សង្គមអន្តរជាតិ
អន្តរជាតិ
×![]()
ក្រុមប្រឆាំងស៊ីរី អះអាងថាជនភៀសខ្លួនស៊ីរីចង់ត្រលប់ទៅស្រុកកំណើតរបស់ខ្លួនវិញ ស្របពេលដែលការចរចានៅហ្សឺណែវកំពុងបន្តទៅមុខហើយបទឈប់បាញ់បន្តស្ថិតនៅជាធរមាននៅឡើយ។ បើសិនការចរចាសន្តិភាពជោគជ័យ ហើយសង្គ្រាមបង្ហូរឈាមគ្នាឈានដល់ទីបញ្ចប់ ពួកគេនឹងត្រលប់ទៅមាតុភូមិវិញ។
ជនភៀសខ្លួនស៊ីរីរាប់លាននាក់ចង់ត្រលប់ទៅប្រទេសកំណើតរបស់ខ្លួនវិញ ដើម្បីកសាងជីវភាពនិងប្រទេសជាតិឡើងវិញ បើការចរចាសន្តិភាពនៅហ្សឺណែវទទួលជោគជ័យនោះ។បច្ចុប្បន្ននេះ ភាគីកំពុងអនុវត្តបទឈប់បាញ់ ហើយបន្តជជែកគ្នាស្វែងរកកិច្ចព្រមព្រៀងសន្តិភាពនៅទីក្រុងហ្សឺណែវ ដោយមានការជ្រោមជ្រែងពីមហាអំណាចរុស្ស៊ីនិងអាមេរិកផង។
អ្នកនាំពាក្យគណកម្មការចរចាជាន់ខ្ពស់តំណាងក្រុមប្រឆាំងស៊ីរីលោក Salim al-Muslat បានអះអាងថា ប្រជាជនស៊ីដែលរស់នៅជ្រកកោនប្រទេសទីបីចង់មកមាតុភូមិរបស់ខ្លួនវិញ បើសិនជាសង្គ្រាមបង្ហូរឈាមគ្នាចប់។
«និយាយតាមត្រង់ចុះ បើសិនបើអ្នកសួរអ្នកណាម្នាក់ពីទីកន្លែងដែលល្អប្រសើរសម្រាប់គេ គេច្បាស់ជានិយាយថា ផ្ទះនៅទឹកដីកំណើតជាក់ជាមិនខាន»។
បច្ចុប្បន្ននេះ យោងតាមរបាយការណ៍ឧត្តមស្នងការជាន់ខ្ពស់ទទួលបន្ទុកជនភៀសខ្លួន ប្រជាជនស៊ីរីជាង ៤.៨ លាននាក់សុំសិទ្ធជ្រកកោននៅប្រទេសដទៃដែលមានព្រំដែនជាប់ស៊ីរី រួមទាំងលីបង់ និង តួកគី។ ហើយជនភៀសខ្លួនជិត ១លាននាក់ផ្សេងទៀតសុំសិទ្ធិជ្រកកោននៅអឺរ៉ុប ជាពិសេសនៅអាល្លឺម៉ង់។
អ្នកនាំពាក្យខាងលើបានបន្តថា ៖« យើងពិតជាស្ងប់ស្ងែងអ្វីដែលប្រទេសដទៃបានធ្វើកន្លងមក ដោយជួយថែទាំប្រជាជនស៊ីរី និងជនភៀសខ្លួនស៊ីរីផង។ ប៉ុន្តែវត្តមានប្រជាជនស៊ីរីនៅក្រៅប្រទេសគឺត្រឹមតែបណ្តោះអាសន្នប៉ុណ្ណោះ។ ពួកគេត្រលប់ទៅស៊ីរីវិញ បើសិនជាគេឃើញថាផ្ទះសម្បែងរបស់គេមានសុវត្ថិភាព។ ពេលនេះពួកគេកំពុងរង់ចាំលទ្ធផលនៃកិច្ចចរចានៅហ្សឺណែវយ៉ាងអន្ទះសារ»។
យ៉ាងណាក៏ដោយ ត្រលប់មកមើលការចរចាសន្តិភាពវិញនោះ គេហាក់មិនទាន់សម្លឹងឃើញជោគជ័យនៅឡើយទេ។ ភាគីជម្លោះនៅតែទាស់ទែងខ្វែងគំនិតគ្នាជុំវិញបញ្ហាមួយចំនួនជាពិសេសការបង្កើតសម័យអន្តរកាលនយោបាយ។ ចំណែកភាគីរដ្ឋាភិបាលក្រុងដាម៉ាស តែបដិសេធមិនចូលចរចាផ្ទាល់ជាមួយក្រុមប្រឆាំងឡើយ ហើយការចរចាធ្វើឡើងដាច់ដោយឡែកជាមួយបេសកជនពិសេសអង្គការសហប្រជាជាតិ។
បើតាមបេសកជនពិសេសអង្គការសហប្រជាជាតិ និងជាអ្នកដឹកនាំការចរចាលោក Staffan De Mistura ការចរចា លើកទីមួយ ចាប់តាំងពីបទឈប់បាញ់ត្រូវបានភាគីឯកភាពអនុវត្តន៍ចុងខែកុម្ភៈកន្លងមកនោះ នឹងបន្តរហូតដល់ថ្ងៃ ២៤ មីនា។ ចំណែកឯការចរចាជុំទី ២ និងទី៣ នឹងត្រូវរៀបចំបន្តទៀតដើម្បីធានាថា សង្គ្រាមនឹងឈានដល់ទីបញ្ចប់។ កង្វល់ធំបំផុត គឺគ្មានផែនការបន្ទាប់ ឬផែនការ «ខ» ឡើយបើផែនការ«ក»ដែលជាការចរចាគ្នានេះបរាជ័យ។ រឿងដែលត្រូវធ្វើគឺមានតែម្យ៉ាងគឺត្រលប់មកប្រយុទ្ធគ្នាឡើងវិញទៀត។ ប៉ុន្តែការចរចានឹងចាប់ផ្តើមទៅរយៈពេលបីជុំ ដើម្បីឲ្យភាគីមានពេលគ្រប់គ្រាន់សម្រាប់ស្វែងរកចំណុចរួមគ្នាបាន៕
© រក្សាសិទ្ធិដោយ thmeythmey.com
