេះបានបញ្ជាក់ថា៖«ប្រសិនបើយើងមិនរៀបចំការប្រកួត National Games នោះទេ យើងអត់មានបទពិសោធន៍សម្រាប់រៀបចំស៊ីហ្គេមឆ្នាំ២០២៣នោះទេ អញ្ចឹងសហព័ន្ធដែលមានលក្ខណៈគ្រប់គ្រាន់ ដែលត្រូវបានជ្រើសរើសដោយក្រសួងអប់រំយុវជន និងកីឡា ត្រូវត្រៀមខ្លួនធ្វើជាម្ចាស់ផ្ទះការប្រកួត National Games 2016»។
លោក វ៉ាត់ ចំរើន បានបន្ថែមថា សហព័ន្ធដែលត្រូវធ្វើជាម្ចាស់ផ្ទះនៃការប្រកួត National Games 2016 មានចំនួន១៣ ប៉ុន្តែលោកមិនបានប្រាប់ពីឈ្មោះសហព័ន្ធទាំងនោះទេ។ ហើយការធ្វើជាម្ចាស់ផ្ទះការប្រកួត National Games នឹងរៀបចំរៀងរាល់២ឆ្នាំម្តង រហូតដល់ការប្រកួតស៊ីហ្គេមឆ្នាំ២០២៣។ ការធ្វើជាម្ចាស់ផ្ទះការប្រកួតស៊ីហ្គេមរបស់កម្ពុជា នឹងមកដល់បន្ទាប់ពីធ្វើនៅប្រទេសម៉ាឡេស៊ីឆ្នាំ២០១៧ ប្រទេសភីលីពីន ឆ្នាំ២០១៩ និងនៅប្រទេសវៀតណាម ឆ្នាំ២០២១ ។
ទន្ទឹមនឹងនេះ លោកបានជំរុញឲ្យសហព័ន្ធជាតិទាំងអស់ត្រៀមខ្លួនរៀបចំឯកសារ និងផែនការរបស់ខ្លួនឲ្យបានរួចរាល់ ដើម្បីយកមកពិភាក្សាពេញមួយថ្ងៃក្នុងអង្គមហាសន្និបាតប្រចាំឆ្នាំ របស់គណៈកម្មាធិការជាតិអូឡាំពិកកម្ពុជា នាថ្ងៃទី១៨ ខែកុម្ភៈ ដើម្បីស្វែងរកសេចក្តីសម្រេចនិងផ្តល់ផែនការមេស៊ីហ្គេមឲ្យរាជរដ្ឋាភិបាលកម្ពុជាសម្រេចជាផ្លូវការ៕
Tag:
NOCC
National Games
ស៊ីហ្គេម
© រក្សាសិទ្ធិដោយ thmeythmey.com