ជាតិ
សំណុំរឿងឯកឧត្តម កឹម សុខា៖ មេធាវី នឹងអមដំណើរ ស្រីមុំ ទៅបំភ្លឺនៅមហាផ្ទៃ
× ស្រីមុំ ដែលទើបចេញមុខបដិសេធសំឡេងសន្ទនាជាមួយឯកឧត្តម កឹម សុខា នោះ នឹងទៅបំភ្លឺនៅនាយកដ្ឋានចារកម្មនៃក្រសួងមហាផ្ទៃនៅព្រឹកថ្ងៃសុក្រទី១១ មីនានេះ។ មន្ត្រីជាន់ខ្ពស់នៃសមាគមការពារសិទ្ធិមនុស្សអាដហុកបានប្រាប់ឲ្យដឹងថា មេធាវីមួយរូបនឹងជូនកញ្ញា ស្រីមុំ ទៅឆ្លើយបំភ្លឺសំណុំរឿងរបស់កញ្ញា។
កញ្ញា ស្រីមុំ បានស្វែងរកជំនួយពីសមាគមការពារសិទ្ធិមនុស្សអាដហុកដើម្បីកញ្ញាអាចធ្វើកិច្ចការចំនួនពីរ។ ទីមួយ កញ្ញា ស្រីមុំ ចង់មានឱកាសបកស្រាយ និងបដិសេធសំឡេងសន្ទនាស្នេហាជាមួយប្រធានស្តីទីគណបក្សសង្គ្រោះជាតិ គឺលោក កឹម សុខា នោះ ថាជារឿងមិនពិត។ ទីពីរ កញ្ញាស្រីមុំ ចង់បានជំនួយពីសមាគមអាដហុកនៅពេលដែលកញ្ញាត្រូវទៅឆ្លើយបំភ្លឺនៅនាយកដ្ឋានចារកម្មនៃក្រសួងមហាផ្ទៃនៅព្រឹកថ្ងៃសុក្រទី១១មីនានេះ។ គោលបំណងរបស់កញ្ញាស្រីមុំ ត្រូវបានបញ្ជាក់ដោយលោក នី សុខា ប្រធានផ្នែកស៊ើបអង្កេតនៃសមាគមការពារសិទ្ធិមនុស្សអាដហុក។
ប្រធានផ្នែកស៊ើបអង្កេតរបស់អាដហុក បានពន្យល់ប្រាប់សារព័ត៌មានថ្មីៗនៅរសៀលថ្ងៃទី១០មីនា តាមខ្សែទូរសព្ទយ៉ាងដូច្នេះថា៖«គាត់ (កញ្ញាស្រីមុំ) ដាក់បណ្តឹងមកយើងដើម្បីយើងជួយឲ្យគាត់មានឱកាសនិយាយបដិសេធ (សំឡេងសន្ទនាជាមួយឯកត្តម កឹម សុខា)។ យើងក៏ជួយសម្រួលឲ្យគាត់បានជួបអ្នកកាសែត។ រឿងគាត់និយាយឆ្លើយឆ្លងជាមួយកាសែតយ៉ាងណា គឺជារឿងរបស់គាត់»។
សម្រាប់ការស្នើសុំទីពីររបស់កញ្ញា ស្រីមុំ សមាគមអាដហុក បានសម្រេចផ្តល់មេធាវីមួយរូបដើម្បីជូនកញ្ញាទៅបំភ្លឺតាមការស្នើរបស់នាយកដ្ឋានចារកម្ម។ ប៉ុន្តែវាក៏មិនទាន់ដល់ពេលសម្រេចថា មេធាវីរូបនោះគឺជាអ្នកការពារក្តីគាត់នោះទេ។ «គាត់ត្រូវការជំនួយពីយើង។ ដូច្នេះយើងបញ្ជូនមេធាវីមួយរូបដើម្បីអមដំណើរគាត់ដើម្បីកុំឲ្យគាត់ភ័យ»។ នេះជាការបញ្ជាក់របស់លោក នី សុខា ដែលអះអាងបន្ថែមថា អាដហុកក៏នៅមិនទាន់សិក្សាករណីរបស់កញ្ញាស្រីមុំ ដែលត្រូវបានចោទប្រកាន់ថា មានទំនាក់ទំនងស្នេហារជាមួយឯកឧត្តម កឹម សុខា។
នៅក្នុងបទសម្ភាសន៍ជាមួយវិទ្យុអាស៊ីសេរី និងវិទ្យុវីអូអេ នៅយប់ថ្ងៃទី៩មីនា កញ្ញាស្រីមុំ ដែលមានឈ្មោះពិត ឃុំ ច័ន្ទតារាទី បាននិយាយបដិសេធថា កញ្ញាមិនដែលបានសន្ទនាស្នេហាជាមួយឯកឧត្តម កឹម សុខា ដូចការផ្សាយក្នុងបណ្តាញសង្គមហ្វេសប៊ុក ហើយដែលសារព័ត៌មានមួយចំនួនយកផ្សាយបន្តនោះឡើយ។ ស្រីមុំ បាននិយាយប្រាប់វិទ្យុអាស៊ីសេរីថា គណនីហ្វេសប៊ុករបស់កញ្ញាត្រូវបានគេលួចចូល។
ខ្សែអាត់សំឡេងដែលគេអះអាងថា ជាការសន្ទនារវាងឯកឧត្តម កឹម សុខា និងស្រីកំណាន់នោះ ត្រូវបានផ្សព្វផ្សាយដល់វគ្គទី២៣ហើយមកដល់ថ្ងៃទី១០មីនានេះ៕
© រក្សាសិទ្ធិដោយ thmeythmey.com