រដ្ឋមន្ត្រីសាសនាឥណ្ឌូណេស៊ី៖ បុរសពុករលួយ ព្រោះប្រពន្ធលោភលន់ពេក

អន្តរជាតិ

រដ្ឋមន្ត្រីសាសនាឥណ្ឌូណេស៊ី៖ បុរសពុករលួយ ព្រោះប្រពន្ធលោភលន់ពេក

01, May 2016 , 9:39 pm

រូបភាព

ដោយ: តន ចាន់រិទ្ធារ៉ា

រដ្ឋមន្ត្រីក្នុងជួររដ្ឋាភិបាលឥណ្ឌូណេស៊ីម្នាក់ បានបន្ទោសស្ត្រីដែលនាំឲ្យមានអំពើពុករលួយក្នុងប្រទេស ដោយនិយាយថា បុរសប្រព្រឹត្តអំពើពុករលួយ ដោយសារតែភាពលោភលន់ និងសម្ភារៈនិយមពីធម្មជាតិរបស់ប្រពន្ធពួកគេ។

លោក Lukman Hakim Saifuddin រដ្ឋមន្ត្រីកិច្ចសាសនាឥណ្ឌូណេស៊ី និយាយថា បុរសត្រូវរងទុក្ខ ដោយត្រូវរកលុយឲ្យបានច្រើន ព្រោះពួកគេមិនអាចចំណាយពេលច្រើនជាមួយគ្រួសាររបស់ពួកគេ ហើយវាក៏នាំឲ្យពួកគេប្រព្រឹត្តអំពើពុករលួយ។ លោក Lukman បានផ្ញើសារ (ទៅស្ត្រីជាប្រពន្ធ) ថា៖ «កុំទាមទារលើសពីអ្វីដែលមិនចាំបាច់ ព្រោះនេះវិធីល្អ សម្រាប់ជួយប្ដី»។

រដ្ឋមន្ត្រីរូបនេះបន្តថា បើទោះជាអំពើពុករលួយបណ្ដាលមកពីកត្តាផ្សេងក៏ដោយ តែការទាមទារអត់ប្រយោជន៍ពីបុរស ក៏ជាមូលហេតុមួយដែលនាំឲ្យមានអំពើពុករលួយផងដែរ ព្រោះស្ត្រីគិតថា នេះជាលុបលាងកំហុស ដែលប្ដីមិនសូវនៅផ្ទះ។ ជាមួយនឹងសកម្មភាពបែបនេះ បុរសជាប្ដី នឹងធ្វើអ្វីដែលខុសច្បាប់។

សូមរម្លឹកថា បើតាមសារព័ត៌មានAsia Correspondent ដែលដកស្រង់ប្រភពពី Coconut Jakarta ឲ្យដឹងថា អតីតរដ្ឋមន្ត្រីកិច្ចការសាសនាលោក Suryadharma Ali ត្រូវបានកាត់ទោសជាប់គុក៦ឆ្នាំ ពីបទលួចលុយរាប់លានរូពី ពីមូលនិធិHaj របស់រដ្ឋ។

ទាក់ទិននឹងបញ្ហានេះដែរ បើយោងតាមសន្ទស្សន៍អំពើពុករលួយរបស់អង្គការតម្លាភាពអន្តរជាតិប្រចាំឆ្នាំ២០១៥ ឥណ្ឌូណេស៊ីមានចំណាត់ថ្នាក់៨៨ ខណៈដែលពីមុនមានលេខរៀង១០៧។ យ៉ាងណាក្ដី សាធារណមតិឥណ្ឌូណេស៊ី នៅតែគិតថា អំពើពុករលួយនៅតែមានកម្រិតដូចមុនដដែល។

គេមើលឃើញថា ការកើនឡើងចំណាត់ថ្នាក់នេះ ក៏ជាស្នាដៃរបស់ប្រធានាធិបតីឥណ្ឌូណេស៊ីលោក ចូកូ វីដូដូ ដែលជាអ្នកប្រឆាំងអំពើពុករលួយ។ នៅមុនការឈ្នះឆ្នោត លោកបានសន្យាថា នឹងកម្ចាត់អំពើពុករលួយដែលមានក្នុងស្ថាប័នរដ្ឋ និងនៅគ្រប់ទីកន្លែង ដែលនេះបានធ្វើឲ្យមានប្រជាប្រិយភាពខ្លាំង រហូតដល់ក្លាយជាប្រធានាធិបតី។

យ៉ាងណាមិញ អំពើពុករលួយក៏មិនទាន់បោសសម្អាតបានទាំងអស់ដែរ ព្រោះអំពើពុករលួយជ្រៀតចូលយ៉ាងជ្រៅក្នុងសង្គមឥណ្ឌូណេស៊ី ជាពិសេសក្នុងចំណោមមេដឹកនាំធំៗ ដែលមានទំនាក់ទំនងស្អិតល្មួតជាមួយក្រុមពាណិជ្ជករ៕