ជាតិ
នយោបាយជាតិ
លោក នី ចរិយា៖ រូបភាពពីហ្វេសប៊ុក របស់ ពេជ្រ កែវសំណាង
×![]()
ដោយ: ម៉ៅ សុផា
រហូតមកដល់ពេលនេះ គណៈកម្មាធិការជាតិរៀបចំការបោះឆ្នោត (គ.ជ.ប) នៅតែរក្សាភាពស្ងៀមស្ងាត់នៅឡើង ជុំវិញករណីលោក នី ចរិយា ដែលជាអគ្គលេខាធិការរងនៃស្ថាប័នមួយនេះ។ គ.ជ.ប គ្រាន់តែចាត់តាំងមន្ត្រីមួយក្រុមប៉ុណ្ណោះ ដើម្បីតាមដានស្ថានការណ៍និងព័ត៌មាន ដែលតុលាការ កំពុងតែចាត់ការមកលើមន្ត្រីរបស់ខ្លួន។ 
ដរាបណា តុលាការមិនទាន់សម្រេចចោទប្រកាន់មកលើលោក នី ចរិយា នោះថ្នាក់ដឹកនាំនៃគ.ជ.ប នៅតែមិនទាន់លូកដៃ។ ខណៈពេលនេះ គឺជាដែនសមត្ថកិច្ចរបស់តុលាការ ដែលគ.ជ.ប មិនអាចជ្រៀតជ្រែកបាននោះទេ។ នេះជាការអះអាងរបស់លោក ខន កែវមនោ អ្នកនាំពាក្យស្តីទីរបស់គ.ជ.ប ដែលបានថ្លែងប្រាប់សារព័ត៌មានថ្មី នៅព្រឹកនេះ។
«ឥឡូវហ្នឹង យើងមិនទាន់ដឹងថាតុលាការចោទប្រកាន់គាត់ (លោក នី ចរិយា) ពីបទអ្វីទេ។ អ៊ីចឹងយើងរង់ចាំមើលសេចក្តីសម្រេចរបស់តុលារជាមុនសិន ទើបយើងសម្រេចថាត្រូវធ្វើយ៉ាងម៉េច»។ នេះជាការបញ្ជាក់របស់លោក ខន កែវមនោ។
អ្នកនាំពាក្យស្តីទីរូបនេះ បានលើកឡើងថា គ.ជ.ប នឹងពិចារណាក្នុងការជួយនិងធ្វើអន្តរាគមន៍លើករណីលោក នី ចរិយា បន្ទាប់ពីលោក ត្រូវបានតុលាការចោទប្រកាន់ពីបទល្មើសណាមួយ។ លោកពន្យល់ថា តាមផ្លូវច្បាប់ តុលាការ ត្រូវផ្តល់សេចក្តីជូនដំណឹងទៅកាន់គ.ជ.ប ក្នុងរយៈពេល៧២ម៉ោងយ៉ាងយូរ ក្រោយចោទប្រកាន់មកលើមន្ត្រីគ.ជ.ប ពីទោសកំហុសណាមួយ។
សូមបញ្ជាក់ថា លោក នី ចរិយា និងមន្ត្រីអាដហុក៤រូបទៀត រួមមាន លោក នី សុខា, លោក យី សុខសាន្ត, លោក ណៃ វង់ដា និងលោកស្រី លឹម មុនី កំពុងតែស្ថិតនៅក្រោមការសាកសួររបស់តុលាការ។ ពួកគេទាំង៥ ត្រូវបានតុលាការ សាកសួរជុំវិញករណីអំពើពុករលួយដូចគ្នា។
ការសាកសួររបស់តុលាការ គឺពឹងផ្អែកលើអង្គហេតុ ដែលទទួលបានពីអង្គភាពប្រឆាំងអំពើពុករលួយ។ ចំណែកឯ អង្គភាពប្រឆាំងអំពើពុករលួយ បានយកលិខិតចំនួន៤ទំព័រ របស់កញ្ញា ខុម ចាន់តារាទី ហៅស្រីមុំ ដែលបានបើចំហកន្លងមក ធ្វើជាមូលដ្ឋាន ក្នុងការប្រមូលព័ត៌មាន ហើយបញ្ជូនទៅតុលាការ ដើម្បីចាត់ការតាមផ្លូវច្បាប់៕
Tag:
គ.ជ.ប
នី ចរិយា
តុលាការ
អាដហុក
© រក្សាសិទ្ធិដោយ thmeythmey.com
