ជាតិ
× សាលាឆទាន គឺជាទីកន្លែងស្នាក់អាស្រ័យរបស់មនុស្សទូទៅ សម្រាប់សម្រាកលំហែរកាយពេលធ្វើដំណើរអស់កម្លាំងផ្លូវឆ្លាយ។ ក្នុងជីវភាពរស់នៅរបស់ប្រជាជនសព្វថ្ងៃនេះ នៅតាមទីប្រជុំជននីមួយៗ គេតែងតែកសាងសាលាឆទាននេះឡើង ក្នុងន័យជាទីកន្លែងប្រមូលផ្ដុំមនុស្សក្នុងភូមិដើម្បីប្រារព្ធពិធីផ្សេងៗ ដែលអ្នកភូមិបានមូលមតិគ្នារៀបចំឡើង។ ជាពិសេស សម្រាប់ធ្វើពិធីបុណ្យទាំងឡាយណា ដែលជាពិធីប្រចាំភូមិផ្ទាល់តែម្ដង ឧទាហរណ៍ដូចជា បុណ្យឡើងមាឃ សម្ភោធភូមិ និងស្រង់ព្រះក្នុងឱកាសចូលឆ្នាំថ្មីជាដើម។
ម្យ៉ាងទៀត គេធ្វើសាលាឆទាននេះឡើងដោយសារមានភូមិខ្លះនៅឆ្ងាយដាច់ស្រយាលមិនមានវត្តអារាមនៅក្បែរ គឺទីនេះគេប្រើប្រាស់ជាកន្លែងសម្រាប់និមន្តព្រះសង្ឃក្នុងការធ្វើកិច្ចផ្សេងៗ ដូចជា ពិធីសុំសីល៍រៀងរាល់ថ្ងៃសីល៍ និងពិធីកាន់បិណ្ឌជាដើម។ ដោយឡែកនៅក្នុងឱកាសអង្គរសង្ក្រាន្តឆ្នាំ២០១៦នេះ នៅក្នុងបរិវេណភូមិខ្ញុំ ក្រៅពីផ្ទះផ្សេងៗ យើងក៏មានរៀបចំឲ្យមានសាលាឆទានមួយឡើងដោយតុបតែងលំអ និងម៉ូតផ្ទះតាមលំនាំរចនាបទខ្មែរ។
នៅទីនេះ យើងមានតម្កល់ព្រះពុទ្ធរូបទ្រង់ភ្នែនមួយអង្គ ព្រមទាំងបាយសី ស្លាធម៌ផ្សេងៗតាមបែបសាសនា។ មិនតែប៉ុណ្ណោះ ក៏មានយាយតាមួយចំនួន ដែលជាចាស់ទុំរស់នៅក្នុងឧទ្យានអង្គរ នៅចាំទីនេះផ្ទាល់ ដើម្បីប្រោះព្រំ និងចងដៃដល់ភ្ញៀវទាំងឡាយណា ដែលបានចូលមកសម្រាកនៅទីនេះ។ ការចងដៃនេះក្នុងន័យជូនពរជ័យផ្ដល់ក្ដីសុខហើយជាពិសេសទៅទៀតនោះ គឺក្នុងឱកាសបុណ្យចូលឆ្នាំថ្មីនេះ អ្នកទាំងអស់គ្នាដែលបានមកកម្សាន្តសប្បាយនៅទីនេះ និងជួបនូវសំណាងល្អគ្រប់ៗគ្នាជាក់ជាមិនខាន។
គួរបញ្ជាក់ថា នៅភូមិខ្ញុំ ដែលជាភូមិមួយក្នុងព្រឹត្តិការណ៍អង្គរសង្រ្កាន្ត ក៏មានសង់សាលាឆទាននេះដែរ។ សាលាឆទាន គឺបានសង់ឡើងនៅកណ្តាលភូមិខ្ញុំ ក្នុងបំណងអភិរក្សវប្បធម៌ប្រពៃណីរបស់ប្រជាជនខ្មែរ៕
អត្ថបទ៖ លោក លឹម ស្រ៊ូ
© រក្សាសិទ្ធិដោយ thmeythmey.com