សង្គមអន្តរជាតិ
អន្តរជាតិ
សភាតួកគី ប្រវាយប្រតប់គ្នាពេញសភា ខណៈជជែកពីការដកអភ័យឯកសិទ្ធិតំណាងរាស្ត្រ
× សមាជិកសភាបក្សកាន់អំណាច និងបក្សប្រឆាំងតួកគី នៅថ្ងៃទី០២ ខែមេសាកន្លងទៅ បានប្រវាយប្រតប់ គ្នាពេញសភា ខណៈពេលខណៈកម្មាធិការរបស់សភា កំពុងតែជជែក និងអនុម័តទទួលយកសំណើ នៃ ការកែប្រែរដ្ឋធម្មនុញ្ញទាក់ទងនឹងការដកអភ័យ ឯកសិទ្ធិរបស់សមាជិកសភា។ ការផ្ទុះហិង្សានេះ បានបង្ក ឲ្យសមាជិកសភាមួយចំនួនរងរបួសផងដែរ។
កណ្តាប់ដៃ ការលោតផ្លោះតុ រួមជាមួយនឹងការគប់ដបទឹកសុទ្ធជាច្រើន បានបង្កឲ្យសភាតួកគីទាំងមូល ត្រូវបាត់បង់សណ្តាប់ធ្នាប់ ក្រោយពីគណៈកម្មាធិការនៃសភាតួកគី បានអនុម័តទទួលយកសំណើដ៏ចម្រូងចម្រាសរបស់បក្សកាន់អំណាចក្នុងការដកអភ័យសិទ្ធិសមាជិកសភាដើម្បីអាចកាត់ទោសបាន។
បើតាមសំណើរបស់បក្សកាន់អំណាចតួកគី ប្រការនៃមាត្រា៨៣នៃរដ្ឋធម្មនុញ្ញដែលបានចែងថា «អ្នកតំណាងរាស្ត្រដែលត្រូវបានរងនូវការចោទថាបានប្រព្រឹត្តបទល្មើសមុន ឬក្រោយនៃការបោះឆ្នោត មិន ត្រូវបានឃុំខ្លួន សាកសួរចម្លើយ ឬជំនុំជម្រះបានឡើយ លុះត្រាមានការសម្រេចពីសភា» នឹងមិនត្រូវ បានអនុវត្តចំពោះសំណុំរឿងដែលទាក់ទងនឹងបណ្តឹងដែលចោទសមាជិកសភាបច្ចុប្បន្ននោះ។
ជុំវិញសំណើនេះដែរ ប្រធានាធិបតីតួកគី លោក Recep Tayyip Erdoğan បានពន្យល់នៅមុនពេលដាក់ទៅកាន់សភា ថា នៅពេលបញ្ហានៃការដកអភ័យសិទ្ធិត្រូវបានជជែកនោះ គេនឹងយល់ថា អភ័យ ឯកសិទ្ធិ គួរតែត្រូវបានដក ហើយវាក៏មិនមែនជាបញ្ហាសំខាន់ដែរ។ លោក បន្ថែមថា វា ក៏មានន័យដែរ ថាអ្នកណាក៏ដោយដែលមានបណ្តឹងប្រឆាំងខ្លួន និតីវិធីនៃបណ្តឹងនោះ នឹងត្រូវបញ្ជូនទៅកាន់តុលាការ ភ្លាមតែម្តង។ លោកសង្កត់ធ្ងន់ថា «ប្រសិនបើអ្នកប្រព្រឹត្តបទល្មើស នោះអ្នកនឹងត្រូវចាត់ការដោយ តុលាការ» ។ លោក ចង់សំដៅថា មិនថាឡើយអ្នកជាសមាជិកសភា ឲ្យតែប្រព្រឹត្តបទល្មើស អ្នកនឹង ត្រូវកាត់ទោសដោយតុលាការ។
តាមពិតទៅ សំណើនៃការដកអភ័យឯកសិទ្ធិសភានេះ ធ្វើឡើងក្រោយពេលដែលលោកប្រធានាធិបតី តួកគី Tayyip Erdoğan បានចោទប្រកាន់សមាជិកសភាមួយចំនួនរបស់បក្សប្រឆាំងថានៅពីក្រោយខ្នង នៃក្រុមឃើដ ដែលកំពុងវាយបង្កសកម្មភាពភេរវកម្ម និងប្រឆាំងរដ្ឋាភិបាលតួកគី។ នេះមានន័យថា ប្រសិនបើសំណើនោះ ត្រូវបានសភាអនុម័តជាផ្លូវការ តំណាងរាស្ត្របក្សប្រឆាំងទាំងនោះ នឹងត្រូវប្រឈមនឹងការកាត់ទោសពន្ធនាគារផងដែរ។
យ៉ាងណាក៏ដោយ សំណើនោះ នឹងត្រូវយកទៅជជែក និងការពារនៅសភាទាំងមូលថ្ងៃទី១៦ខែឧសភាខាងមុខ៕
Tag:
តួកគី
អភ័យឯកសិទ្ធិ
© រក្សាសិទ្ធិដោយ thmeythmey.com