កម្ពុជាត្រូវការក្រុមហ៊ុនវិនិយោគស្តង់ដារធំៗ តែជួបឧបសគ្គអំពើពុករលួយ តុលាការអយុត្តិធម៌

ជាតិ

កម្ពុជាត្រូវការក្រុមហ៊ុនវិនិយោគស្តង់ដារធំៗ តែជួបឧបសគ្គអំពើពុករលួយ តុលាការអយុត្តិធម៌

14, Feb 2016 , 7:19 pm

រូបភាព

ដោយ:

ភ្នំពេញ៖ កាលពីពេលថ្មីៗនេះ អង្គការតម្លាភាពអន្តរជាតិបានបង្ហាញចំណាត់ថ្នាក់អំពើពុករលួយរបស់កម្ពុជានៅលេខរៀងទី១៥០ ក្នុងចំណោមប្រទេសចំនួន១៦៨ ។ ចំណាត់ថ្នាក់នេះ រួមទាំងភាពអយុត្តិធម៌ក្នុងប្រព័ន្ធតុលាការ កង្វះនីតិរដ្ឋ ត្រូវបានអ្នកវិភាគមើលឃើញថាជាឧបសគ្គក្នុងការទាក់ទាញក្រុមហ៊ុន ស្តង់ដារធំៗ ឲ្យមកវិនិយោគនៅកម្ពុជា។ ក្រុមហ៊ុនកំពុងវិនិយោគសព្វថ្ងៃមួយចំនួន គឺជាក្រុមហ៊ុនឆ្លៀតឱកាស និងមិនបានជួយសេដ្ឋកិច្ចកម្ពុជាជាដុំកំភួន។

លោក អ៊ូ វីរៈ អ្នកវិភាគបញ្ហាសង្គម ចាត់ទុកកម្រិតនៃអំពើពុករលួយនៅកម្ពុជាថា ស្ថិតក្នុងស្ថានភាពអាក្រក់ ដែលជាឧបសគ្គដល់ការទាក់ទាញការវិនិយោគរបស់ក្រុមហ៊ុនធំៗមកកម្ពុជា។ ក្រុមហ៊ុនកំពុងវិនិយោគនៅកម្ពុជាមួយចំនួន ត្រូវបានលោក អ៊ូ វីរៈ ថាជាក្រុមហ៊ុនឆក់កន្តៀត ដែលភាគច្រើនគ្រប់គ្រងដោយពួកអាស៊ី ពិសេសជនជាតិចិន។ លោក បន្ថែមថា ក្រុមហ៊ុនឆក់កន្តៀតទាំងនេះ ជួយដល់សេដ្ឋកិច្ចកម្ពុជាដែរ តែក្នុងចំនួនតិចតួច។ តាមការអង្កេតរបស់លោក ក្រុមហ៊ុនទាំងនេះ បានរំលោភដល់សិទ្ធិកម្មករ និងមិនផ្តល់លក្ខខណ្ឌការងារឲ្យបានល្អប្រសើរនោះឡើយ។

អ្នកវិភាគរូបនេះ ចង់ឲ្យកម្ពុជាចាប់យកការវិនិយោគរបស់ក្រុមហ៊ុនធំៗ ពីសហរដ្ឋអាមេរិក សហគមអឺរ៉ុប កូរ៉េ ជប៉ុនជាដើម ដើម្បីជួយសេដ្ឋកិច្ចកម្ពុជាឲ្យមានការរីកចម្រើនខ្លាំង។ ការវិនិយោគរបស់ក្រុមហ៊ុនធំៗ ត្រូវបានលោក អ៊ូ វីរៈ សម្លឹងឃើញអត្ថប្រយោជន៍យ៉ាងច្រើនដល់ប្រជាពលរដ្ឋ និងសេដ្ឋកិច្ចកម្ពុជា។ លោក អះអាងថា ក្រុមហ៊ុនដែលមានលក្ខណៈស្តង់ដារ នាំមកនូវការវិនិយោគមានភាពនឹងធឹង បច្នេក វិទ្យា ការបណ្តុះបណ្តាលកម្មករ ស្តង់ដារការងារល្អ ព្រមទាំងផ្តល់ប្រាក់ខែខ្ពស់។ ហើយកម្ពុជានឹងមានផលិតផលនាំទៅលក់ក្នុងទីផ្សារក្រៅប្រទេសកាន់តែច្រើនទៀតផង។

ដើម្បីអាចទាក់ទាញក្រុមហ៊ុនស្តង់ដារធំៗមកវិនិយោគបាន លោក អ៊ូ វីរៈ ផ្តល់អនុសាសន៍ថា កម្ពុជាត្រូវធ្វើឲ្យគេមានទំនុកចិត្ត ព្រោះថាគេមកបណ្តាក់ទុនរកស៊ីយូរអង្វែង។ ហើយក្រុមហ៊ុនធំៗមិនមកវិនិយោគក្នុងប្រទេសដែលមានអំពើពុករលួយឡើយ។ លោក អ៊ូ វីរៈ បញ្ជាក់ថា កម្ពុជាត្រូវបំបាត់អំពើពុករលួយ កសាងនីតិរដ្ឋ និងធានាភាពយុត្តិធម៌ក្នុងប្រព័ន្ធតុលាការឲ្យបាន នោះគេនឹងសម្លឹងឃើញកម្ពុជាជាកន្លែងគួរឲ្យចង់មកវិនិយោគ។ លោក អ៊ូ វីរៈ និយាយយ៉ាងដូច្នេះថា៖«ឲ្យតែយើងមានតុលាការត្រឹមត្រូវ អនុវត្តច្បាប់បានល្អ ស្មើរភាពគ្នា យើងមិនចាំបាច់ដើររកគេនោះទេ អ្នកវិនិយោគគេនឹងមកឯង»។

ឯលោក កែម ឡី អ្នកស្រាវជ្រាវការអភិវឌ្ឍសង្គម ក៏យល់ឃើញស្រដៀងនឹងលោក អ៊ូ វីរៈ ដែរ។ លោក មានប្រសាសន៍ថា ចង់ទាក់ទាញការវិនិយោគរបស់ក្រុមហ៊ុនធំៗ កម្ពុជាត្រូវតែលុបបំបាត់អំពើពុករលួយឲ្យបាន។ លោក កែម ឡី បានចាត់ទុកអំពើពុករលួយនៅកម្ពុជាសព្វថ្ងៃថា ធ្វើឡើងជាប្រព័ន្ធ និងជាជម្ងឺរ៉ាំរ៉ៃ។ ការប្រយុទ្ធប្រឆាំងអំពើពុកលួយកន្លងមក ធ្វើមិនត្រូវចំណុច ហើយធ្វើបានតែចំពោះអ្នកតូចតាច។

«យើងត្រូវធ្វើច្បាប់ឲ្យល្អ មិនឲ្យមានអំពើពុករលួយ ការិយាល័យធិបតេយ្យ ប្រទេសណាក៏អាចមក(វិនិយោគ)បានដែរ។ កាលណាច្បាប់យើងមិនល្អ ក្រុមហ៊ុនខិលខូចវាឆ្លៀតឱកាស មករកស៊ីក្នុងទម្រង់មួយមិនល្អ»។ នេះជាប្រសាសន៍លោក កែម ឡី។

ដើម្បីលុបបំបាត់អំពើពុករលួយ អ្នកស្រាវជ្រាវរូបនេះ ផ្តល់អនុសាសន៍ថា ការប្រឆាំងអំពើពុករលួយ ត្រូវធ្វើឲ្យត្រូវចំណុច ទើបទទួលបានប្រសិទ្ធភាពខ្ពស់។ លោក បញ្ជាក់យ៉ាងដូច្នេះថា៖«សកម្មភាពធ្វើច្រើន តែលទ្ធផលតិច ដោយសារយើងវាយអត់ត្រូវចំណុច។យើងអត់រកចំណុចណាដែលចំណាយពេលតិច ធនធានតិច តែទទួលលទ្ធផលខ្ពស់»។ ដើម្បីបោសសម្អាតអំពើពុករលួយ លោក កែម ឡី សង្កត់ធ្ងន់លើប្រធានស្ថាប័នធំៗ ដែលជាអ្នកមានអំណាចធ្វើសេចក្តីសម្រេច គឺជាគោលដៅត្រូវអនុវត្តមុនគេ។ លោក ចង់ឲ្យមានការកែប្រែច្បាប់ប្រឆាំងអំពើពុករលួយ ដើម្បីឲ្យមានការប្រកាសទ្រព្យសម្បត្តិជាសាធារណៈ និងជាលក្ខណៈគ្រួសារ។ ស្ថាប័នប្រឆាំងអំពើពុករលួយ ក៏ត្រូវធ្វើការតាមដានជារៀងរាល់ឆ្នាំ ដើម្បីត្រួតពិនិត្យពីភាពមិនប្រក្រតីនៃកំណើនទ្រព្យសម្បត្តិរបស់អ្នកប្រកាសទាំងនោះ៕