ជាតិ
×![]()
ដោយ: ខន ចំប៉ា
វ័យត្រឹម១៦ឆ្នាំ សំឡេងរបស់ រ៉េត ស៊ូហ្សាណា បានទាក់ទាញយ៉ាងខ្លាំង ខណៈបេក្ខនារីនៅរាជធានីភ្នំពេញរូបនេះ បកស្រាយបទ «The Power of Love» របស់តារាចម្រៀងជើងចាស់អាមេរិក Jennifer Rush ក្នុងកម្មវិធីប្រឡងចម្រៀង The Voice Cambodia រដូវកាលទីពីររបស់ទូរទស្សន៍ហង្សមាស។ បង្ហើសំនៀងបានត្រឹម១០វិនាទី គ្រូបង្វឹកទាំង៤ បានចុចប៊ូតុង បង្វិលកៅអីជាបន្តបន្ទាប់។
នៅពេលដែល បេក្ខនារី រ៉េត ស៊ូហ្សាណា បង្ហើរសំនៀងរបស់ខ្លួនភ្លាមពោលគឺត្រឹមតែជាង១០វិនាទីប៉ុណ្ណោះ កៅអីទាំង៤របស់គ្រូបង្វឹក បានវិល ខណៈមានសំឡេងទះដៃ និងហ៊ោរកញ្ជ្រៀវស្ទើរកក្រើកឆាក។ នាងក៏ជាបេក្ខជនតែម្នាក់គត់ផងដែរ ដែលបានរើសយកបទជាភាសាអង់គ្លេសមកច្រៀង នៅក្នុងវគ្គ The Blind Audition សប្តាហ៍ទី២ ។
ឪពុកម្តាយរបស់ ស៊ូហ្សាណា ក៏រំជួលចិត្តរហូតដល់ស្រក់ទឹកភ្នែកផងដែរនៅពេលឮសំឡេងបកស្រាយបទចម្រៀងរបស់កូនស្រី រួមទាំងការគាំទ្ររបស់គ្រូបង្វឹក និងអ្នកទស្សនាផ្ទាល់នាពេលនោះ។ ក្រោយការទាក់ទាញ និងការសម្រេចចិត្តដ៏តឹងតែង ស៊ូហ្សាណា បានរើសកញ្ញា ឱក សុគន្ធកញ្ញា ជាគ្រូបង្វឹក។
«The Power of Love» ត្រូវបាននិពន្ធដោយតារាចម្រៀង Jennifer Rush កាលពីឆ្នាំ១៩៨៤ ហើយបានក្លាយជាបទចម្រៀងដែលលក់ដាច់ជាងគេនៅចក្រភពអង់គ្លេសក្នុងឆ្នាំ១៩៨៥ ហើយបន្តនាំមុខនៅបណ្តាប្រទេសនៅទ្វីបអឺរ៉ុប កាណាដា អូស្ត្រាលី និងនូវេលសេឡង់។ បទចម្រៀងនេះ ត្រូវបានបកស្រាយឡើងវិញដោយ Celine Dion ហើយបានឈានទៅដល់ចំណាត់ថ្នាក់លេខមួយម្តងទៀតនៅសហរដ្ឋអាមេរិក កាណាដា អូស្ត្រាលី នាអំឡុងឆ្នាំ១៩៩៤ ។
ក្រៅពីកញ្ញា រ៉េត ស៊ូហ្សាណា បទ«បេះដូងអ្នកប្រដាល់» របស់បេក្ខជន សាម លោកា មកពីខេត្តប៉ៃលិន ក៏បានឆក់យកបេះដូងរបស់ទស្សនិកជន និងបានធ្វើឲ្យគ្រូបង្វឹកទាំង៤ ចុចប៊ូតុងបង្វិលកៅអីរបស់ខ្លូន។ ក្រៅពីទឹកដមសំនៀងពិរោះ បេក្ខជនរូបនេះ ក៏បានធ្វើគ្រូបង្វឹក និងទស្សនិកជនផ្ទុះសំណើច ដោយសារកាយវិការ និងពាក្យពេចន៍កំប្លុកកំប្លែងរបស់ខ្លួនដែរ។ លោកា បានរើសលោក ណុប បាយ៉ារិទ្ធ ធ្វើជាគ្រូបង្វឹករបស់ខ្លួន៕
ទស្សនាវីដេអូ
Tag:
The Voice Cambodia
© រក្សាសិទ្ធិដោយ thmeythmey.com
