ជាតិ
លោក រៀល ខេមរិន្ទ្រ ទទួលកំហុសដែលខ្លួនមិនបានគោរពច្បាប់ចរាចរណ៍
× ភ្នំពេញ៖ តំណាងរាស្ត្រមកពីគណបក្សសង្គ្រោះជាតិ លោករៀល ខេមរិន្ទ្រ បានសំទោស និងទទួលស្គាល់កំហុសរបស់ខ្លួនចំពោះករណីដែលលោកមិនបានពាក់ខ្សែក្រវ៉ាត់ការពារពេលជិះរថយន្ត ហើយត្រូវនគរបាលចរាចរផាកពិន័យ។
ក្រោយពីបណ្តាញសារព័ត៌មានបង្ហោះវីដេអូខ្លីបង្ហាញពីសកម្មភាពរបស់នគរបាលចរាចរ ដែលផាកពិន័យលើរូបខ្លួនដោយសារមិនបានពាក់ខ្សែក្រវ៉ាត់ពេលបើកឡាន កាលពីយប់ថ្ងៃទី១៣ខែកុម្ភៈ លោក រៀល ខេមរិន្ទ្រ បានចេញមុខសុំទោសជាសាធារណៈចំពោះកំហុសរបស់ខ្លួន ដែលល្មើសនឹងច្បាប់ចរាចរណ៍។ ក្នុងឃ្លីបវីដេអូខ្លី ដែលបង្ហោះនៅលើគណនីហ្វេសប៊ុកផ្ទាល់ខ្លួនថ្ងៃនេះ លោក រៀល ខេមរិន្ទ្រ បានសម្ដែងការកោតសរសើរចំពោះមន្ត្រីនគរបាលចរាចរ ដែលបានអនុវត្តច្បាប់ចរាចរណ៍ និងបំពេញតួនាទីបានល្អ។ «មន្ត្រីនគបាលចរាចរណ៍មានការអនុវត្តច្បាប់បានល្អ ដោយមិនមានការប្រកាន់ថាអ្នកតូច ឬអ្នកធំ ឬមន្ត្រីតូចធំណាមួយ ហើយនេះគឺជាអ្វីដែលលោកចង់បាន និងមានការកោតសរសើរ»។ នេះជាការបញ្ជាក់របស់លោក រៀល ខេមរិន្ទ្រ។
ជាមួយគ្នានេះតំណាងរាស្ត្រគណបក្សសង្គ្រោះជាតិរូបនេះ ក៏ពន្យល់បន្ថែមអំពីវីដេអូ ដែលត្រូវបានគេបង្ហោះតាមបណ្ដាញសង្គម ទាក់ទងនិងបញ្ហារបស់លោក ជាមួយនិងមន្ត្រីនគរបាលចរាចរណ៍ថា សកម្មភាពប្រកែកគ្នាជាមួយនគរបាលដែលសុំបង់ប្រាក់ពិន័យមុនពលរដ្ឋដទៃទៀតនោះ មិនមែនមានន័យថា លោកមិនព្រមទទួលស្គាល់កំហុស និងខឹងជាមួយមន្ត្រីនគរបាលនោះទេ។ ប៉ុន្តែគឺលោកសុំការអនុញ្ញាតពីប្រជាពលរដ្ឋដែលចាំបង់ប្រាក់ ដើម្បីឲ្យលោកបានបង់ការផាក់ពិន័យបានមុន ដោយសារតែលោកមានភារកិច្ចចាំបាច់ត្រូវទៅបំពេញ។ លោក ខេមរិន្ទ្រ ក៏មិនបានបដិសេធនោះដែរ ចំពោះកាយវិការរបស់លោក ដែលមើលទៅដូចជាខឹងចំពោះមន្ត្រីនគរបាលនោះ។ លោក បានអះអាងថា លោកខឹងនគរបាល ដោយសារតែមានមន្ត្រីនគរបាលចរាចរមួយចំនួនបាននិយាយពាក្យមិនល្អថា លោកធ្វើជាតំណាងរាស្ត្រហើយ នៅមិនគោរពច្បាប់ចរាចរណ៍ និងមើលងាយរូបលោក។
លោក រៀល ខេមរិន្ទ្រ ស្នើឲ្យមន្ត្រីនគរបាលចរាចរណ៍មួយចំនួន មេត្តាប្រើប្រាស់ពាក្យសម្ដីឲ្យបានសមរម្យ ទោះបីជាមួយប្រជាពលរដ្ឋសាមញ្ញក៏ដោយ។ ហើយក្រៅពីទទួលយកកំហុស លោកតំណាងរាស្ត្ររូបនេះក៏សង្ឃឹមថា ប្រជាពលរដ្ឋខ្មែរទូទៅ នឹងនាំគ្នាគោរពច្បាប់ចរាចរណ៍ឲ្យត្រឹមត្រូវ ហើយមន្ត្រីចរាចរណ៍ នៅតែបន្តរអនុវត្តន៍រូបភាពល្អៗរបស់ខ្លួននៅក្នុងការអនុវត្តច្បាប់ចរាចរណ៍នេះ៕
© រក្សាសិទ្ធិដោយ thmeythmey.com